దసరా శరన్నవరాత్రి ఉత్సవాల సందర్భంగా విజయవాడ నగరంలో అక్టోబర్ 11 నుండి 20 వరకు అత్యంత ప్రతిష్టాత్మకంగా నిర్వహించబోతున్న ‘విజయవాడ ఉత్సవ్ 2.0’ చుట్టూ ఇప్పుడు పొలిటికల్ సర్కిల్స్‌లో ఒక ఆసక్తికరమైన చర్చ జోరుగా సాగుతోంది. ఈ ఉత్సవాన్ని నెక్స్ట్ లెవెల్‌లో సక్సెస్ చేయడానికి విజయవాడ కూటమి ఎంపీ కేశినేని శివనాథ్ ఒకవైపు అహోరాత్రులు శ్రమిస్తుంటే.. మరోవైపు దీనికి సంబంధించిన భారీ ఆర్థిక భారం మొత్తం ఒంటరిగా ఆయన భుజాల మీదే పడుతుండటం ఇప్పుడు హాట్ టాపిక్‌గా మారింది.
నగర పరిధిలోని స్థానిక ఎమ్మెల్యేలు గానీ, పార్టీలోని ఇతర కీలక నేతలు గానీ ఈ ఉత్సవం కోసం సొంతంగా నిధులు ఖర్చు చేయడానికి లేదా బాధ్యతలు పంచుకోవడానికి పెద్దగా ఆసక్తి చూపించడం లేదనే ప్రచారం సాగుతోంది. రాజకీయ వర్గాల ఇన్సైడ్ టాక్ ప్రకారం.. ఈ భారీ వేడుక నిర్వహణ బాధ్యతలను ఒంటరిగా మోయాల్సి రావడంపై ఎంపీ కేశినేని చిన్ని కాస్త అసంతృప్తితో, మానసిక వేదనతో ఉన్నట్లు తెలుస్తోంది. నగరానికి మైలేజ్ వచ్చే ఇంత పెద్ద ఈవెంట్‌ను ప్రతిష్టాత్మకంగా తీసుకుని తానే ముందడుగు వేస్తే..
తీరా తీరం దాటే సమయానికి మిగతా నేతలు చేతులెత్తేయడం, కనీసం నిధుల సమీకరణలో కూడా భాగస్వాములు కాకపోవడంపై ఆయన తన సన్నిహితుల వద్ద “అనవసరంగా ఈ భారాన్ని నెత్తిన వేసుకున్నానేమో” అని కాస్త బాధపడినట్లు టాక్ నడుస్తోంది. ప్రభుత్వ పరంగా, టూరిజం శాఖ పరంగా కొంత సపోర్ట్ ఉన్నప్పటికీ.. క్షేత్రస్థాయిలో ప్రైవేట్ ఈవెంట్ మేనేజ్‌మెంట్, భారీ సెట్టింగులు, మరియు సాంస్కృతిక కార్యక్రమాల నిర్వహణకు అయ్యే మేజర్ ఖర్చును ఎంపీనే వెనక ఉండి భరించాల్సి వస్తోందని విశ్లేషణలు వినిపిస్తున్నాయి.
గత ఏడాది లో నిర్వహించిన మొదటి ఎడిషన్ విజయవాడ ఉత్సవ్ కూడా భారీ స్థాయిలో జరిగి గిన్నీస్ రికార్డు సాధించింది. ఆ సమయంలో 600 స్టాళ్లు, డ్రోన్ షోలు, మరియు సాంస్కృతిక ప్రదర్శనల కోసం ప్రైవేట్, స్పాన్సర్‌షిప్ రూపంలో దాదాపు రూ. 10 కోట్ల నుండి రూ. 15 కోట్ల వరకు భారీ బడ్జెట్ ఖర్చు అయినట్లు అంచనా. ఇక ఈసారి ‘ఉత్సవ్ 2.0’ ని మరింత నెక్స్ట్ లెవెల్‌కు తీసుకెళ్లి.. రాష్ట్రపతి ద్రౌపది ముర్ముతో పాటు 9 మంది రాష్ట్రాల ముఖ్యమంత్రులను, బడా పారిశ్రామికవేత్తలను ఆహ్వానిస్తున్నందున,
ఈ 10 రోజుల ఈవెంట్ ల్యాండ్‌స్కేప్ మరియు సెక్యూరిటీ బడ్జెట్ ఏకంగా రూ. 15 కోట్ల నుండి రూ. 20 కోట్లకు పైగానే దాటే అవకాశం స్పష్టంగా కనిపిస్తోంది. కేవలం గొల్లపూడి లేదా పున్నమి ఘాట్ పరిసరాల్లోని 18 ఎకరాల ప్రభుత్వ, దేవస్థాన స్థలాల లీజులు, తాత్కాలిక షెడ్ల రెంట్ల కోసమే రికార్డు స్థాయిలో లక్షలాది రూపాయలు చెల్లించాల్సి వచ్చింది. ఇంతటి భారీ బడ్జెట్ ఉన్న ఈవెంట్‌ను వాణిజ్య వర్గాలు, చాంబర్ ఆఫ్ కామర్స్ స్పాన్సర్‌షిప్‌లతో మేనేజ్ చేయడానికి చూస్తున్నప్పటికీ.. పొలిటికల్ బ్యాకింగ్, సొంత నిధుల గ్యారెంటీ లేకుండా ముందుకు వెళ్లడం కష్టం. ఈ క్రమంలోనే స్థానిక ఎమ్మెల్యేలు గ్రూపు రాజకీయాల వల్లనో లేదా ఖర్చుకు భయపడినో సైడ్ అవ్వడం.. ఎంపీ చిన్నిని కాస్త డిఫెన్స్‌లో పడేసిందనేది బెజవాడ పాలిటిక్స్‌లో వినిపిస్తున్న లేటెస్ట్ ఇన్సైడ్ గాసిప్.