తెలంగాణ కాంగ్రెస్లో ‘నేనే బాస్.. నా మాటే శాసనం’ అన్నట్టుగా సాగుతున్న ముఖ్యమంత్రి రేవంత్ రెడ్డి ఏకపక్ష పాలనకు మంత్రి కొండా సురేఖ గట్టిగానే బ్రేకులు వేసినట్టు కనిపిస్తోంది. నిన్నటి వరకు సురేఖను మంత్రి పదవి నుంచి తీసేస్తాం, తోసేస్తాం అంటూ రేవంత్ వర్గం బిల్డప్ ఇచ్చిన సీన్ మొత్తం ఇప్పుడు ఢిల్లీ వేదికగా అభాసుపాలైంది. రేవంత్ రెడ్డి మార్క్ వలస రాజకీయాన్ని, ఆయన ఒంటెద్దు పోకడలను కొండా సురేఖ మీడియా చిట్చాట్లో తన మార్క్ కామెంట్స్ కడిగిపారేయడం ఇప్పుడు గాంధీ భవన్ సర్కిల్స్లో హాట్ టాపిక్గా మారింది.
“పదేళ్ల పాటు తానే సీఎం అని రేవంత్ రెడ్డి గారు ముందే డిసైడ్ అయిపోయి మురిసిపోతున్నారు.. మరి అది క్రమశిక్షణా ఉల్లంఘన కిందకు రాదా?” అంటూ సురేఖ వేసిన కౌంటర్ రేవంత్ ఇగోను గట్టిగానే దెబ్బతీసింది. అసలు హైకమాండ్ను, అధిష్ఠానాన్ని పక్కనబెట్టి రాబోయే ఎన్నికల్లో పరకాల టికెట్ ఎవరిదో డిసైడ్ చేయడానికి, బహిరంగ సభల్లో అభ్యర్థులను ప్రకటించడానికి రేవంత్కు అసలు ఏం హక్కు ఉందని ఆమె నిలదీశారు. సీఎం కుర్చీ ఎక్కినంత మాత్రాన కాంగ్రెస్ పార్టీ మొత్తాన్ని తన సొంత జాగీరులా కబ్జా చేస్తామంటే కుదరదంటూ సురేఖ వేసిన వెటకారపు పంచ్లు రేవంత్ వర్గానికి గొంతులో పచ్చివెలక్కాయ పడ్డట్టు చేశాయి.
తనపై చర్యలు తీసుకునే ముందు, ప్రభుత్వంలో కూర్చుని ఇష్టారాజ్యంగా వ్యవహరిస్తున్న సీఎం రేవంత్ రెడ్డిపైనే ముందు చర్యలు తీసుకోవాలని సురేఖ డిమాండ్ చేయడం విశేషం. “పార్టీలో బీసీ నాయకురాలికి ఒక న్యాయం.. రేవంత్ రెడ్డికి, ఆయన సామాజికవర్గానికి మరో న్యాయమా?” అంటూ ఆమె సంధించిన ప్రశ్నలకు రేవంత్ క్యాంప్ దగ్గర సమాధానం లేకుండా పోయింది. ప్రస్తుతం రేవంత్ రెడ్డి కేబినెట్లోని పలువురు మంత్రులపై వస్తున్న అవినీతి అక్రమాల ఆరోపణలను, సీఎం అన్నదమ్ముల లీలలను సురేఖ అధిష్ఠానానికి రాతపూర్వకంగా పంపడంతో రేవంత్ రెడ్డి మార్క్ ‘క్రమశిక్షణ’ ముసుగు పూర్తిగా తొలగిపోయింది.
రాష్ట్రంలో మంత్రులు, సీనియర్ నేతలు రేవంత్ తీరుపై ఎంతలా రగిలిపోతున్నారో సురేఖ ఢిల్లీ సాక్షిగా బట్టబయలు చేశారు. ఇప్పటివరకు తనను ఎవరూ రాజీనామా చేయమని అడిగే ధైర్యం కూడా చేయలేదని చెప్పడం ద్వారా రేవంత్కు ఆమె గట్టి షాకే ఇచ్చారు. తాను తెచ్చిన వలస నేతలతో పార్టీని కబ్జా చేయాలని చూస్తున్న రేవంత్ రెడ్డికి, కొండా సురేఖ ఢిల్లీ వేదికగా ఇచ్చిన ఈ ‘రిటర్న్ గిఫ్ట్’ రాబోయే రోజుల్లో ఎలాంటి పొలిటికల్ మలుపులు తిప్పుతుందో చూడాలి.