Nani Vs Pawan Kalyan : జనసేన అధినేతే అయి వుండొచ్చు.. కానీ, సినీ నటుడిగా సినీ పరిశ్రమలోని సమస్యల్ని గట్టిగా ప్రస్తావించారు కొన్నాళ్ళ క్రితం ‘రిపబ్లిక్’ సినిమా ప్రీ రిలీజ్ వేడుకలో పవన్ కళ్యాణ్. కానీ, అప్పట్లో పవన్ కళ్యాణ్ ఆ వేదికపైనే రాజకీయ విమర్శలు కూడా చేయడంతో, అప్పట్లో పెను దుమారం రేపింది.
ఆ సమయంలో పవన్ కళ్యాణ్ వ్యాఖ్యల్ని సమర్థించాడు నాని. తన తాజా సినిమా ‘శ్యామ్ సింగరాయ్’ విషయంలో నాని ఒకింత ఆవేదన వ్యక్తం చేయడం మళ్ళీ చర్చనీయాంశమయ్యింది. అయితే, నాని చేసిన వ్యాఖ్యల్లో తప్పేమీ లేదంటూ, నానికి మద్దతుగా ప్రముఖ నిర్మాత దిల్ రాజు రంగంలోకి దిగారు.
మరి, తాను అమితంగా అభిమానించే పవన్ కళ్యాణ్ విషయంలో దిల్ రాజు ఎందుకిలా మద్దతు పలకలేకపోయారు.? అన్నదిప్పుడు చర్చనీయాంశంగా మారింది. దిల్ రాజు, ప్రస్తుతం తెలుగు సినీ పరిశ్రమలో ప్రముఖ నిర్మాత.. అలాగే, కీలకమైన నిర్మాత కూడా. కీలకమైన.. అని ఎందుకు అనాల్సి వస్తోందంటే, తెలుగు రాష్ట్రాల్లోని ప్రభుత్వాలతో సత్సంబంధాలు కలిగి వున్నారు గనుక.
ఏదన్నా సినిమా వివాదంలో ఇరుక్కుంటే, దాన్ని డీల్ చేయడానికి అందరికన్నా ముందు దిల్ రాజే రంగంలోకి దిగుతారు. కేవలం నిర్మాత మాత్రమే కాదు, దిల్ రాజు పంపిణీదారుడు కూడా. ఆయన చేతిలో బోల్డన్ని థియేటర్లు కూడా వున్నాయి. ఇవన్నీ ఆయన్ను పరిశ్రమ ప్రముఖుల్లో ఒకరిగా, పరిశ్రమ పెద్దలో ఒకరిలా మార్చాయి.
సరే, ఆంధ్రప్రదేశ్ ప్రభుత్వం సినీ పరిశ్రమపై అక్కసు వెల్లగక్కుతోందా.? కక్ష సాధింపు చర్యలకు దిగుతోందా.? అన్నది వేరే చర్చ. పవన్ విషయంలో ఇంతలా స్పందించని దిల్ రాజు, నాని విషయంలో స్పందించడమే అందర్నీ విస్మయానికి గురిచేస్తోంది. మరీ ముఖ్యంగా పవన్ అభిమానుల్ని షాక్కి గురిచేస్తోంది. అన్నట్టు, పవన్ అభిమానులు నానికి మద్దతిస్తోన్న సంగతి తెలిసిందే.