Band Melam: నాచురల్ స్టార్ నాని నిర్మించిన మూవీ కోర్ట్. ఈ సినిమాకు కొత్త దర్శకుడు రామ్ జగదీష్ దర్శకత్వం వహించిన విషయం తెలిసిందే. ఎటువంటి అంచనాలు లేకుండా చిన్న సినిమాగా విడుదల అయిన ఈ సినిమా ఎంతటి విజయాన్ని సాధించిందో మనందరికీ తెలిసిందే. భారీ అంచనాల నడుమ విడుదల అయిన ఈ సినిమా బ్లాక్ బస్టర్ హిట్గా నిలవడంతో పాటుగా కలెక్షన్ల వర్షం కురిపించింది. ఫోక్సో చట్టం బ్యాక్డ్రాప్ లో వచ్చిన ఈ కోర్ట్ రూమ్ డ్రామా ఆడియన్స్ ను విపరీతంగా ఆకట్టుకుంది.
ఈ సినిమా యువతకు బాగా కనెక్ట్ అయ్యింది. ఈ సినిమాలో హర్ష రోషన్, శ్రీదేవి జంటగా నటించిన విషయం తెలిసిందే. సినిమాలో కథ ఎంత బలంగా ఉన్నా నటీనటులు కూడా అంతే బలంగా ఆ పాత్రలను పోషించాలి. ఆ విషయంలో హర్ష రోషన్, శ్రీదేవి అద్భుతం అనే చెప్పాలి. ఈ ఇద్దరు తమ సహజమైన నటనతో సినిమా విజయంలో కీలక పాత్ర పోషించారు. దాంతో ఈ జోడీపై ఆడియన్స్ లో మంచి అంచనాలే ఉన్నాయి. వీరిద్దరి కాంబోలో మరిన్ని సినిమాలు రావాలని ప్రేక్షకులు సైతం కోరుకుంటున్నారు. అయితే ఇప్పుడు ఆ అంచనాలను నిజం చేయడానికి ఈ జంట మరోకొత్త సినిమాతో ప్రేక్షకుల ముందుకు రానుంది.
అదే బ్యాండ్ మేళం. దర్శకుడు సతీష్ జవ్వాజి తెరకెక్కిస్తున్న ఈ సినిమా నుంచి తాజాగా టైటిల్ గ్లింప్స్ రిలీజ్ చేశారు మూవీ మేకర్స్. రాజమ్మ అంటూ యాదగిరి పిలిచే పిలుపుతో ఈ గ్లింప్స్ మొదలయ్యింది. తరువాత బావ మరదళ్ల సంభాషణతో సాగింది. నీ కోసం కొత్త ట్యూన్ చేసిన అని యాదగిరి అనగా.. నాకోసమా.. సరే షురూ జెయ్.. అని రాజమ్మ అంటుంది. ఈ యాదగిరి వాయిస్తే బోనగిరి దాకా ఇనిపిస్తది చూడు.. అంటాడు. పక్కా తెలంగాణ యాసలో సాగిన ఈ సంభాషణ ఆడియన్స్ ను ఆకట్టుకుంది. కాగా ఈ గ్లింప్స్ కి విజయ్ బుల్గానిన్ అందించిన మ్యూజిక్ కూడా అద్భుతంగా ఉంది. కోర్ట్ సినిమాకి కూడా విజయ్ బుల్గానిన్ తన సోల్ ఫుల్ మ్యూజిక్ తో మ్యాజిక్ చేశాడు. ఇపుడు మరోసారి ఈ ముగ్గురు ఆ మ్యాజిక్ ని రిపీట్ చేసేందుకు మనముందుకు వస్తున్నారు. ఇప్పటికే షూటింగ్ స్టార్ట్ అయిన ఈ సినిమా త్వరలోనే ప్రేక్షకుల ముందుకు రానుంది.