Star Heros: స్టార్ హీరోల సినిమా ప్రపోజల్స్ ఎప్పుడు ఎలాంటి మలుపు తిరుగుతాయో చెప్పలేం. అప్పటివరకు కలిసి పనిచేస్తారని అనుకున్న డైరెక్టర్ హీరో ఒక్కసారిగా విడిపోతారు. అస్సలు వార్తల్లో వినబడని కాంబినేషన్స్ కుదిరేస్తుంటాయి. ఒక హీరో ఒక దర్శకుడితో వర్క్ చేయాలని నెలల నుండి ఎదురుచూస్తూ ఉంటాడు. తీరా చర్చలకు కూర్చున్నాక కథ నచ్చకపోవడమో, వేరే ఇతర కారణాల వలనో వారు షేక్ హ్యాండ్స్ ఇచ్చుకుని వెళ్లిపోతుంటారు. ఆప్పటివరకు అదిగో అప్పుడు మొదలవుతుంది ఇప్పుడు మొదలవుతుంది అంటూ సంబరపడిపోయిన అభిమానులకు తీవ్రమైన నిరాశలు తప్పవు.
ప్రస్తుతం టాలీవుడ్లో కొన్ని క్రేజీ కాంబినేషన్స్ వినబడుతున్నాయి. మహేష్ బాబు రాజమౌళి దర్శకత్వంలో ఒక సినిమా చేస్తారని గట్టి టాక్ నడుస్తోంది. అల్లు అర్జున్, ప్రశాంత్ నీల్ సినిమా చర్చలు నడుస్తున్నాయని అంటున్నారు. ప్రభాస్, సందీప్ వంగ ప్రాజెక్ట్ చాలా రోజుల నుండి చర్చల్లో ఉంది. ఇలాంటి కాంబినేషన్స్ ఇంకో రెండు మూడు ఉన్నాయి. అయితే ఇవన్నీ ఏమేరకు వర్కవుట్ అవుతాయి, సెట్స్ మీదకు వెళ్లే అవకాశాలు ఎంతవరకు ఉన్నాయి అనేది గాలిలో దీపం లాంటి విషయాలే అనాలి.
ఎందుకంటే ఇప్పటివరకు ఈ కాంబినేషన్ల గురించి అధికారిక ప్రకటన ఏదీ వెలువడలేదు. కొన్ని నిజంగానే చర్చల దశలో ఉన్నా నిజమవుతాయనే నమ్మకం లేదు. ఉదాహరణకు బన్నీ, ప్రశాంత్ నీల్ ప్రాజెక్ట్. ఈ సినిమా ఉండకపోవచ్చనేది ప్రజెంట్ టాక్. అలాగే మహేష్,రాజమౌళి కాంబినేషన్. వినడానికి క్రేజీగానే ఉన్నా నిజమవుతుందని ఇండస్ట్రీ వర్గాలు చెప్పలేకపోతున్నాయి.