Nani: నాచ్యురల్ స్టార్ నాని చేస్తున్న సినిమాల్లో ‘శ్యామ్ సింగరాయ్’ భారీ చిత్రం. నాని కెరీర్లోనే అత్యంత భారీ వ్యయంతో ఈ సినిమా తెరకెక్కుతోంది. సుమారు 40 కోట్లు ఖర్చు పెడుతున్నారట నిర్మాతలు. సినిమా కలకత్తా నేపథ్యంలో ఉండటం, కాస్త పిరియాడిక్ టచ్ ఉండటంతో సెట్టింగ్స్ ఎక్కువ మొత్తం పెట్టాల్సి వస్తోంది.
హైదరాబాద్ శివార్లలో వేసిన సెట్ ఖరీదే ఆరున్నర కోట్లు అంటున్నారు. దీన్నిబట్టి సినిమాకు ఏ లెవల్లో డబ్బు పోస్తున్నారో ఊహించవచ్చు. జేబులో డబ్బులుంటే ఖర్చు పెట్టడం ఈజీనే. మరి పెట్టిన డబ్బు, దాన్ని మీద ఆదాయం తేవడమే అసలు సిసలు కష్టం.
ఇప్పుడు 40 కోట్లు పెడితే అంత మొత్తాన్ని వెనక్కి రాబట్టగల స్టామినా నానికి ఉందా లేదా అనేదే పెద్ద ప్రశ్న. నాని ట్రాక్ రికార్డ్, మార్కెట్ స్థాయిని బట్టి 40 కోట్లు అంటే చాలా కష్టమే అంటున్నారు ట్రేడ్ నిపుణులు. సినిమా భారీ విజయాన్ని అందుకున్నా అంత వసూళ్ళు డౌటే అంటున్నారు. మరోవైపు 40 కోట్లలో ఇప్పటికే 30 కోట్లు వెనక్కి వచ్చేలా ఉందని టాక్ నడుస్తోంది.
సినిమా యొక్క నాన్ థియేట్రికల్ రైట్స్ అంటే శాటిలైట్, డిజిటల్ హక్కులే 30 కోట్లు పలుకుతున్నాయని, ఇక థియేట్రికల్ హక్కులు కూడ అమ్మితే నిర్మాతలకు భారీగా లాభాలు మిగులుతాయని ప్రచారం జరుగుతోంది. మరి ఈ ప్రచారం నిజమేనా.. నిజమే అయితే నాని మీద అంత పెద్ద మొత్తం ఇస్తున్న ఆ సంస్థలు ఏవి అనేది చూడాలి. లేకపోతే ఇది సినిమా మీద హైప్ క్రియేట్ చేయడానికి జరుగుతున్న ప్రచారమా అనేది తెలియాలి.