MLC Venkat Wedding Reception: తెలంగాణ ముఖ్యమంత్రి రేవంత్ రెడ్డి సోమవారం కాంగ్రెస్ ఎమ్మెల్సీ, యువ నాయకుడు బల్మూరి వెంకట్ వివాహ రిసెప్షన్ వేడుకకు హాజరయ్యారు. నూతన వధూవరులు బల్మూరి వెంకట్ – ఇందుజ రెడ్డిలను ఆయన ఆశీర్వదించి, శుభాకాంక్షలు తెలియజేశారు.
కాంగ్రెస్ పార్టీలో క్రియాశీలక యువ నేతగా ఎదిగిన ఎమ్మెల్సీ బల్మూరి వెంకట్, ఇటీవలే వివాహ బంధంలోకి అడుగుపెట్టిన సంగతి తెలిసిందే. జగిత్యాల జిల్లా యూత్ కాంగ్రెస్ ప్రధాన కార్యదర్శిగా బాధ్యతలు నిర్వర్తిస్తున్న గడ్డం ఇందుజ రెడ్డితో ఆయన వివాహం ఈ నెల ఏప్రిల్ 11న గోవాలో జరిగింది. అప్పట్లో కేవలం కుటుంబ సభ్యులు, అత్యంత సన్నిహితుల సమక్షంలో ఈ వివాహ వేడుకను నిరాడంబరంగా నిర్వహించారు.
గోవాలో జరిగిన పెళ్లికి అందరూ హాజరు కాలేకపోవడంతో, పార్టీ నాయకులు, కార్యకర్తలు మరియు శ్రేయోభిలాషుల కోసం తాజాగా ఘనంగా రిసెప్షన్ను ఏర్పాటు చేశారు. ఈ కార్యక్రమానికి ముఖ్య అతిథిగా విచ్చేసిన ముఖ్యమంత్రి రేవంత్ రెడ్డి, నూతన దంపతులతో కాసేపు ముచ్చటించారు. వారి వైవాహిక జీవితం సుఖసంతోషాలతో వర్ధిల్లాలని ఆకాంక్షిస్తూ ఆశీస్సులు అందజేశారు.
ఈ వేడుకలో ముఖ్యమంత్రితో పాటు పలువురు రాష్ట్ర మంత్రులు, ఎంపీలు, ఎమ్మెల్యేలు మరియు కాంగ్రెస్ పార్టీకి చెందిన కీలక నేతలు పాల్గొని వధూవరులను అభినందించారు. తమ అభిమాన నాయకుడి వివాహ వేడుక కావడంతో పెద్ద సంఖ్యలో కార్యకర్తలు తరలివచ్చి సందడి చేశారు.
