Niharika: టాలీవుడ్ హీరో నిర్మాత మెగా బ్రదర్ నాగబాబు గురించి మనందరికీ తెలిసిందే. ఆయన కూతురు కొణిదెల నిహారిక గురించి కూడా ప్రత్యేకంగా చెప్పనక్కర్లేదు. మెగా ఫ్యామిలీ నుంచి సినిమా ఇండస్ట్రీకి ఎంట్రీ ఇచ్చిన ఏకైక హీరోయిన్ నిహారిక. ఇంట్లో అందర్నీ ఎదిరించి మరీ సినిమా ఇండస్ట్రీకి ఎంట్రీ ఇచ్చిన ఈమె మొదట యాంకర్ గా కెరియర్ ను మొదలు పెట్టింది. ఆ తర్వాత హీరోయిన్ గా ఎంట్రీ ఇచ్చింది. మొదట్లో మంచి విజయం సాధించినప్పటికీ ఆ తర్వాత ఈమె నటించిన సినిమాలు ఆశించిన స్థాయిలో గుర్తింపు తెచ్చుకోలేకపోయాయి. అలాగే నిర్మాతగా కూడా కొన్ని సినిమాలు, వెబ్ సిరీస్ లు నిర్మించి సక్సెస్ అయ్యింది. ముఖ్యంగా గత ఏడాది నిహారిక నిర్మించిన మొదటి సినిమా కమిటీ కుర్రోళ్లు సినిమా కూడా సూపర్ హిట్ అయ్యింది.
ఇటీవల తెలంగాణ ప్రభుత్వం ప్రతిష్ఠాత్మకంగా ప్రదానం చేసిన గద్దర్ అవార్డుల్లోనూ ఈ సినిమాకు పురస్కారాలు వచ్చాయి. అయితే ప్రొఫెషనల్ లైఫ్ లో సక్సెస అయిన నిహారిక పర్సనల్ లైఫ్ లో మాత్రం ఒడిదొడుకులు ఎదుర్కొంది. 2020లో జొన్నలగడ్డ చైతన్యను వివాహం చేసుకుంది. రాజస్థాన్ లోని ఉదయపూర్ లో వీరి వివాహం అంగరంగ వైభవంగా జరిగింది. కానీ వీరి కాపురం మూడు రోజుల ముచ్చటే అయింది. ఇద్దరి మధ్య భేదాభిప్రాయాలు తలెత్తాయి. దీంతో 2023లో పరస్పర అంగీకారంతో నిహారిక, చైతన్య విడాకులు తీసుకున్నారు. ఇక అప్పటినుంచి నిహారిక సింగిల్ గానే ఉంటోంది. అప్పుడప్పుడూ ఆమె రెండో పెళ్లి చేసుకుంటుందన్న వార్తలు గుప్పుమంటున్నాయి. ఈ వార్తలపై నిహారిక తండ్రి నాగబాబు స్పందించారు. ఈ సందర్భంగా నాగబాబు మాట్లాడుతూ..
నిహారిక, నేను అన్ని విషయాలు ఓపెన్ గా మాట్లాడుకుంటాం. అలా అనీ నేను పిల్లల కెరీర్‌ విషయాల్లో తలదూర్చను. నా పిల్లల హిట్స్‌, ఫ్లాప్‌ గురించి నాకవసరం లేదు. వాళ్లు సంతోషంగా ఉన్నారా? లేదా? అన్నదే ముఖ్యం. వాళ్లు ఆనందంగా లేకపోతే ఎన్ని కోట్లున్నా వృథానే! వరుణ్‌.. లావణ్యను పెళ్లి చేసుకుంటానని నా దగ్గరకు వచ్చి అడిగినప్పుడు.. ఆమెతో నువ్వు హ్యాపీగా ఉంటావా? భవిష్యత్తులో ఎలాంటి సమస్యలు రావు కదా? అన్నాను. లేదు, హ్యాపీగా ఉంటాం అని అన్నాను. సరేనని పెళ్లి జరిపించాము. వాడి జడ్జిమెంట్‌ కరెక్ట్‌ అయింది. ఇప్పుడు వారిద్దరూ సంతోషంగా ఉన్నారు. కానీ నిహారిక పెళ్లి విషయంలో నా జడ్జిమెంట్‌ రాంగ్ అయ్యింది. అలా అని తనకు ఇష్టం లేని పెళ్లి జరిపించలేదు. తను సంబంధం ఓకే అన్నాకే ముందుకు వెళ్లాం. కానీ.. తనకు, అబ్బాయికి సింక్‌ అవ్వలేదు. పరస్పర అంగీకారంతో విడాకులు తీసుకుని విడిపోయారు. ఇప్పుడిప్పుడే నిహారిక ఇందులో నుంచి తేరుకుంటోంది. కానీ ఏదో ఒక రోజు నిహారిక వేరే.. అబ్బాయిని పెళ్లి చేసుకుంటుందనుకుంటున్నాను. వారి విషయాలలో ఇన్వాల్వ్ కావాలని అనుకోవడం లేదు. పిల్లలకు నచ్చినట్లుగా జీవించాలని కోరుకుంటాను అని చెప్పుకొచ్చారు నాగబాబు. ఈ సందర్భంగా నాగబాబు చేసిన వ్యాఖ్యలు సోషల్ మీడియాలో వైరల్ గా మారాయి.