ఆంధ్రప్రదేశ్‌లో మున్సిపల్, కార్పొరేషన్ ఎన్నికల నగారా మోగనున్న తరుణంలో అధికార తెలుగుదేశం పార్టీ అధిష్టానం క్షేత్రస్థాయి సమీకరణాలపై పక్కా వ్యూహంతో ముందుకు వెళ్తోంది. కూటమి ప్రభుత్వం అధికారంలోకి వచ్చిన తర్వాత జరుగుతున్న మొదటి స్థానిక సంస్థల ఎన్నికలు కావడంతో.. వీటిని అత్యంత ప్రతిష్టాత్మకంగా తీసుకుంది. రాష్ట్రవ్యాప్తంగా వందకు పైగా పురపాలక సంఘాలు, నగరపాలక సంస్థల్లో క్లీన్ స్వీప్ చేయడమే లక్ష్యంగా అడుగులు వేస్తోంది. ఈ క్రమంలోనే ఏ నియోజకవర్గంలో లేదా ఏ జిల్లాలో తేడా వచ్చినా సహించేది లేదని, ప్రతి ఒక్కరూ గెలుపే లక్ష్యంగా పనిచేయాలని టీడీపీ అధిష్టానం పార్టీ శ్రేణులకు, ప్రజాప్రతినిధులకు స్పష్టమైన ఆదేశాలు జారీ చేసింది.
స్థానిక ఎన్నికల్లో గెలుపు గుర్రాలను బరిలోకి దించడంతో పాటు, అంతర్గత అసంతృప్తులను చల్లార్చి పార్టీని విజయతీరాలకు చేర్చే పూర్తి బాధ్యతలను టీడీపీ అధిష్టానం ఆయా జిల్లాల ఇన్ఛార్జ్ మంత్రుల భుజాలపై పెట్టింది. జిల్లా పరిధిలోని ఎమ్మెల్యేలు, మున్సిపల్ ఆశావాహుల మధ్య సమన్వయం కుదర్చడం.. ఎక్కడా ఓట్లు చీలిపోకుండా చూసుకోవడం ఇన్ఛార్జ్ మంత్రుల ప్రధాన విధిగా మార్చింది. ఒక రకంగా చెప్పాలంటే, ఆయా జిల్లాల్లో వచ్చే ఫలితాలే సదరు ఇన్ఛార్జ్ మంత్రుల పొలిటికల్ పెర్ఫార్మెన్స్‌కు కొలమానంగా మారనున్నాయి. దీంతో మంత్రులపై ఒక్కసారిగా ఒత్తిడి పెరిగింది.
అయితే, ఈ గెలుపు భారం కాస్తా ఇప్పుడు ఇన్ఛార్జ్ మంత్రులకు ఆర్థిక భారంగా మారుతోందనే వార్తలు పొలిటికల్ సర్కిల్స్‌లో తెగ హల్‌చల్ చేస్తున్నాయి. సాధారణంగా స్థానిక ఎన్నికల్లో పోటీ చేసే అభ్యర్థులే ఖర్చు భరించాల్సి ఉంటుంది. కానీ, కూటమి అధికారంలోకి వచ్చిన ఈ నాలుగు నెలల కాలంలో క్షేత్రస్థాయిలో ద్వితీయ శ్రేణి నాయకులు, ఆశావాహులు ఆర్థికంగా ఇంకా అంతగా పుంజుకోలేదనే టాక్ నడుస్తోంది. దీనికి తోడు ప్రతిపక్ష వైసీపీని ఢీకొట్టే క్రమంలో ఎన్నికల వ్యయం ఊహించని రేంజ్‌కు చేరుతోంది.
ఇలాంటి పరిస్థితుల్లో కొన్ని నియోజకవర్గాల్లో స్థానిక నేతలు, అభ్యర్థులు చేతులెత్తేస్తుండటంతో.. గెలుపు బాధ్యత నెత్తిన వేసుకున్న ఇన్ఛార్జ్ మంత్రులే స్వయంగా రంగంలోకి దిగి ఖర్చు పెట్టాల్సిన సీన్ క్రియేట్ అయినట్లు సమాచారం. అధిష్టానం వద్ద తమ మార్కులు తగ్గకూడదనే తాపత్రయంతో.. కొన్ని జిల్లాల్లో ఇన్ఛార్జ్ మంత్రులు తమ సొంత నిధుల నుంచే అభ్యర్థుల ప్రచారానికి, పార్టీ మేనేజ్‌మెంట్‌కు భారీగా కేటాయింపులు చేయాల్సి వస్తోందని ఇంటర్నల్ టాక్. “గెలవకపోతే బాస్ ఆగ్రహానికి గురి కావాలి.. గెలవాలంటే జేబులు ఖాళీ చేసుకోవాలి” అన్నట్లుగా మారిన ఇన్ఛార్జ్ మంత్రుల పరిస్థితి ఇప్పుడు ఏపీ పొలిటికల్ ల్యాండ్‌స్కేప్‌లో హాట్ టాపిక్‌గా మారింది. ఈ మున్సిపల్ ముఠాపోరులో ఇన్ఛార్జ్ మంత్రుల వ్యూహాలు, ఆర్థిక అంగబలం పార్టీకి ఎలాంటి ఫలితాలు తెచ్చిపెడతాయో చూడాలి.