చికోటి ప్రవీణ్ ఎవరో తెలుసు కదా.? తెలుగు రాష్ట్రాల్ని ఓ కుదుపు కుదిపేస్తున్నాడీ కాసినో కింగ్. ఎన్ఫోర్స్మెంట్ డైరెక్టరేట్ ఇటీవల చికోటి ప్రవీణ్ సహా ఆయన సన్నిహితుల ఇళ్ళు, కార్యాయాలపై దాడులు నిర్వహించింది. అక్రమంగా కాసినోలు నిర్వహిస్తూ, సెలబ్రిటీలకు కోట్లు చెల్లిస్తూ.. అక్రమార్జనకు పాల్పడుతున్నాడనీ, మనీ లాండరింగ్ అనీ.. ఇంకోటేదో అనీ.. చాలా ఆరోపణలు చికోటి ప్రవీణ్ మీద వస్తున్నాయి.
కానీ, చికోటి ప్రవీణ్ మాత్రం చాలా తాపీగా, కులాసాగా కనిపిస్తున్నాడు. ఈడీ విచారణకు హాజరయ్యాడు. ఈడీ అడిగిన సమాచారాన్ని తనకు తెలిసినంతమేరకు ఇచ్చాడట. ఈడీ కేసులు ఎప్పుడు తేలాలి గనుక.? బహుశా అదే ధీమా చికోటి ప్రవీణ్లోనూ వున్నట్టుంది.
తెలుగు రాష్ట్రాల్లో వివిధ రాజకీయ ప్రముఖులతోనూ, స్వామీజీలతోనూ, సినీ సెలబ్రిటీలతోనూ మనోడికి సన్నిహిత సంబంధాలున్నాయి. ఈ క్రమంలో పెద్ద రాజకీయ దుమారమే చెలరేగింది. అంతే, రాత్రికి రాత్రి చికోటి ప్రవీణ్.. మీడియా దృష్టిలో ఓ స్టార్ అయిపోయాడు. యూ ట్యూబ్ ఛానళ్ళు, న్యూస్ ఛానళ్ళు ఎగబడుతున్నాయి చికోటి ప్రవీణ్ ఇంటర్వ్యూల కోసం.
అలా మీడియా చేస్తోన్న కొన్ని ఇంటర్వ్యూల్లో, ‘రాజకీయాల్లోకి వచ్చేదెప్పుడు.?’ అని అడిగేశాడో జర్నలిస్ట్. అంతే, జనం అవాక్కయ్యారు. తొండ ముదిరితే ఊసరవెల్లి.. అలాగే, దోపిడీదారుడు ముదిరితే రాజకీయాల్లోకి.. అనే భావన బహుశా మీడియాలో బాగా బలపడిపోయినట్టుంది.
ముందు ముందు రేపిస్టుల్ని కూడా ఇలాగే ‘రాజకీయాల్లోకి వచ్చేదెప్పుడు.?’ అని కులాసాగా న్యూస్ ఛానళ్ళకు చెందిన జర్నలిస్టులు ప్రశ్నించేస్తారేమో. ‘నాకైతే రాజకీయాల్లోకి వచ్చే ఉద్దేశ్యం లేదు’ అని చెప్పాడు చికోటి ప్రవీణ్. ఇక్కడికి ఇలా సంతోషపడాల్సిందే.