ఖైరతాబాద్ మాజీ ఎమ్మెల్యే దానం నాగేందర్ సుప్రీంకోర్టులో చేయాలనుకున్న న్యాయపోరాటానికి తెరపడింది. బీఆర్ఎస్ నుంచి గెలిచి కాంగ్రెస్ కండువా కప్పుకుని లోక్సభ ఎన్నికల్లో పోటీ చేసిన దానంపై.. ఫిరాయింపుల నిరోధక చట్టం కింద హైకోర్టు ఇచ్చిన అనర్హత వేటును సుప్రీంకోర్టు సమర్థించింది. ఎమ్మెల్యే పదవి పోవడమే కాకుండా.. త్వరలోనే ఖైరతాబాద్కు బై-ఎలక్షన్ రాబోతుండటంతో అక్కడ పొలిటికల్ హీట్ అప్పుడే మొదలైంది. అయితే తీర్పు వచ్చిన వెంటనే స్పందించిన దానం.. “నాకు ఎన్నికలు కొత్త కాదు, ప్రజాక్షేత్రంలోనే తేల్చుకుంటా” అంటూ సవాల్ విసిరారు.
సాధారణంగా అధికార కాంగ్రెస్ పార్టీలోనే ఉన్న దానం.. వచ్చే ఉప ఎన్నికల్లో కాంగ్రెస్ అభ్యర్థిగానే బరిలోకి దిగుతారని అందరూ భావించారు. కానీ, ఆయన చేసిన వ్యాఖ్యలు పొలిటికల్ సర్కిల్స్ను షేక్ చేస్తున్నాయి. “షెడ్యూల్ వచ్చాక ఏ పార్టీ నుంచి పోటీ చేస్తాననేది చెప్తాను.. ప్రజల మనిషికి ఏ పార్టీలో ఉన్నా మద్దతు ఉంటుంది” అని దానం నాగేందర్ వ్యాఖ్యానించడం వెనుక పెద్ద వ్యూహమే ఉందనే చర్చ నడుస్తోంది. కాంగ్రెస్ పార్టీలో ఉంటూ.. ఏ పార్టీ నుంచి పోటీ చేస్తానో తర్వాత చెప్తా అనడం వెనుక కాంగ్రెస్ అధిష్టానం నుంచి ఆయనకు గట్టి హామీ లభించలేదా..? అనే సందేహాలు వ్యక్తమవుతున్నాయి.
పార్టీ ఫిరాయించి వచ్చిన దానం నాగేందర్ వల్ల ప్రభుత్వంపై ‘ఫిరాయింపుల’ ముద్ర పడిందని, పైగా సికింద్రాబాద్ లోక్సభ ఎన్నికల్లో ఆయన ఓడిపోవడం కాంగ్రెస్కు మైనస్గా మారిందనే టాక్ పార్టీలో నడుస్తోంది. ఉప ఎన్నిక వస్తే ఈసారి స్థానిక కాంగ్రెస్ కేడర్ బలంగా ఉన్న నేతకే టికెట్ ఇవ్వాలని సీఎం రేవంత్ రెడ్డి భావిస్తున్నట్లు సమాచారం. హైకోర్టు తీర్పు వచ్చాక దానం ఇంతవరకు సీఎం రేవంత్ను కలవకపోవడం కూడా ఈ అనుమానాలకు బలాన్ని చేకూరుస్తోంది. కాంగ్రెస్ నుంచి గ్రీన్ సిగ్నల్ రాకపోవడంతోనే దానం ప్రత్యామ్నాయ దారుల వైపు చూస్తున్నారనే టాక్ నడుస్తోంది.
ఖైరతాబాద్ నియోజకవర్గంలో ముస్లిం మైనారిటీ ఓటర్ల సంఖ్య చాలా ఎక్కువ. దానికి తోడు దానం నాగేందర్కు వ్యక్తిగతంగా మజ్లిస్ అధినేత అసదుద్దీన్ ఒవైసీతో మంచి సంబంధాలు ఉన్నాయి. గతంలో కూడా ఖైరతాబాద్లో ఎంఐఎం పార్టీ దానానికి పరోక్షంగా సహకరించిందనే ప్రచారం ఉంది. ఇప్పుడు ఒకవేళ కాంగ్రెస్ టికెట్ నిరాకరిస్తే.. దానం నాగేందర్ ఎంఐఎం పార్టీ తరఫున ఖైరతాబాద్ ఉప ఎన్నికల బరిలోకి దిగే అవకాశాలు ఉన్నాయంటూ హైదరాబాద్ పొలిటికల్ సర్కిల్స్ లో సరికొత్త గుసగుసలు వినిపిస్తున్నాయి. మజ్లిస్ టికెట్ పై పోటీ చేస్తే అటు మైనారిటీ ఓట్లు, ఇటు తన సొంత క్యాడర్ బలంతో సులభంగా గెలవచ్చనేది దానం ప్లాన్ కావచ్చు అని విశ్లేషకులు భావిస్తున్నారు. మొత్తానికి సుప్రీంకోర్టు తీర్పుతో ఖైరతాబాద్ రాజకీయం ఆసక్తికర మలుపు తిరిగింది. ఒకవేళ దానం నిజంగానే హస్తం పార్టీకి హ్యాండ్ ఇచ్చి పతంగి ఎక్కాలని చూస్తే.. అది తెలంగాణ రాజకీయాల్లో సరికొత్త సంచలనానికి దారితీయడం ఖాయం. భవిష్యత్తులో దానం వేసే అడుగులు ఎలా ఉంటాయో చూడాలి.