రాజ‌మౌళి తెర‌కెక్కిస్తున్న `ఆర్ ఆర్ ఆర్` రిలీజ్‌కు ముందే సోస‌ల్ మీడియ‌లో వైర‌ల్‌గా మారుతోంది. సినిమా మొద‌లైన ద‌గ్గ‌రి నుంచి ఈ చిత్రానికి సంబంధించి ఏదో ఒక‌టి లీక్ అవుతూనే వుంది. క్యారెక్ట‌ర్స్ డిజైన్ చేసిన విధానం ద‌గ్గ‌రి నుంచి పాత్ర‌ల లుక్స్ కూడా ఒక్కొక్క‌టిగా బ‌య‌టికి వ‌చ్చేస్తున్నాయి. దీంతో `ఆర్ ఆర్ ఆర్` టీమ్ త‌ల ప‌ట్టుకుంటోంద‌ట.
రామ్చరణ్, ఎన్టీఆర్ తొలిసారి క‌లిసి న‌టిస్తున్న ఈ చిత్రం దేశ వ్యాప్తంగా సంచ‌ల‌నం సృష్టిస్తోంది. బాలీవుడ్ దిగ్గ‌జాలు సైతం రాజ‌మౌళి మ‌ళ్లీ ఎలాంటి సినిమాని తెర‌పైకి తీసుకొస్తున్నాడా? అది ఎలాంటి రికార్డుల్ని బ్రేక్ చేస్తుందా? అని ఆరాతీస్తున్నార‌ట. అయితే ఇక్క‌డ మాత్రం ఈ చిత్రానికి సంబంధించిన ఒక్కో కీల‌క అంశం లీక్‌ల రూపంలో బ‌య‌టికి వ‌చ్చేస్తూ క‌ల‌వ‌ర‌పెడుతోంది. ఇటీవ‌ల ఎన్టీఆర్ టైగ‌ర్ జోన్ ఫైట్‌కి సంబంధించిన ఫొటో లీక్ అయింది. ఈ విష‌యాన్ని మ‌ర్చిపోక ముందే తాజాగా రామ్చరణ్ బ్రిటీష్ అధికారి గెట‌ప్‌లో వున్న ఓ ఫొటో, ప‌క్క‌నే అల్లూరి సీతారామరాజు ప్రేయ‌సి పాత్ర‌కు సంబంధించిన లుక్‌లో అలియాభ‌ట్ క‌నిపిస్తున్న ఫొటో ప్ర‌స్తుతం సోష‌ల్ మీడియాలో వైర‌ల్‌గా మారింది.
అయితే ఇది నిజ‌మా? లేక ఫ్యాన్ మెయిడా అన్న‌ది తెలియాల్సి వుంది. సినిమాలోని ఓ క‌ల‌క ఘ‌ట్టంలో హీరో రామ్చరణ్ బ్రిటీష్ పోలీస్ అధికారిగా క‌నిపిస్తార‌ట. అజ‌య్ దేవ్‌గ‌న్‌కి మ‌స్కా కొట్టి అక్క‌డి ఆయుధాల‌ని దొంగిలించే స‌న్నివేశంలో రామ్చరణ్ బ్రిటీష్ పోలీస్ అధికారి వేశంలో వ‌స్తాడ‌ని గ‌త కొన్ని రోజులుగా వార్త‌లు వినిపిస్తున్నాయి. అదే లుక్‌కు సంబంధించిన ఓ ఫొటో బ‌య‌టికి రావ‌డంతో ప్ర‌చారంలో వున్న ఒక్కో ట్విస్ట్ రివీల్ అవుతూ పోతోంది. సినిమా రిలీజ్ వ‌ర‌కు కీల‌క అంశాల‌న్నీ ఇలా రివీల్ అవుతూ పోతే సినిమాపై ఆస‌క్తి త‌గ్గే ప్ర‌మాదం వుంద‌ని టీమ్ భ‌య‌ప‌డుతోంద‌ని ఫిల్మ్ స‌ర్కిల్స్‌లో వినిపిస్తోంది.