బ్యాక్ గ్రౌండ్ లేకుండా ప్రస్తుత కాలంలో గొప్ప స్థానానికి చేరుకోవడం సులువైన విషయం కాదు. అయితే సినిమాలపై ఆసక్తితో సినిమాల్లోకి ఎంట్రీ ఇచ్చిన చిరంజీవి తక్కువ సమయంలోనే మెగాస్టార్ గా ఎదిగారు. ఈతరం హీరోలు తమ జీవితకాలంలో క్రియేట్ చేయలేని ఎన్నో రికార్డులను చిరంజీవి చాలా సంవత్సరాల క్రితమే క్రియేట్ చేశారు. సీనియర్ హీరోలలో 150కు పైగా సినిమాలలో నటించిన అతికొద్ది మంది హీరోలలో చిరంజీవి ఒకరు.
చిరంజీవితో పాటు ఎంట్రీ ఇచ్చి స్టార్ స్టేటస్ ను అందుకున్న చాలామంది హీరోలు తమ జీవిత కాలంలో 100 కంటే ఎక్కువ సినిమాలలో నటించలేమని చెబుతున్నారు. ఈతరం హీరోలు అయితే 50 కంటే ఎక్కువ సినిమాలు కూడా చెయ్యడం సాధ్యం కాదని చాలమంది భావిస్తున్నారు. అయితే చిరంజీవి సినిమాల్లో సక్సెస్ సాధించిన తర్వాత ప్రజలకు సేవ చేయాలని అనుకున్నారనే సంగతి తెలిసిందే.
ప్రజలకు మంచి చేయాలనే గొప్ప ఆలోచనతో రాజకీయాల్లోకి వచ్చిన చిరంజీవి ప్రజారాజ్యం పార్టీని స్థాపించారు. సామాన్య ప్రజలకు మేలు జరగడమే లక్ష్యంగా ప్రజారాజ్యం పార్టీ మేనిఫెస్టోను ప్రకటించారు. 2009 ఎన్నికల్లో 294 అసెంబ్లీ స్థానాలలో ప్రజారాజ్యం పోటీ చేయగా 18 అసెంబ్లి స్థానాలలో ఆ పార్టీ విజయం సాధించింది. వైఎస్సార్ హవా కొనసాగుతున్న సమయంలో ఈ స్థాయిలో సీట్లు సాధించడం సులువైన విషయం కాదు.
అయితే చిరంజీవిపై ప్రజల్లో ఉన్న నమ్మకం, చిరంజీవిపై ఉన్న అభిమానం వల్ల ఈ స్థాయిలో ప్రజారాజ్యం పార్టీ సీట్లు సాధించడం సాధ్యమైంది. ఒకవేళ చిరంజీవి పార్టీని కాంగ్రెస్ లో విలీనం చేయకుండా ఉండి ఉంటే 2014 లేదా 2019 ఎన్నికల్లో ప్రజారాజ్యం పార్టీ కచ్చితంగా అధికారంలోకి వచ్చి ఉండేదని చిరంజీవి అభిమానుల నుంచి కామెంట్లు వ్యక్తమవుతున్నాయి. చిరంజీవి సీఎం అయ్యి ఉంటే ప్రజలకు మరింత మెరుగైన పాలన అంది ఉండేదని ఆయన ఫ్యాన్స్ భావిస్తున్నారు.