కొడంగల్ లో అర్ధరాత్రి హైడ్రామా మధ్య పోలీసులు కాంగ్రెస్ నేత రేవంత్ రెడ్డిని అరెస్ట్ చేశారు. పోలీసులు తీరుకు నిరసనగా మంగళవారం కొడంగల్ బంద్ కు రేవంత్ రెడ్డి పిలుపునిచ్చారు. మంగళవారం టిఆర్ఎస్ అధినేత కేసీఆర్ పర్యటన కొడంగల్ లో ఉంది. దీంతో కేసీఆర్ సభను అడ్డుకునే కుట్రలో భాగంగా రేవంత్ కొడంగల్ బంద్ కు పిలుపునిచ్చారని నియోజకవర్గ నేతలు ఈసికి ఫిర్యాదు చేశారు. ఈసీ ఆదేశాలతో పోలీసులు రేవంత్ పై కేసు నమోదు చేశారు. కేసీఆర్ సభకు అనుమతులున్నాయని సభను అడ్డుకోవద్దని పోలీసులు రేవంత్ ను కోరారు.
మంగళవారం తెల్లవారుజామున 3 గంటల సమయంలో రేవంత్ రెడ్డి ఇంట్లోకి పోలీసులు బలవంతంగా ప్రవేశించారు. ఇంటి తలుపులు బద్దలు కొట్టి ఇంట్లోకి చేరుకున్నారు. ఎన్నికల సంఘం ఆదేశాల మేరకు అరెస్టు చేస్తున్నామని తెలిపారు. ఎన్నికల సంఘం అరెస్టు చేయమని చెప్పిందా అని రేవంత్ పోలీసులను నిలదీశారు. ఎన్నికల సంఘం ఏం చెప్పలేదని సభను అడ్డుకోవద్దని ఆదేశించిందన్నారు.
కొడంగల్ బంద్ కు పిలుపునిచ్చిన నేపథ్యంలో 144 సెక్షన్ అమలులో ఉందని అందుకే అరెస్టు చేస్తున్నామని పోలీసులు రేవంత్ కు తెలిపారు. దీంతో రేవంత్ తాను రానని చెప్పడంతో పోలీసులు రేవంత్ ను బలవంతంగా ఎత్తకెళ్లి పోయారు. అతనిని ఎక్కడికి తీసుకెళ్లారో చెప్పాలని రేవంత్ భార్య గీతారెడ్డి కోరినా పోలీసులు చెప్పలేదు. రేవంత్ రెడ్డిని శంషాబాద్ పోలీస్ స్టేషన్ కు తరలించినట్టుగా తెలుస్తోంది.
రేవంత్ అరెస్టు పై రేవంత్ భార్య గీతారెడ్డి మాట్లాడారు. ఆమె ఏం అన్నారో ఆమె మాటల్లోనే..
“పోలీసులు అర్ధరాత్రి మా ఇంట్లోకి చొరబడి రేవంత్ రెడ్డిని అరెస్టు చేశారు. ఇంటిలోకి బలవంతంగా ప్రవేశించి మూర్ఖంగా ప్రవర్తించారు. మేము ఏమైనా టెర్రరిస్టులమా.. నా భర్తను బలవంతంగా తీసుకెళ్లారు. మా ఆత్మగౌరవం మీద దెబ్బ కొడితే ఊరుకోం. పోలీసులు సిస్టమ్ కు అనుగుణంగా పని చేయాలి కానీ ఒకరి తొత్తులుగా పని చేయవద్దు. రేవంత్ రెడ్డిని అరెస్టు చేసినంత మాత్రాన భయపడేది లేదు. కానీ పోలీసులు ఇంత వరకు నా భర్తను ఎక్కడికి తరలించారో చెప్పలేదు. నా భర్తకు ఏమైనా జరిగితే పోలీసులు, కేసీఆర్ దే బాధ్యత. నా భర్త ఆచూకీ పై ఆందోళన చెందుతున్నాం. వెంటనే నా భర్త ఆచూకి చెప్పాలి” అని రేవంత్ రెడ్డి భార్య గీతారెడ్డి అన్నారు.
కొడంగల్ లో కేసీఆర్ సభ మంగళవారం ఉండడంతో మంత్రి హారీష్ రావు సోమవారమే కొడంగల్ కు చేరుకొని సభ ఏర్పాట్లను దగ్గరుండి పర్యవేక్షిస్తున్నారు. హారీష్ రావే రేవంత్ ను అరెస్టు చేయించారని కార్యకర్తలు ఆందోళన వ్యక్తం చేస్తున్నారు. ఓ వైపు రేవంత్ అరెస్టు , మరో వైపు కేసీఆర్ సభతో కొడంగల్ నివురు గప్పిన నిప్పులా తయారైంది. ప్రతిక్షణం ఏం జరుగుతుందో అన్న టెన్షన్ మొదలైంది. రేవంత్ అరెస్టు వీడియోలు కింద ఉన్నాయి చూడండి.
