రాష్ట్రవ్యాప్తంగా స్థానిక సంస్థల ఎన్నికల్లో కూటమి క్లీన్ స్వీప్ దిశగా దూసుకుపోయినా, గుంటూరు మున్సిపల్ కార్పొరేషన్ పరిధిలో వెలువడిన ఫలితాలు మాత్రం తెలుగుదేశం అధినేత, ముఖ్యమంత్రి చంద్రబాబు నాయుడికి తీవ్ర అసంతృప్తిని మిగిల్చాయి. ఎక్కడో మారుమూల పల్లెల్లో సైతం వన్ సైడ్ లీడ్ సాధించిన కూటమి.. గుంటూరు లాంటి కీలకమైన జిల్లా కేంద్రంలో మాత్రం ఆశించిన స్థాయిలో ప్రభావం చూపలేక చతికిలపడింది. దీనిపై తీవ్ర ఆగ్రహం వ్యక్తం చేసిన చంద్రబాబు, అసలు లోపం ఎక్కడుందో తేల్చాలని ఇంటెలిజెన్స్, పార్టీ అంతర్గత విభాగాలను ఆదేశించారు.
అయితే ఈ వైఫల్యానికి కేవలం ప్రత్యర్థి బలం కారణం కాదు, సొంత పార్టీ నేతల మధ్య ఉన్న ‘ఈగో’లు, సమన్వయ లోపమేనని క్షేత్రస్థాయి విశ్లేషణలు స్పష్టం చేస్తున్నాయి. గుంటూరు నగర రాజకీయం ఎప్పుడూ గ్రూపు తగాదాలకు కేరాఫ్ అడ్రస్‌గా ఉంటుంది. ఈ ఎన్నికల్లో కూడా అదే సీన్ రిపీట్ అయింది. మేయర్ అభ్యర్థిగా ఎవరిని నిలబెట్టాలనే విషయంలో సీనియర్ల మధ్య ఒక అంగీకారం కుదరకపోవడంతో, అభ్యర్థి ఎంపిక ఆఖరి నిమిషం వరకు నలిగింది. ఒకవైపు తోట వెంకటేశ్వర్లు, రవీంద్ర, కాట్రగడ్డ వంటి నేతల పేర్లు వినిపించినా.. స్పష్టత లేకపోవడంతో క్యాడర్‌లో తీవ్ర గందరగోళం నెలకొంది.
దీనికి తోడు పలు వార్డులలో పాత, నమ్మకమైన కార్యకర్తలను పక్కనపెట్టి ఇతర పార్టీల నుంచి వచ్చిన వలస నేతలకు టిక్కెట్లు ఇచ్చుకుంటూ పోవడం స్థానిక తమ్ముళ్లకు అస్సలు మింగిడుపడలేదు. ఫలితంగా చాలా డివిజన్లలో అధికారిక అభ్యర్థులకు వ్యతిరేకంగా తిరుగుబాట్లు వెల్లువెత్తాయి. కొందరు సీనియర్ నేతలే వెనకుండి ఈ రెబెల్స్‌ను నడిపించారనే పక్కా సమాచారం ఇప్పుడు అధిష్టానం వద్దకు చేరింది. మరో ప్రధానమైన లోపం ఎక్కడ జరిగిందంటే.. పోలింగ్ శాతాన్ని మేనేజ్ చేయడంలో స్థానిక మంత్రులు, ఎమ్మెల్యేలు పూర్తిగా వైఫల్యం చెందారు.
కూటమి అనుకూల ఓటర్లను పోలింగ్ బూత్‌ల వరకు తీసుకురావడంలో అలసత్వం ప్రదర్శించడంతో కీలకమైన డివిజన్లలో ఓటింగ్ శాతం భారీగా పడిపోయింది. ఇదే సమయంలో వైసీపీ మాత్రం సైలెంట్‌గా గ్రౌండ్ వర్క్ చేసుకుని, తమ ఓటు బ్యాంకును పక్కాగా పోల్ చేయించుకుని సేఫ్ జోన్‌లోకి వెళ్ళింది. మెజారిటీల విషయంలోనూ తీవ్ర గందరగోళం నెలకొనడం, ఒకానొక దశలో కౌంటింగ్ కేంద్రాల వద్ద కేవలం 96 ఓట్ల స్వల్ప తేడాతో టెన్షన్ వాతావరణం ఏర్పడటం వంటి పరిణామాలు అధిష్టానాన్ని విస్మయానికి గురిచేశాయి. గెలిచాం కదా అని సంబరపడిపోకుండా, ఇటువంటి అంతర్గత వెన్నుపోట్లను సహించేది లేదని, త్వరలోనే గుంటూరు నేతలకు చంద్రబాబు క్లాస్ పీకడం ఖాయమని పార్టీ వర్గాలు గుసగుసలాడుకుంటున్నాయి.