బెజవాడ మున్సిపల్ కార్పొరేషన్ ఎన్నికల ముచ్చట ఇంకా బయటకు రాలేదు కానీ, అప్పుడే ‘మేయర్’ కుర్చీ కోసం పచ్చ చొక్కాల మధ్య అసలు సిసలైన ఫైట్ మొదలైపోయింది. ఈసారి మేయర్ ఎన్నిక ప్రత్యక్ష పద్ధతి అంటారేమో.. ఆశావాహుల లిస్ట్ చాంతాడంత తయారవుతోంది. అయితే, ప్రస్తుతానికి రేసులో ఇద్దరి పేర్లు గట్టిగా వినిపిస్తున్నాయి. ఒకరు విజయవాడ సెంట్రల్ ఎమ్మెల్యే బొండా ఉమ వారసుడు బొండా సిద్ధార్థ్ అయితే.. ఇంకొకరు బెజవాడ బ్రాండ్ నేమ్ వంగవీటి రాధాకృష్ణ. మరి ఈ ఇద్దరిలో మేయర్ పీఠంపై పైచేయి సాధించే ఛాన్స్ ఎవరికి ఉందనే దానిపై ఇంట్రెస్టింగ్ చర్చ నడుస్తోంది.
రాజకీయాల్లో ఎప్పుడు ఎవరు ఏ జెండా కప్పుకుంటారో తెలియని రోజులివి. కానీ, గత ఐదేళ్ల వైసీపీ ‘జగన్నాథ రథచక్రాల’ కింద నలిగిపోయిన టైంలో కూడా బొండా ఉమ ఫ్యామిలీ పచ్చ జెండాను వదల్లేదు. కేసులు పెట్టారు, ప్రలోభాలు పెట్టారు.. అయినా సరే ‘తమ్ముడు.. నేన ఇక్కడే ఉంటా’ అన్నట్టు బొండా సిద్ధార్థ్ పార్టీ లైన్ దాటలేదు. ఇప్పుడు ఈ ‘విధేయత’ కార్డునే బొండా క్యాంప్ గట్టిగా వాడుతోంది. చంద్రబాబును కలిసి బయోడేటా కూడా ఇచ్చేయడం, దానికి బాబుగారు సానుకూలంగా తలాడించడంతో ‘మా సిద్ధార్థ్కే బాబు గ్రీన్ సిగ్నల్ ఇచ్చేశారు’ అంటూ బెజవాడలో టాక్ మొదలైంది. పార్టీ కష్టకాలంలో ఉన్నప్పుడు రోడ్డు మీద నిలబడ్డారు కాబట్టి, ఈ కుర్రాడికి పైచేయి సాధించే అవకాశాలు మెండుగా ఉన్నాయనేది ఇన్సైడ్ టాక్.
మరి వంగవీటి రాధా పరిస్థితి ఏంటి..? ఆయన పాలిటిక్స్ ఎప్పుడూ ఒక పజిల్ లాగే ఉంటాయి. నియోజకవర్గంలో తమ్ముళ్లు కొట్టుకుంటుంటే రాధా గారు మాత్రం ఎప్పుడూ సైలెంట్గా ఉంటారు. ఎన్నికలు రాగానే ‘స్టార్ క్యాంపెయినర్’ కార్ ఎక్కి నాలుగు ఊర్లు తిరిగి ప్రచారం చేసి మళ్లీ కామ్ అయిపోతారు. ఇదంతా ఒకెత్తైతే, పచ్చ క్యాడర్కు అస్సలు నచ్చని కొడాలి నాని, వల్లభనేని వంశీలతో రాధా గారికి ఉన్న ‘జిగిరీ దోస్తీ’లు ఇప్పుడు ఆయనకు పెద్ద మైనస్గా మారాయి. పార్టీ అధినాయకత్వాన్ని తిట్టిన వాళ్లతో రాధా గారు విందులు, వినోదాలు చేయడంపై స్థానిక తమ్ముళ్లు గుర్రుగా ఉన్నారు. ‘మాయదారి స్నేహాలు’ రాధా సీటుకు ఎక్కడ ఎసరు పెడతాయోనని అనుమానాలు వ్యక్తమవుతున్నాయి.
మార్కెట్లో వినిపిస్తున్న టాక్ ప్రకారం.. ఈ ఇద్దరిలో ప్రస్తుతానికి బొండా సిద్ధార్థ్ గ్రాఫ్ చాలా పైచేయిగా కనిపిస్తోంది. ఎందుకంటే బాబుగారికి ఎప్పుడూ ‘విధేయత, కష్టపడటం’ అనే సెంటిమెంట్లు చాలా ఇష్టం. రాధా గారికి ఓటు బ్యాంకు ఇమేజ్ ఉన్నప్పటికీ, పార్టీ లైన్ లో నిరంతరం యాక్టివ్గా లేకపోవడం, శత్రువులతో స్నేహాలు ఆయనకు బ్రేకులు వేస్తున్నాయి. మరి చివరి నిమిషంలో బాబుగారు ఏ మార్కు రాజకీయం చేస్తారో చూడాలి.