Tollywood: ఇండస్ట్రీ మొత్తం లాక్ డౌన్ అయింది. ఒకటి రెండు చిత్రాలు మినహా అన్నీ ఆగిపోయాయి. ఎక్కడా షూటింగ్స్ మాటే లేదు. వారం రోజులు బ్యాలెన్స్ ఉన్న సినిమాలను కూడ నిలిపివేశారు. చిన్న, పెద్ద అనే తేడా లేకుండా హీరోలందరూ ఇళ్లకే పరిమితమయ్యారు. కొందరు ఐసోలేషన్లో ఉంటున్నారు. ఇందుకు కారణం కరోనా సెకండ్ వేవ్. గత ఏడాది ప్రభుత్వం ఉత్తర్వుల మేరకు లాక్ ఇండస్ట్రీలో లాక్ డౌన్ పడగా ఈసారి స్వచ్ఛంధ లాక్ డౌన్ విధించబడింది.
ప్రజెంట్ హీరోలంతా ఖాళీగానే ఉంటున్నారు. ఇళ్లల్లో కాలక్షేపం చేస్తున్నారు. గత ఏడాది పూర్తిగా ఖాళీగా ఉండి ఈ ఏడాది రెండు మూడు నెలల వర్క్ అనంతరం మళ్ళీ సెలవులు వచ్చేశాయి. దీంతో హాలీడేస్ బోర్ కొడుతున్నాయి వాళ్లకు. మరి అంత బోర్ కొడితే కొత్త కథలు వినవచ్చు కదా అంటే అస్సలు కుదరదని అంటున్నారు.
బయట నుండి పాత, కొత్త దర్శకులు కథలు చెబుతామని అప్రోచ్ అవుతుంటే హీరోలు మాత్రం ససేమిరా అంటున్నారట. కథలు వినే ప్రసక్తే లేదని, అసలు కొత్తవారిని కలిసే ఉద్దేశ్యంలోనే లేమని చెబుతున్నారట. ఇందుకు కారణం కరోనా భయమే.