భారత దేశంలో ప్రతీ పౌరునికి ఆధార్ కార్డు తప్పనిసరిగా ఉండాలని కేంద్రం హెచ్చరికలు జారీ చేసింది. భారతదేశంలో యూనిక్ ఐడెంటిఫికేషన్ అథారిటీ ఆఫ్ ఇండియా జారీ చేసిన ఈ ఆధార్ కార్డ్ ప్రతి చిన్న అవసరానికి గుర్తింపు కార్డుగా పనిచేస్తుంది. కేంద్ర, రాష్ట్ర ప్రభుత్వాలు అందించే సంక్షేమ పథకాల అమలు ఆధార్ ప్రామణికంగా తీసుకుంటారు. దీంతో ఆధార్ ప్రతిఒక్కరికీ తప్పనిసరైంది. ఈ నేపథ్యంలో ప్రజల అవసరాల మేరకు యూఐడీఏఐ కూడా ఆధార్ సేవలను సులభతరం చేసింది. ప్రస్తుతం యూఐడీఏఐ వెబ్సైట్లో ఆధార్ మిత్ర అనే చాట్బాట్తో సేవలను అందిస్తుంది. ఆధార్ మిత్ర ద్వారా భారత పౌరులు ఆధార్ సంబంధిత సమస్యలు తెలుపటం మరింత సులభం అయ్యింది.
ఆధార్ వినియోగదారులు తమ ఆధార్ సంబంధిత సమస్యలకు సమాధానం ఇవ్వడానికి ఏఐఎంఎల్ టెక్నాలజీతో ఈ ఆధార్ మిత్ర ని రూపొందించారు. యూజర్లకు ఫ్రెండ్లీ ఎక్స్పీరియన్స్ను ఇవ్వడానికి దీన్ని డిజైన్ చేశారు. ఆధార్ నమోద సంఖ్య, పీవీసీ కార్డు స్థితి, ఫిర్యాదు స్థితి ఇతర విషయాలు అందుబాటులో ఉంటాయి. అలాగే ఇందులో ఇంగ్లిష్, హిందీ భాషల్లో అందుబాటలో ఉంటుంది. ఆధార్ తనిఖీ, నవీకరణ స్థితి, దగ్గరలోని ఆధార్ కేంద్రం, వీడియో ఫ్రేమ్ ఇంటిగ్రేషన్ వంటి వివరాలు గురించి ఇక్కడ తెలుసుకోవచ్చు.
భారతదేశంలో ఉన్న ఆధార్ వినియోగదారులు ఆధార్ మిత్ర సేవలు ఎలా పొందాలో ఇప్పుడు మనం తెలుసుకుందాం. ఆధార్ మిత్ర చిట్ చాట్ ద్వారా సేవలు పొందటానికి ముందుగా యూఐడీఏఐ వెబ్సైట్కు వెళ్లాలి. అక్కడ ఇంగ్లిష్ లేదా ఇతర భాష ఆప్షన్లు సెలెక్ట్ చేసుకోవాలి. ఆ తరువాత కుడివైపున కనిపించే ఆధార్ మిత్ర చాట్బాట్ మీద క్లిక్ చేయాలి. ఆధార్ వినియోగదారులు తమ సమస్యలకు సంబందించిన ప్రశ్నలు అక్కడ ఎంటర్ చేసి సమాధానం పొందవచ్చు. లేదా అడిగిన ప్రశ్నలకు సమాధానంగా వీడియోలు లింక్లు కూడా డిస్ప్లే అవుతాయి. అక్కడ సంబంధిత వీడియోలను వీక్షించి సరైన సమాచారం పొందవచ్చు.