ఆంధ్రప్రదేశ్ రాజకీయాల్లో, ముఖ్యంగా బెజవాడ పాలిటిక్స్లో ‘వంగవీటి’ అనే పేరుకు ఉండే క్రేజ్, వైబ్రేషన్స్ వేరు. దివంగత మహానేత వంగవీటి మోహన రంగా ఇమేజ్, ఆయన అభిమాన గణం ఇప్పటికీ ఒక బలమైన ఓటు బ్యాంకు. మరి అలాంటి రంగా ఏకైక వారసుడు వంగవీటి రాధాకృష్ణ ప్రస్తుత పరిస్థితి ఏంటి.? ఆయన పొలిటికల్ ఫ్యూచర్ ఏంటి..? అసలు రంగా కొడుకు అయి ఉండి కూడా ఆయన ఎందుకు ఎప్పుడూ అంత ‘సైలెంట్’గా ఉంటారు..? అనే అంశాలపై బెజవాడ లీడర్లు, జనాలు వేసుకుంటున్న వెటకారపు ప్రశ్నల ఇంట్రెస్టింగ్ కథనం ఇది.
రాధా గారి పాలిటిక్స్ ఎప్పుడూ ఒక మిస్టరీ లాగే ఉంటాయి. రాష్ట్రంలో ఏ రాజకీయ పార్టీ అయినా 365 రోజులూ జనంలో ఉండేందుకు కష్టపడుతుంటే, రాధా గారు మాత్రం రూటే వేరు. ఐదేళ్ల పాటు నియోజకవర్గంలో తమ్ముళ్లు కొట్టుకుంటున్నా, కేడర్ ఇబ్బందులు పడుతున్నా ఆయన మాత్రం ప్రశాంతంగా ‘అజ్ఞాతవాసం’లో ఉంటారు. కానీ, సరిగ్గా ఎన్నికల నోటిఫికేషన్ రాగానే సడన్గా ప్రత్యక్షమైపోతారు. పార్టీ అధిష్ఠానం ఒక ‘స్టార్ క్యాంపెయినర్’ కార్ ఇస్తే.. నాలుగు, ఐదు నియోజకవర్గాల్లో మైక్ పట్టి నాలుగు డైలాగులు చెప్పి ప్రచారం చేసేస్తారు.
ఎన్నికలు ముగిసి, రిజల్ట్స్ రాగానే మళ్లీ కార్ ఎక్కి ఎక్కడికి వెళ్తారో, ఎందుకు అంత కామ్ అయిపోతారో ఎవరికీ అర్థం కాదు. అందుకే బెజవాడ జనాలు ఈయన్ను ప్రేమగా ‘సీజనల్ స్టార్’ అని పిలుచుకుంటున్నారు. ఇక రాధా గారి పర్సనల్ ఫ్రెండ్షిప్స్ చూస్తే పచ్చ చొక్కాల కేడర్కు ఎక్కడో కాలుతోంది. రాజకీయంగా తెలుగుదేశం పార్టీని, బాబుగారిని ఏ రేంజ్లో తిట్టాలో ఆ రేంజ్లో తిట్టిన కొడాలి నాని, వల్లభనేని వంశీలతో రాధాకు ఉన్న ‘దోస్తీ’లు మామూలువి కావు. రాజకీయం ఎలా ఉన్నా.. ‘మేము ముగ్గురం క్లోజ్ ఫ్రెండ్స్’ అంటూ వాళ్లతో కలిసి విందులు, వినోదాలు, ఫంక్షన్లలో రాధా తెగ బిజీగా కనిపిస్తుంటారు.
ఒకవైపు పార్టీ కోసం రక్తం చిందించిన కార్యకర్తలు ఈ స్నేహాలు చూసి తలలు పట్టుకుంటున్నారు. ‘పార్టీ శత్రువులతో ఇంత కలుపుగోలుగా ఉంటే.. రేపు విజయవాడ లాంటి హాట్ సీట్ మేయర్ పీఠాన్ని నీకు ఎలా ఇస్తారు బాసూ?’ అని కేడర్ అంతర్గతంగా గుసగుసలాడుకుంటోంది. రంగా కొడుకుగా రాధాకు ఉన్న మాస్ ఇమేజ్, కాపు సామాజికవర్గంలో ఉండే క్రేజ్ తక్కువదేం కాదు. కానీ, ‘ఉండీ లేనట్లు’ ఉండే ఆయన నైజమే ఆయన పొలిటికల్ కెరీర్కు పెద్ద స్పీడ్ బ్రేకర్ లాగా మారింది.
ప్రజల్లో నిరంతరం తిరగకుండా, లోకల్ కేడర్ను కాపాడుకోకుండా కేవలం ‘వారసత్వం’ సెంటిమెంట్తోనే ఎన్నాళ్లు రాజకీయం లాగుతారనేది విశ్లేషకుల ప్రశ్న. ఒకప్పుడు బెజవాడను శాసించిన కుటుంబం నుండి వచ్చిన లీడర్.. ఇప్పుడు కనీసం మేయర్ సీటు రేసులో కూడా బొండా ఉమ కొడుకు సిద్ధార్థ్ కంటే వెనుకబడిపోవడం చూస్తుంటే, రాధా తన పాలిటిక్స్ స్ట్రాటజీని మార్చకపోతే భవిష్యత్తులో కూడా ఇలాగే ‘స్టార్ క్యాంపెయినర్’ బోర్డు తగిలించుకుని సరిపెట్టుకోవాల్సి వస్తుందని బెజవాడ తమ్ముళ్లు సెటైర్లు వేస్తున్నారు.