Minister Balineni: మంత్రి బాలినేని శ్రీనివాస్ రెడ్డి అనుచరులిద్దరి మధ్య గొడవ జరిగింది. ఒకరేమో బాలినేని తరఫున వకాల్తా పుచ్చుకుంటే, ఇంకొకరిపై బాలినేనికి వ్యతిరేకంగా వ్యవహరించాడన్న ఆరోపణలున్నాయి. బాధితుడిపేరు సుబ్బారావు గుప్తా కాగా, దాడి చేసిన వ్యక్తి సుభానీ. సుబ్బారావు గుప్తా టీడీపీ నేత జనార్ధన్ ప్రోద్భలంతో ముఖ్యమంత్రి వైఎస్ జగన్ మోహన్ రెడ్డిపైనా, మంత్రి బాలినేనిపైనా, మరో మంత్రి కొడాలి నాని, ఎమ్మల్యేలు అంబటి రాంబాబు, వల్లభనేని వంశీపైనా విమర్శలు చేశాడని అంటున్నారు.
సరే, కారణమేదైనాగానీ, సుబ్బారావు గుప్తాపై దాడి సమర్థనీయం కాదు. సుబ్బారావుపై దాడి చేసిన సుభానీ, దాడి వ్యవహారం మొత్తాన్నీ సెల్ ఫోన్ కెమెరాలో చిత్రీకరించి, ఎవరికో చూపించారు.. సుబ్బారావుతో మోకాళ్ళ మీద కూర్చోబెట్టించి మరీ క్షమాపణ చెప్పించడం కలకలం రేపుతోంది.
మంత్రి బాలినేని ఈ వ్యవహారంపై స్పందిస్తూ, తాము ఎప్పుడూ దాడుల్ని ప్రోత్సహించబోమనీ, దాడి చేస్తారని తెలిసి.. దాన్ని ఆపేందుకు ప్రయత్నించానని అన్నారు. కానీ, దాడి జరిగింది. అత్యంత కిరాతకంగా సుభానీ అనే వ్యక్తి దాడి చేశాడు. ఓ లాడ్జిలో సుబ్బారావు వుండడం తెలుసుకున్న సుభానీ, తన అనుచరుల్ని వెంటేసుకుని వెళ్ళి బూతులు తిడుతూ దాడి చేశాడు.
ఇంతకీ, ఈ వ్యవహారంపై పోలీసులు ఏం చేస్తున్నట్టు.? ఇప్పటికే ఈ ఘటనకు సంబంధించిన వీడియో వైరల్ అయ్యింది గనుక, పోలీసులు రంగంలోకి దిగుతారేమో. మంత్రి బాలినేని స్వయంగా ఈ ఘటనపై విచారణకు ఆదేశించి వుంటే బావుండేదేమో. ఎందుకంటే, ఇలాంటి చర్యలు, పార్టీకి అప్రతిష్ట తెచ్చిపెడతాయి.. ప్రభుత్వానికీ అప్రతిష్ట తీసుకొస్తాయి.