కాంగ్రెస్ నేత రేవంత్ రెడ్డిని పోలీసులు విడుదల చేశారు. జడ్చర్లలోని పోలీస్ ట్రైనింగ్ సెంటర్ నుంచి రేవంత్ రెడ్డిని కొడంగల్ కు తరలించారు. భారీ భద్రత మధ్య రేవంత్ రెడ్డిని కొడంగల్ కు పోలీసులు తరలించారు. ఈసీ ఆదేశాలతో పోలీసులు రేవంత్ రెడ్డిని కొడంగల్ కు తరలించారు. రేవంత్ రెడ్డి స్టార్ క్యాంపయినర్ అని ఆయనకు ఎక్కడైనా ప్రచారం చేసుకునే హక్కు ఉందని ఎలక్షన్ కమీషనర్ రజత్ కుమార్ తెలిపారు.
రేవంత్ రెడ్డి అరెస్టును నిరసిస్తూ రేవంత్ ప్రధాన అనుచరుడు వేం నరేందర్ రెడ్డి హైకోర్టులో లంచ్ మోషన్ పిటిషన్ దాఖలు చేశారు. పిటిషన్ ను విచారణకు స్వీకరించిన కోర్టు రేవంత్ ను ఎందుకు అరెస్టు చేశారో చెప్పాలని ప్రశ్నించింది. రేవంత్ కొడంగల్ బంద్ కు పిలుపునిచ్చారని శాంతి భద్రతలకు విఘాతం కలిగే అవకాశం ఉందనే సమాచారంతో అరెస్టు చేశామని పిపి కోర్టుకు తెలిపారు. ఇంటలిజెన్స్ నివేదిక సమర్పించాలని కోర్టు ఆదేశించగా పోలీసులు నివేదిక సమర్పించలేదు. దీంతో కోర్టు పోలీసుల పై ఆగ్రహం వ్యక్తం చేసింది.
ఈలోపు ఎన్నికల అధికారి రజత్ కుమార్ రేవంత్ రెడ్డిని విడుదల చేయాలని తెలంగాణ డిజిపిని ఆదేశించారు. ఎట్టకేలకు తర్జన భర్జనల మధ్య రేవంత్ రెడ్డిని పోలీసులు విడుదల చేశారు. భారీ బందోబస్తు మధ్య జడ్చర్ల నుంచి కొడంగల్ కు రేవంత్ రెడ్డిని తరలించారు. దీంతో రేవంత్ అరెస్టు ఉత్కంఠకు తెరపడింది.
రేవంత్ రెడ్డిని విడుదల చేశామని ఏజీ కోర్టుకు తెలిపారు. అర్ధరాత్రి రేవంత్ ను అరెస్టు చేయాల్సిన అవసరమేముందని కోర్టు ఆగ్రహం వ్యక్తం చేసింది. రేవంత్ అరెస్టు కారణాలు చెప్పాలని కోర్టు ప్రశ్నించగా బుధవారం సమర్పిస్తామని పిపి తెలిపారు. ఏజీ వాంగ్మూలాన్ని కోర్టు రికార్డు చేసింది. పోలీసుల తీర పై అసంతృప్తి వ్యక్తం చేసిన కోర్టు రేవంత్ కేసును బుధవారానికి వాయిదా వేసింది.
రేవంత్ రెడ్డి విడుదల అయిన వీడియో కింద ఉంది చూడండి.
కొడంగల్ లో అర్ధరాత్రి హైడ్రామా మధ్య పోలీసులు కాంగ్రెస్ నేత రేవంత్ రెడ్డిని అరెస్ట్ చేశారు. పోలీసులు తీరుకు నిరసనగా మంగళవారం కొడంగల్ బంద్ కు రేవంత్ రెడ్డి పిలుపునిచ్చారు. మంగళవారం టిఆర్ఎస్ అధినేత కేసీఆర్ పర్యటన కొడంగల్ లో ఉంది. దీంతో కేసీఆర్ సభను అడ్డుకునే కుట్రలో భాగంగా రేవంత్ కొడంగల్ బంద్ కు పిలుపునిచ్చారని నియోజకవర్గ నేతలు ఈసికి ఫిర్యాదు చేశారు. ఈసీ ఆదేశాలతో పోలీసులు రేవంత్ పై కేసు నమోదు చేశారు. కేసీఆర్ సభకు అనుమతులున్నాయని సభను అడ్డుకోవద్దని పోలీసులు రేవంత్ ను కోరారు.
మంగళవారం తెల్లవారుజామున 3 గంటల సమయంలో రేవంత్ రెడ్డి ఇంట్లోకి పోలీసులు బలవంతంగా ప్రవేశించారు. ఇంటి తలుపులు బద్దలు కొట్టి ఇంట్లోకి చేరుకున్నారు. ఎన్నికల సంఘం ఆదేశాల మేరకు అరెస్టు చేస్తున్నామని తెలిపారు. ఎన్నికల సంఘం అరెస్టు చేయమని చెప్పిందా అని రేవంత్ పోలీసులను నిలదీశారు. ఎన్నికల సంఘం ఏం చెప్పలేదని సభను అడ్డుకోవద్దని ఆదేశించిందన్నారు.
కొడంగల్ బంద్ కు పిలుపునిచ్చిన నేపథ్యంలో 144 సెక్షన్ అమలులో ఉందని అందుకే అరెస్టు చేస్తున్నామని పోలీసులు రేవంత్ కు తెలిపారు. దీంతో రేవంత్ తాను రానని చెప్పడంతో పోలీసులు రేవంత్ ను బలవంతంగా ఎత్తకెళ్లి పోయారు. జడ్చర్లలోని పోలీసు ట్రైనింగ్ సెంటర్ కు రేవంత్ ను పోలీసులు తరలించారు.
రేవంత్ అరెస్టు పై కాంగ్రెస్ నేతలు హైకోర్టును ఆశ్రయించారు. రేవంత్ అరెస్టును నేతలంతా ఖండించారు. ఈసీ ఆదేశాలతో రేవంత్ ను పోలీసులు భారీ భద్రత మధ్య కొడంగల్ కు తరలించారు. దీంతో రేవంత్ అరెస్టు ఉత్కంఠకు తెరపడింది.