తెలంగాణ అసెంబ్లీ సెక్రటేరియట్ ఖైరతాబాద్ నియోజకవర్గ స్థానాన్ని అధికారికంగా ఖాళీగా ప్రకటిస్తూ గెజిట్ నోటిఫికేషన్ విడుదల చేయడంతో హైదరాబాద్ రాజకీయాలు ఒక్కసారిగా వేడెక్కాయి. ఫిరాయింపుల నిరోధక చట్టం కింద ఎమ్మెల్యే దానం నాగేందర్పై కోర్టు అనర్హత వేటు వేయడంతో ఇక్కడ ఉప ఎన్నిక అనివార్యమైంది. ఈ క్రమంలో కాంగ్రెస్, బీఆర్ఎస్, బీజేపీలు అప్పుడే తమ వ్యూహాలకు పదును పెడుతుండగా, తెలుగుదేశం పార్టీ క్యాడర్ నుంచి మాత్రం ఒక ఆసక్తికరమైన డిమాండ్ తెరపైకి వచ్చింది. ఒకప్పుడు పార్టీకి పెట్టని కోటగా ఉన్న ఖైరతాబాద్ ఉప ఎన్నికల బరిలో టీడీపీ కచ్చితంగా పోటీ చేయాలని స్థానిక తమ్ముళ్లు పట్టుబడుతున్నారు.
ఖైరతాబాద్ నియోజకవర్గంలో తెలుగుదేశం పార్టీకి ఇప్పటికీ బలమైన సాంప్రదాయ ఓటు బ్యాంక్, క్షేత్రస్థాయి నెట్వర్క్ ఉంది. గ్రేటర్ హైదరాబాద్ పరిధిలో పార్టీ ఉనికిని చాటుకోవడానికి, క్యాడర్లో కొత్త జోష్ నింపడానికి ఈ ఉప ఎన్నిక ఒక అద్భుతమైన అవకాశమని స్థానిక తమ్ముళ్లు భావిస్తున్నారు. ఈ మేరకు అభ్యర్థిని నిలబెట్టాలంటూ హైదరాబాద్ నగర నేతలు, నియోజకవర్గ ముఖ్య కార్యకర్తలు పార్టీ అధిష్టానానికి తమ నివేదికలను కూడా పంపారు. అయితే, నోటిఫికేషన్ వచ్చి గండం ముంచుకొస్తున్నా.. అమరావతి లేదా ఎన్టీఆర్ భవన్ నుంచి ఎలాంటి స్పందన రాకపోవడం స్థానిక నేతలను తీవ్ర నిరాశకు గురిచేస్తోంది.
అధిష్టానం కనీసం ఈ విషయంపై సమీక్ష కూడా నిర్వహించకపోవడంతో కేడర్ లో అసంతృప్తి జ్వాలలు వ్యగ్యమవుతున్నాయి. అధిష్టానం మౌనం వెనుక పార్టీ అధినేత చంద్రబాబు నాయుడి పక్కా పొలిటికల్ లెక్కలు ఉన్నట్లు రాజకీయ విశ్లేషకులు భావిస్తున్నారు. కేంద్రంలో, ఆంధ్రప్రదేశ్లో కాంగ్రెస్కు వ్యతిరేకంగా బీజేపీతో టీడీపీ కూటమిగా ఉంది. మరోవైపు తెలంగాణలో అధికారంలో ఉన్న కాంగ్రెస్ ప్రభుత్వంతో చంద్రబాబు స్నేహపూర్వక సంబంధాలను కొనసాగిస్తున్నారు. ఇటువంటి అత్యంత సున్నితమైన రాజకీయ సమీకరణల నేపథ్యంలో.. ఖైరతాబాద్లో టీడీపీ ఒంటరిగా బరిలోకి దిగితే అది కూటమి ధర్మానికి ఇబ్బందిగా మారుతుందనే భయం అధిష్టానంలో ఉంది.
టీడీపీ పోటీ చేస్తే ఓట్లు చీలి, అది పరోక్షంగా బీఆర్ఎస్కు లాభం చేకూరుస్తుందా..? లేదా కాంగ్రెస్ విజయవకాశాలను దెబ్బతీస్తుందా..? అనే సందిగ్ధంలో లీడర్షిప్ ఉంది. ఏది ఏమైనప్పటికీ, మూడు ప్రధాన పార్టీలు ఇప్పటికే అభ్యర్థుల వేటలో నిమగ్నమై ప్రచారం వైపు అడుగులు వేస్తుంటే, తమ పార్టీ అధిష్టానం మాత్రం కనీసం స్పందించకపోవడంపై ఖైరతాబాద్ టీడీపీ శ్రేణులు తీవ్ర ఆగ్రహం వ్యక్తం చేస్తున్నాయి. పోరాడి ఉనికిని చాటుకోవాల్సిన తరుణంలో ఇలాంటి వ్యూహాత్మక మౌనం పార్టీ భవిష్యత్తుకే నష్టమని తమ్ముళ్లు బహిరంగంగానే చర్చించుకుంటున్నారు. మరి రాబోయే రోజుల్లో చంద్రబాబు నాయుడు స్థానిక క్యాడర్ ఒత్తిడికి తలొగ్గి ఏదైనా నిర్ణయం తీసుకుంటారా..? లేక కూటమి లెక్కలకే ప్రాధాన్యత ఇచ్చి సైలెంట్గా ఉంటారా..? అనేది చూడాలి.