ఆంధ్రప్రదేశ్ లో 2024 సార్వత్రిక ఎన్నికల సమయంలో టీడీపీ, బీజేపీ, జనసేన నేతృత్వంలోని కూటమి ఇచ్చిన హామీల సంగతి ప్రత్యేకంగా చెప్పనవసరం లేదు. ఇందులో ప్రధానంగా నిరుద్యోగులకు నెల నెలా రూ.3,000.. ప్రతీ మహిళకు నెలకు రూ.1,500 ఆర్థిక సాయం అందిస్తారని హామీ ఇచ్చిన సంగతి తెలిసిందే. వాస్తవానికి 2014లో కూడా చంద్రబాబు యువతకు నిరుద్యోగ భృతి హామీ ఇచ్చి, అధికారంలోకి వచ్చిన తర్వాత దాన్ని తుంగలోకి తొక్కారు.
ఆ తర్వాత జరిగిన ఎన్నికల్లో ఏపీ ప్రజానికం టీడీపీకి బిగ్ షాక్ ఇచ్చి.. 23 స్థానాలకు పరిమితం చేసింది. ఒంటరిగా పోటీ చేసి గెలిచిన వైసీపీ రికార్డ్ స్థాయిలో 151 సీట్లలో విజయం సాధించింది. అయితే… 2024 ఎన్నికల్లో చంద్రబాబు & కో మరోసారి నిరుద్యోగ భృతి హామీ ఇచ్చారు. ఇదే క్రమంలో మహిళలకు నెలకు రూ.1,500 ఇస్తామని నమ్మబలికారు.
కట్ చేస్తే… అధికారంలోకి వచ్చిన తర్వాత నిరుద్యోగ భృతి టాపిక్కే లేదు.. అదేవిధంగా మహిళలకు ఇచ్చే డబ్బులు గురించి అడిగితే… మంత్రి అచ్చెన్నాయుడు చేసిన వ్యాఖ్యల గురించీ తెలిసిందే. బడ్జెట్ పై అవగాహన అనేది ఎన్నికల్లో ఊకదంపుడు హామీలు ఇచ్చినప్పుడు తెలియదా అనే ప్రశ్నకు.. తప్పించుకు తిరుగువాడు ధన్యుడు సుమతీ అనేది పాలకుల ఎంపికగా ఉంటుంది.
ఇక త్వరలో పశ్చిమ బెంగాళ్ లో జరగనున్న ఎన్నికలకు సంబంధించి బీజేపి ఎన్నికల మ్యానిఫెస్టోను విడుదల చేసింది. అయితే… తాజాగా ఏపీ ఎన్నికల్లో హామీ ఇచ్చి గాలికి వదిలేసి.. మహిళలకు నెల నెలా ఆర్థిక సాయం, నిరుద్యోగ భృతి వంటి హామీలను మరోసారి తెరపైకి తెచ్చింది. తాజాగా మ్యానిఫెస్టోను విడుదల చేసిన కేంద్ర హోంమంత్రి అమిత్ షా… నిరుద్యోగ యువతకు నెలకు రూ.3వేలు, మహిళలకు ప్రతినెలా రూ.3వేలు ఆర్థిక సాయం అని ప్రకటించేశారు.
ఏపీలో జనాలకు కూటమి ఇవే హామీలతో హ్యాండ్ ఇచ్చింది కదా.. ఆ హామీలను అమలు చేయడం సాధ్యం కాదని చెబుతూ.. తమదైన చిత్తశుద్ధిని నిరూపించుకుంది కదా.. మళ్లీ తిరిగి వెస్ట్ బెంగాళ్ లో ఆ హామీలనే ఎలా ఇస్తారు..? ఇది ప్రజలను నమ్మించి మోసం చేయడం కాదా..? అని పలువురు పాపం అమాయకంగా ప్రశ్నిస్తున్నారు! రాజకీయ నాయకుల అవకాశవాద విషయాలు చాలా మందికి అర్ధం కాక అదేపనిగా ఆలోచిస్తున్నారు!
అలా అని ఆంధ్రప్రదేశ్ కంటే పశ్చిమ బెంగాళ్ రాష్ట్రం భారీ ధనిక రాష్ట్రం ఏమీ కాదు సుమా..! 2026 ఫిబ్రవరిలో ప్రవేశపెట్టిన 2026-27 ఆర్థిక సంవత్సరానికి పశ్చిమ బెంగాల్ అంచనా బడ్జెట్ కేటాయింపు 4,06,000 కోట్లు కాగా… అదే ఆర్థిక సంవత్సరానికి ఏపీ ప్రవేశ పెట్టిన బడ్జెట్… రూ.3,32,205.34 కోట్లు.
అంటే… ఏపీతో పోలిస్తే పశ్చిమ బెంగాళ్ భారీ ధనిక రాష్ట్రం ఏమీ కాదనే చెప్పాలి! కానీ… అక్కడ నిరుద్యోగ భృతి, మహిళలకు నెల నెలా ఆర్థిక సాయం వంటి హామీలు బీజేపీ నుంచి వచ్చాయి. రేపు ఒక వేళ వారు భావిస్తున్నట్లు ఆ రాష్ట్రంలో అధికారంలోకి వస్తే… ఈ రెండు హామీలను కచ్చితంగా నెరవేరుస్తారా.. లేక, ఏపీ తరహాలో కబుర్లు చెప్పి తప్పించుకుంటారా అనేది వేచి చూడాలి. ఏది ఏమైనా.. ఎన్నికల్లొ నేతలు ఇచ్చే హామీలు, వాటిని నెరవేర్చే విషయంలో చిత్త శుద్ధి చాలా ముఖ్యమని గుర్తు చేస్తున్నారు పరిశీలకులు. అలాకానిపక్షంలో.. కొంతమంది రాజకీయ నాయకుల మాటలు నీటమీద రాతలు అనే నానుడి మరింతగా బలపడే అవకాశం ఉంటుంది.