ఆంధ్రప్రదేశ్లో స్థానిక సంస్థల ఎన్నికల వ్యవహారం ముందస్తుగానే హీట్ పుట్టిస్తోంది. ఉమ్మడి గోదావరి జిల్లాల రాజకీయాల్లో ప్రతిష్ఠాత్మకమైన రాజమండ్రి మున్సిపల్ కార్పొరేషన్ ఎన్నికల వేళ సరికొత్త సమీకరణాలు తెరపైకి వస్తున్నాయి. తాజాగా అమలాపురం మాజీ ఎంపీ, సీనియర్ దళిత నేత జీవీ హర్షకుమార్ కుమారుడు జీవీ శ్రీరాజ్ అమరావతిలో ముఖ్యమంత్రి, టీడీపీ అధినేత చంద్రబాబు నాయుడితో ప్రత్యేకంగా భేటీ అవ్వడం ఇప్పుడు గోదావరి పొలిటికల్ సర్కిల్స్లో హాట్ టాపిక్గా మారింది.
రాజకీయ వర్గాల్లో బలంగా వినిపిస్తున్న సమాచారం ప్రకారం, త్వరలో జరగబోయే స్థానిక ఎన్నికల్లో రాజమండ్రి కార్పొరేషన్ మేయర్ స్థానాన్ని ఆశించే శ్రీరాజ్ ఈ భేటీ జరిపినట్లు తెలుస్తోంది. రాజమండ్రి కార్పొరేషన్ మేయర్ పీఠం రిజర్వేషన్ల పరంగా ఎస్సీకి కేటాయించే అవకాశాలు ఉండటంతో, ఇక్కడి నుంచి కూటమి ఉమ్మడి అభ్యర్థిగా లేదా టీడీపీ తరఫున రేసులో నిలబడాలని ఆయన భావిస్తున్నారు. విద్యాసంస్థల అధినేతగా, యువనేతగా స్థానికంగా ఉన్న పట్టు, తండ్రి హర్షకుమార్ రాజకీయ పలుకుబడి తనకు కలిసి వస్తాయని శ్రీరాజ్ భావిస్తున్నారు.
చంద్రబాబుతో జరిగిన ఈ సుదీర్ఘ చర్చల్లో నియోజకవర్గ పరిస్థితులతో పాటు మేయర్ సీటు హామీ గురించిన ప్రస్తావన కూడా వచ్చినట్లు సమాచారం. అయితే, రాజమండ్రి మేయర్ పీఠంపై కూటమిలోని ఇతర శ్రేణుల నుంచి కూడా గట్టి పోటీ నెలకొంది. స్థానిక మున్సిపల్ ఎన్నికల వేళ సీట్ల పంపకాలపై ఇప్పటికే టీడీపీ, జనసేన స్థానిక నేతల మధ్య అంతర్గత చర్చలు సాగుతున్నాయి. ఈ నేపథ్యంలో హర్షకుమార్ కుమారుడు నేరుగా అధినేత చంద్రబాబును కలిసి తన ప్రణాళికలను వివరించడం, స్థానిక సీనియర్ తమ్ముళ్లకు కాస్త మింగుడుపడటం లేదనే గుసగుసలు వినిపిస్తున్నాయి. మరి చంద్రబాబు ఈ యువనేత ప్రతిపాదనకు గ్రీన్ సిగ్నల్ ఇచ్చి రాజమండ్రి పీఠాన్ని కేటాయిస్తారా..? లేదా స్థానిక కూటమి సమీకరణాల బట్టి నిర్ణయం మారుతుందా అనేది వేచి చూడాలి.