ఆంధ్రప్రదేశ్ రాజకీయాల్లో ఇప్పుడు ఎక్కడ చూసినా ఒకటే ముచ్చట నడుస్తోంది. అదే.. ముఖ్యమంత్రి చంద్రబాబు నాయుడు ఇస్తున్న “ప్రోగ్రెస్ రిపోర్ట్లు”, “ర్యాంకులు”. చంద్రబాబు మాట్లాడితే చాలు.. చేతిలో ఐప్యాడ్ లేదా ఫైల్స్ పట్టుకుని మంత్రులు, ఎమ్మెల్యేల జాతకాలు బహిరంగంగా చదివి వినిపిస్తున్నారు. దాంతో కూటమి ప్రభుత్వంలోని ప్రజాప్రతినిధులకు ఎప్పుడు ఎక్కడ పరువు పోతుందోనని లోపల తీవ్రంగా కాలుతున్నట్లు భోగట్టా. నియోజకవర్గాల్లో తిరిగే లీడర్లను తెచ్చి క్లాస్రూమ్ విద్యార్థుల్లా మార్చేసి, అందరి ముందే మార్కులు వేస్తుండటంతో మంత్రులు, ఎమ్మెల్యేలు తీవ్ర ఇబ్బంది పడుతున్నారు.
అడ్మినిస్ట్రేషన్ పరంగా చంద్రబాబు తీసుకొచ్చిన ఈ కొత్త విధానం ఇప్పుడు పెద్ద వివాదానికి దారితీస్తోంది. ముఖ్యంగా సెక్రటేరియట్లో ఫైల్స్ క్లియరెన్స్ రేటు, శాఖల పనితీరు, ప్రజల్లో వస్తున్న ఫీడ్బ్యాక్ ఆధారంగా చంద్రబాబు మంత్రులకు గ్రేడింగ్లు, ర్యాంకులు ఇస్తున్నారు. “ఫలానా మంత్రి ఫైల్స్ పెండింగ్ పెడుతున్నారు.. ఫలానా శాఖ గ్రాఫ్ పడిపోతోంది” అంటూ కేబినెట్ మీటింగ్లలోనే కాదు, అవసరమైతే ప్రెస్ మీట్లలో, పబ్లిక్ సభల్లో కూడా రిపోర్ట్ కార్డులు బయటపెడుతున్నారు. దాంతో సీనియర్ మంత్రులు సైతం చంద్రబాబు ముందు కూర్చోవడానికి వణికిపోతున్నారు. తాము మంత్రులమా లేక కార్పొరేట్ ఆఫీస్ ఉద్యోగులమా అంటూ కొందరు నేతలు అంతర్గత సంభాషణల్లో వాపోతున్నారట.
ఇక ఎమ్మెల్యేల పరిస్థితి అయితే మరీ దారుణంగా తయారైంది. నియోజకవర్గాల్లో పట్టు, ప్రజల్లో ఉన్న క్రేజ్, సంక్షేమ పథకాల పంపిణీలో యాక్టివ్నెస్ వంటి దాదాపు 25 అంశాలను ప్రాతిపదికగా తీసుకుని చంద్రబాబు ఎమ్మెల్యేల పెర్ఫార్మెన్స్ను లెక్కగడుతున్నారు. ఇటీవల నర్సాపురం జనసేన ఎమ్మెల్యేకు పబ్లిక్ వేదికపైనే క్లాస్ పీకడం దీనికి ఒక పెద్ద ఉదాహరణ. “అన్నింట్లో మైనస్ ఉన్నారు.. ఇది ఆమోదయోగ్యం కాదు” అంటూ బాబు గారు లైవ్లోనే కడిగిపారేయడంతో కూటమి ఎమ్మెల్యేలు తీవ్ర ఆత్మరక్షణలో పడ్డారు. రేపు తమ నియోజకవర్గానికి సీఎం వస్తే తమ రిపోర్ట్ కార్డులో ఏముంటుందోనని ఎమ్మెల్యేలు గుండెలు గుప్పిట్లో పెట్టుకుని బతుకుతున్నారు.
అయితే, ఈ ర్యాంకుల వెనుక చంద్రబాబు ఒక పెద్ద పొలిటికల్ మాస్టర్ ప్లాన్ రన్ చేస్తున్నారనే ప్రచారం కూడా గట్టిగా సాగుతోంది. రాబోయే స్థానిక సంస్థల ఎన్నికల్లో టికెట్ల కేటాయింపుకు, అలాగే భవిష్యత్తులో కేబినెట్ విస్తరణ లేదా మార్పుల సమయానికి ఎవరినీ అడ్డు చెప్పకుండా చేయడానికి ఈ “ర్యాంకుల అస్త్రాన్ని” చంద్రబాబు వాడుతున్నారనే టాక్ నడుస్తోంది. ఎవరైనా తిరగబడితే.. “ఇగో నీ ప్రోగ్రెస్ రిపోర్ట్.. నువ్వే మైనస్లో ఉన్నావ్” అని నోరు నొక్కేయవచ్చనేది బాబు గారి స్కెచ్ లాగా కనిపిస్తోంది. పరిపాలనను ట్రాక్లో పెట్టడానికి ఇది మంచిదే అయినా.. పొలిటికల్ లీడర్ల ఇగోలను దెబ్బతీసేలా సాగుతున్న ఈ ర్యాంకుల రాజకీయం కూటమిలో ముందు ముందు ఎలాంటి చిచ్చు పెడుతుందో వేచి చూడాలి.