ప్రముఖ శైవక్షేత్రం శ్రీకాళహస్తీశ్వరాలయంలో వరుస ఘటనలు భక్తులను తీవ్ర ఆందోళనకు గురిచేస్తున్నాయి. ఆలయ ప్రసాదాల తయారీ కేంద్రంలో జరిగిన అగ్నిప్రమాదం మరువక ముందే, 24 గంటల వ్యవధిలోనే మరో భారీ భద్రతా వైఫల్యం వెలుగులోకి వచ్చింది. మహారాష్ట్రలోని పుణెకు చెందిన అంకేష్ అగర్వాల్ అనే భక్తుడు తన కుటుంబ సభ్యులతో కలిసి దర్శనానికి వచ్చి, ఏకంగా స్పై కెమెరా అమర్చిన కళ్లజోడుతో ఆలయంలోకి ప్రవేశించాడు. 5 వేల రూపాయల టికెట్ తీసుకుని రాహుకేతు పూజ జరిపించుకోవడమే కాకుండా, వాయులింగేశ్వర స్వామివారి దర్శనం కూడా పూర్తి చేసుకుని జ్ఞానప్రసూనాంబ అమ్మవారి గర్భాలయంలోకి వెళ్లాడు.
అక్కడ విధుల్లో ఉన్న అర్చకుడికి ఆ కళ్లజోడుపై అనుమానం రావడంతో వెంటనే ఎస్పీఎఫ్ భద్రతా సిబ్బందికి సమాచారం అందించగా, వారు నిందితుడిని అదుపులోకి తీసుకున్నారు. ప్రధాన ద్వారం వద్ద స్కానర్లు, మెటల్ డిటెక్టర్లు, నిఘా కెమెరాలు మరియు పటిష్టమైన భద్రతా సిబ్బంది ఉన్నప్పటికీ, ఒక భక్తుడు స్పై కెమెరా కళ్లజోడుతో స్వామివారి గర్భాలయం వరకు వెళ్లడం ఆలయ భద్రతా తనిఖీల డొల్లతనాన్ని బయటపెట్టింది. ఒకవేళ అమ్మవారి ఆలయ పూజారి కళ్లజోడులోని చిన్న రంధ్రాన్ని, లైట్ బ్లింక్ అవ్వడాన్ని గమనించకపోతే ఆ భక్తుడు దర్జాగా బయటకు వెళ్లిపోయేవాడు.
స్వామివారి మూలవిరాట్టును కూడా అతను రహస్యంగా రికార్డు చేశాడా అనే కోణంలో పోలీసులు ఇప్పుడు అతని మొబైల్ ఫోన్ మరియు కళ్లజోడు డేటాను పరిశీలిస్తున్నారు. నిజానికి ఆంధ్రప్రదేశ్‌లోని ప్రముఖ దేవాలయాల్లో ఇలాంటి ఆధునిక సాంకేతిక భద్రతా ఉల్లంఘనలు జరగడం ఇదే మొదటిసారి కాదు. కలియుగ ప్రత్యక్ష దైవం తిరుమల శ్రీవారి ఆలయంలో సైతం మూడంచెల భద్రతను దాటుకుని ఇటీవల అనేక ఘటనలు చోటుచేసుకున్నాయి.
2026 సంవత్సరం గణాంకాలను పరిశీలిస్తే, తిరుమల తిరుపతి దేవస్థానం విజిలెన్స్ అధికారులు ఏకంగా 261 డ్రోన్లను, 105 మెటా స్మార్ట్ మరియు స్పై కెమెరా కళ్లజోళ్లను స్వాధీనం చేసుకున్నారు. గతేడాది డిసెంబర్‌లో ఒక ఎన్నారై భక్తుడు అలిపిరి తనిఖీ కేంద్రాలను దాటుకుని తిరుమల శిలాతోరణం వద్ద డ్రోన్ ఎగురవేయడం సంచలనం రేపింది. అలాగే శ్రీవారి ఆలయంలోని ఆనంద నిలయం దృశ్యాలను రహస్యంగా వీడియో తీసి సోషల్ మీడియాలో పోస్ట్ చేసిన ఘటనలు కూడా అధికారులను ఉలిక్కిపడేలా చేశాయి.
కేవలం ఎలక్ట్రానిక్ పరికరాలే కాకుండా, శ్రీకాళహస్తి ఆలయంలో గతంలో తమిళనాడు భక్తులు రాతి నాగప్రతిమలను లోపలికి తీసుకురావడం, కొందరు చెప్పులతో ఆలయ ప్రాంగణంలోకి ప్రవేశించడం వంటి ఘటనలు భద్రతా సిబ్బంది నిర్లక్ష్యాన్ని ఎత్తిచూపాయి. నేడు మార్కెట్లో సాధారణ కళ్లజోళ్లలా కనిపించే ‘మెటా స్మార్ట్ గ్లాసెస్’, ‘బటన్ కెమెరాలు’ విచ్చలవిడిగా దొరుకుతున్నాయి. పాతకాలపు మెటల్ డిటెక్టర్లు, సాధారణ తనిఖీలతో వీటిని గుర్తించడం కష్టమవుతోంది. ఆలయాల భద్రత, గోప్యత, కోట్లాది మంది భక్తుల మనోభావాలను దృష్టిలో ఉంచుకుని, రాష్ట్రంలోని అన్ని ప్రధాన దేవాలయాల్లో ఆధునిక స్కానింగ్ యంత్రాలను ఏర్పాటు చేయడంతో పాటు భద్రతా సిబ్బందికి ప్రత్యేక శిక్షణ ఇవ్వాల్సిన అవసరం ఎంతైనా ఉంది.