Thaman: కన్నీళ్ళతో తీసుకున్న నిర్ణయం.. చాలా గొప్పదే

Thaman: కరోనా కారణంగా సామాన్య జనం అనేక ఇబ్బందులు పడుతున్నారు. వారి ఇబ్బందులే అలా ఉంటే భిక్షాటన చేసుకునే వారి పరిస్థితి మరీ దయనీయంగా ఉంది. జనం రోడ్ల మీదకు రాకపోవడం, రాత్రి సమయంలో కర్ఫ్యూ అమలుచేస్తుండటంతో రోడ్డు పక్కనే జీవించే అన్నార్తులకు తిండి దొరకట్లేదు. చాలామంది పస్తులతోనే ఉండిపోతున్నారు. ఇలాంటివారు అన్ని చోట్లా ఉంటున్నారు. వీరి పరిస్థితి చూసి చాలామంది స్పందిస్తున్నారు. భిక్షాటన చేసేవారి కోసమే ప్రత్యేకంగా ఆహారాన్ని పంచిపెడుతున్నారు.

అలాంటి దృశ్యమే సోషల్ మీడియాలో ఒకటి దర్శనమిచ్చింది. కనీసం నీళ్ళు కూడ దొరకని స్థితిలో ఉన్న ఒక వృద్ధురాలికి ఒకతను నీళ్లు, ఆహారం అందించాడు. ఎంతో ఆశగా వాటిని అందుకున్న ఆ వృద్ధురాలు తన చీరకొంగులో దాచుకున్న 10 రూపాయల నోటు తీసి అతనికి ఇవ్వబోయింది. ఆ దృశ్యం నెటిజన్ల హృదయాలను ద్రవింపజేస్తోంది.

దాన్ని చూసిన ప్రముఖ సంగీత దర్శకుడు తమన్ చలించిపోయారు. ఆ క్షణంలోనే ఆయన ఒక నిర్ణయం తీసుకున్నారు. అదే వృద్దుల ఆశ్రమం. మీదపడిన వయసులో ఎలాంటి ఆధారం లేని వారికోసం తమన్ ఓల్డ్ ఏజ్ హోమ్ కట్టాలని అనుకుంటున్నట్టు తమన్ తెలిపారు. నీళ్లు నిండిన కళ్ళతో ఇది రాస్తున్నాను. దయచేసి నీరు, ఆహారం వృధా చేయవద్దు. అవసరం అయిన వారికి అందించండి అన్నారు. భావోద్వేగంలో తమన్ తీసుకున్న ఈ నిర్ణయం నిజంగా అభినందనీయం.