మెగా ఫ్యామిలీ నుంచి దాదాపు 9 మంది హీరోలున్నాయి. ఇప్ప‌టికీ ఈ త‌రం హీరోలు క‌లిసి న‌టించిన సినిమా ఒక్క‌టీ లేదు. మెగా హీరోలు క‌లిసి ఓ మ‌ల్టీస్టార‌ర్ చేస్తే చూడాల‌ని ఫ్యాన్స్ చాలా కాలంగా ఎదురుచూస్తున్నారు. ఆ క‌ల త్వ‌ర‌లోనే నెర‌వేరే స‌మ‌యం రాబోతున్న‌ట్టు తెలుస్తోంది. మెగా హీరో వ‌రుణ్ తేజ్ ఈ విష‌యంలో చాలా ఆస‌క్తిగా వున్నాడ‌ట.
ప్ర‌స్తుతం వ‌రుణ్‌తేజ్ బాక్సింగ్ నేప‌థ్యంలో ఓ సినిమా చేస్తున్న విష‌యం తెలిసిందే. అల్లు అర‌వింద్ స‌మ‌ర్ప‌ణ‌లో ఆయ‌న పెద్ద కుమారుడు అల్లు వెంక‌టేష్, సిద్దు ముద్ద‌తో క‌లిసి ఈ చిత్రాన్ని నిర్మిస్తున్నాడు. క‌రోనా వైర‌స్ కార‌ణంగా ఈ చిత్ర షూటింగ్ ఆగిపోయింది. దీంతో వ‌రుణ్ ఇంటి ద‌గ్గ‌రే వుంటూ సినిమా కోసం క‌స‌ర‌త్తులు చేస్తున్నాడు. తాజాగా ఫ్యాన్స్‌తో సోష‌ల్ మీడియా ట్విట్ట‌ర్ వేదిక‌గా ఇంట‌రాక్ట్ అయ్యాడు.
ఈ సంద‌ర్భంగా ఓ అభిమాని మీరూ, సాయిధ‌ర‌మ్‌తేజ్ క‌లిసి మ‌ల్టీస్టార‌ర్ చేస్తే చూడాల‌ని వుంద‌ని కోరాడు. ఈ ప్ర‌శ్న‌కు వ‌రుణ్ వెంట‌నే స్పందించి ఆ రోజు త‌ప్ప‌కుండా వ‌స్తుంది. మంచి వార్త‌ని త్వ‌ర‌లోనే వింటార‌ని క్లారిటీ ఇచ్చాడు. సాయిధ‌ర‌మ్‌తేజ్ ప్ర‌స్తుతం `సోలో బ్ర‌తుకే సోబెట‌ర్‌` చిత్రంలో న‌టిస్తున్నాడు. త్వ‌ర‌లోనే మెగా మ‌ల్టీస్టార‌ర్ కార్య‌రూపం దాలుస్తుందేమో చూడాలి.