ఆంధ్రప్రదేశ్‌లో స్థానిక సంస్థల ఎన్నికల నిర్వహణకు హైకోర్టు గ్రీన్ సిగ్నల్ ఇవ్వడంతో రాష్ట్రవ్యాప్తంగా మున్సిపల్ ఎన్నికల వేడి ఒక్కసారిగా రాజుకుంది. ముఖ్యంగా నెల్లూరు మున్సిపల్ కార్పొరేషన్ మేయర్ పీఠాన్ని దక్కించుకునేందుకు రాజకీయ పార్టీలు, కీలక నేతలు తమ సర్వశక్తులూ ఒడ్డుతున్నారు. బీసీ రిజర్వేషన్ల వివాదంపై కోర్టు స్టే తెచ్చుకుని ఎన్నికలను వాయిదా వేయించవచ్చని ఆశపడిన ప్రతిపక్ష వైఎస్సార్ కాంగ్రెస్ పార్టీకి న్యాయస్థానం నిర్ణయంతో గట్టి నిరాశే ఎదురైంది. ఈ నెలాఖరులోనే ఎన్నికల నోటిఫికేషన్ వచ్చే అవకాశాలు స్పష్టంగా కనిపిస్తుండటంతో, ఇప్పుడు నెల్లూరు కార్పొరేషన్ రాజకీయం రసవత్తరంగా మారింది.
30 ఏళ్ల తర్వాత నెల్లూరు మున్సిపాలిటీ జనరల్ స్థానంగా మారే సూచనలు కనిపిస్తుండటంతో అభ్యర్థుల ఎంపికపై తీవ్ర ఉత్కంఠ నెలకొంది. నెల్లూరు మున్సిపల్ ఎన్నికల బరిలో టిడిపి తరఫున మేయర్ అభ్యర్థిగా రూప్ కుమార్ యాదవ్ పేరును వేమిరెడ్డి ప్రభాకర్ రెడ్డి, ప్రశాంతి రెడ్డి దంపతులు ఇప్పటికే కుండబద్దలు కొట్టినట్లు ఖరారు చేసేశారు. రిజర్వేషన్ ఏదైనా సరే, తాము అనుకున్న రూప్ కుమారే బరిలో ఉంటాడని విపిఆర్ దంపతులు గట్టిగా పట్టుబడుతున్నారు. పార్టీ కోసం తాము వందల కోట్ల రూపాయల మేర పెట్టుబడులు పెట్టామని, నారా లోకేష్‌కు అవసరమైన ప్రతి సందర్భంలోనూ అండగా నిలిచామని, కాబట్టి జిల్లా రాజకీయాల్లో మరియు అభ్యర్థుల ఎంపికలో తమ మాట కాదనే ప్రసక్తే ఎవరికీ లేదంటూ ప్రశాంతి రెడ్డి అంతర్గత సంభాషణల్లో బహిరంగంగానే వ్యాఖ్యానిస్తున్నట్లు గుసగుసలు వినిపిస్తున్నాయి.
లోకేష్ సైతం జిల్లా రాజకీయాల పగ్గాలను ప్రశాంతి రెడ్డి చేతిలోనే పెట్టడంతో పార్టీలో మరెవరూ మేయర్ రేసులోకి వచ్చే ధైర్యం చేయడం లేదు. సాధారణంగా కార్పొరేషన్ పరిధిలో సగం స్థానాలు తన రూరల్ నియోజకవర్గంలో ఉన్నప్పుడు ఎమ్మెల్యే కోటంరెడ్డి శ్రీధర్ రెడ్డి తన ప్రమేయం లేకుండా అభ్యర్థిని ప్రకటిస్తే తీవ్రంగా ప్రతిఘటించాలి. కానీ లోకేష్ ధోరణిని గమనించిన కోటంరెడ్డి.. వృథా ప్రయాస ఎందుకని ‘అనువుగాని చోట అధికుడనకూడదు’ అనే సామెత చొప్పున పూర్తిగా మౌనం పాటిస్తున్నారు. మరోవైపు మంత్రి నారాయణ మాత్రం జనరల్ స్థానంలో బీసీ అభ్యర్థిని పెడితే ఓసీ సామాజిక వర్గంలో అసంతృప్తి వస్తుందని భావిస్తున్నారు.
అందుకే రూప్ కుమార్‌కు ప్రత్యామ్నాయంగా తన హాస్పిటల్ సీఈఓగా పనిచేస్తున్న వేమిరెడ్డి పట్టాభిరామరెడ్డిని తెరపైకి తేవాలని ఆయన యోచిస్తున్నట్లు ప్రచారం సాగుతోంది. అయితే విపిఆర్ దంపతుల ఆర్థిక బలం ముందు ఈ ప్రతిపాదనలు ఎంతవరకు నిలుస్తాయనేది ప్రశ్నార్థకమే. టీడీపీలో నడుస్తున్న ఈ అంతర్గత విభేదాలను, సామాజిక సమీకరణాల లోపాలను అనుకూలంగా మార్చుకోవడానికి వైసీపీ అధిష్టానం పక్కా వ్యూహంతో అడుగులు వేస్తోంది. జనరల్ స్థానాన్ని క్యాష్ చేసుకునేందుకు భారీ ఆర్థిక బలం, బలమైన అనుచరగణం కలిగిన శాసనమండలి సభ్యుడు చంద్రశేఖర్ రెడ్డిని మేయర్ అభ్యర్థిగా బరిలోకి దింపేందుకు వైసీపీ రంగం సిద్ధం చేస్తోంది. జిల్లా నేతల్లో కూడా చంద్రశేఖర్ రెడ్డి అభ్యర్థిత్వంపై ఎలాంటి వ్యతిరేకత లేదు. ఒకవేళ చంద్రశేఖర్ రెడ్డి ప్రత్యర్థిగా నిలబడితే విపిఆర్ దంపతుల అభ్యర్థికి చెమటలు పట్టడం ఖాయమని, ఈ ఎన్నికల ఫలితం విపిఆర్ కుటుంబ రాజకీయ భవిష్యత్తును, రేపటి మంత్రి పదవి అవకాశాలను కూడా శాసించే ప్రమాదం ఉందని రాజకీయ విశ్లేషకులు భావిస్తున్నారు.