ఆంధ్రప్రదేశ్ రాజకీయంలో ఎప్పుడూ హాట్ టాపిక్ గా నిలిచే కృష్ణా జిల్లా గన్నవరం నియోజకవర్గంలో ఊహించని రాజకీయ ట్విస్ట్ చోటుచేసుకుంది. ఏపీ వ్యాప్తంగా పరిషత్ ఎన్నికల్లో ఎన్డీయే కూటమి క్లీన్ స్వీప్ దిశగా దూసుకుపోతుంటే, గన్నవరం జెడ్పీటీసీ స్థానంలో మాత్రం కూటమి అభ్యర్థిపై వైఎస్సార్ కాంగ్రెస్ పార్టీ అభ్యర్థి అనగాని రవి సంచలన విజయం సాధించారు. కూటమి పొత్తులో భాగంగా ఈ స్థానాన్ని భారతీయ జనతా పార్టీకి కేటాయించగా, అక్కడ కూటమి అభ్యర్థి చిగురుపాటి కుమారస్వామిపై వైసీపీ అభ్యర్థి కేవలం 64 ఓట్ల అతి స్వల్ప మెజార్టీతో జైత్రయాత్ర సాగించడం తీవ్ర చర్చనీయాంశంగా మారింది.
ఈ ఓటమికి స్థానిక తెలుగుదేశం పార్టీ ఎమ్మెల్యే యార్లగడ్డ వెంకట్రావు వైఫల్యాలే ప్రధాన కారణమని నియోజకవర్గంలో గట్టి టాక్ నడుస్తోంది. ఎమ్మెల్యేగా బాధ్యతలు చేపట్టిన రెండున్నరేళ్ల కాలంలో క్షేత్రస్థాయిలో ప్రజా వ్యతిరేకత తీవ్రంగా పెరిగిందని, నియోజకవర్గంలో పెరిగిన ఆయన వైఫల్యాల వల్లే వైసీపీ మళ్లీ భారీగా పుంజుకునే అవకాశం దక్కిందని విశ్లేషకులు భావిస్తున్నారు. దీనికి తోడు గన్నవరంలో గత కొంతకాలంగా మాజీ ఎమ్మెల్యే వల్లభనేని వంశీ మరియు ఎమ్మెల్యే యార్లగడ్డ వెంకట్రావు వర్గాల మధ్య సాగుతున్న తీవ్రమైన ఆధిపత్య పోరు, అంతర్గత వర్గపోరు కూటమి ఓటమికి దారితీశాయి. ఈ వర్గపోరు కారణంగానే ఓట్లు చీలిపోయి అంతిమంగా వైసీపీ అభ్యర్థికి భారీగా లాభం చేకూరింది.
మరోవైపు కూటమి పొత్తుల నేపథ్యంలో ఈ జెడ్పీటీసీ స్థానాన్ని బీజేపీకి కేటాయించడాన్ని స్థానిక టీడీపీ కేడర్ పూర్తిగా జీర్ణించుకోలేకపోయింది. దీంతో క్షేత్రస్థాయిలో తెలుగుదేశం ద్వితీయ శ్రేణి నాయకులు, కార్యకర్తలు కూటమి అభ్యర్థి గెలుపు కోసం ఆశించిన స్థాయిలో గ్రౌండ్ వర్క్ చేయలేదని తెలుస్తోంది. నియోజకవర్గ కేంద్రంలోనే నేతల మధ్య సమన్వయ లోపం స్పష్టంగా బయటపడటం, లోపాయికారీగా జరిగిన క్రాస్ ఓటింగ్ వల్లే కూటమి కంచుకోటలో జెండా కోల్పోవాల్సి వచ్చింది. ఎమ్మెల్యే యార్లగడ్డ వెంకట్రావు ఇప్పటికైనా తన వైఫల్యాలను సరిదిద్దుకుని, కేడర్‌ను సమన్వయం చేసుకోకపోతే రాబోయే పంచాయతీ ఎన్నికల్లో గన్నవరంలో కూటమికి మరిన్ని ఇబ్బందులు తప్పవని రాజకీయ విశ్లేషకులు హెచ్చరిస్తున్నారు.