తిరువూరు టీడీపీ ఎమ్మెల్యే కొలికపూడి శ్రీనివాసరావు మరోసారి తీవ్ర వివాదంలో చిక్కుకున్నారు. ఎన్టీఆర్ జిల్లా విస్సన్నపేట మండలం నరసాపురం జెడ్పీ హైస్కూల్కు చెందిన పీఈటీ టీచర్ రమేష్పై ఎమ్మెల్యే భౌతిక దాడికి దిగారనే ఆరోపణలు ఇప్పుడు రాష్ట్రవ్యాప్తంగా సంచలనం రేపుతున్నాయి. సొంత పార్టీ ఎమ్మెల్యేనే ప్రభుత్వ ఉపాధ్యాయుడిపై చేయి చేసుకోవడాన్ని తీవ్రంగా పరిగణించిన ఏపీ సామాజిక సంక్షేమ బోర్డు చైర్మన్ పోతుల బాలకోటయ్య.. నేరుగా తెలుగుదేశం పార్టీ అధిష్ఠానానికి లిఖితపూర్వకంగా ఫిర్యాదు చేయడం రాజకీయ వర్గాల్లో తీవ్ర కలకలం రేపుతోంది.
ఈ వివాదానికి అసలు కారణం పాఠశాలలో ఇటీవల నిర్వహించిన ఆటల పోటీలని తెలుస్తోంది. నియోజకవర్గ ప్రోటోకాల్ ప్రకారం స్థానిక ఎమ్మెల్యే అయిన కొలికపూడి శ్రీనివాసరావును కాకుండా.. స్కూల్ యాజమాన్యం స్థానికంగా ఉండే మరో టీడీపీ నేతను ముఖ్య అతిథిగా ఆహ్వానించింది. ఈ పరిణామంతో తీవ్ర ఆగ్రహానికి గురైన ఎమ్మెల్యే.. ఈ నెల 25వ తేదీన సదరు పీఈటీ టీచర్ రమేష్ను తన నివాసానికి పిలిపించుకున్నారని బాలకోటయ్య తన ఫిర్యాదులో పేర్కొన్నారు. అక్కడికి వచ్చిన ఉపాధ్యాయుడిని తీవ్ర పదజాలంతో దుర్భాషలాడటమే కాకుండా, కర్రతో భౌతికంగా దాడి చేశారని ఆరోపించారు.
అదే సమయంలో స్కూల్ హెచ్ఎంను కూడా ఎమ్మెల్యే ఫోన్ లో తీవ్రంగా హెచ్చరించినట్లు తెలుస్తోంది. ఉపాధ్యాయుల ఆత్మగౌరవాన్ని దెబ్బతీసేలా ప్రవర్తించిన ఎమ్మెల్యే కొలికపూడి శ్రీనివాసరావుపై వెంటనే కఠిన క్రమశిక్షణా చర్యలు తీసుకోవాలని డిమాండ్ చేస్తూ టీడీపీ రాష్ట్ర అధ్యక్షుడు పల్లా శ్రీనివాసరావుకు పోతుల బాలకోటయ్య లేఖ సమర్పించారు. ప్రభుత్వ ఉద్యోగులపై, ముఖ్యంగా గురువులపై ఇలాంటి దాడులు జరగడం కూటమి ప్రభుత్వానికి అప్రతిష్ట తెచ్చేలా ఉందని ఆయన ఆవేదన వ్యక్తం చేశారు.