సినిమా హిట్ కావాలంటే భారీ యాక్షన్ కావాలా? వందల కోట్ల బడ్జెట్ ఉండాలా? పాన్ ఇండియా హంగులు తప్పనిసరా? సూర్య నటించిన ‘విశ్వనాథ్ & సన్స్’ మాత్రం మరో లెక్క చెబుతోంది.
ఆగస్టు 14న విడుదలైన ఈ ఫ్యామిలీ డ్రామా నాలుగు రోజుల్లోనే ప్రపంచవ్యాప్తంగా రూ.150 కోట్లకు పైగా గ్రాస్ సాధించినట్లు చిత్ర బృందం ప్రకటించింది. అయితే ఈ సినిమా విజయాన్ని కేవలం సూర్య స్టార్డమ్తోనే చూడలేం. సినిమా వెనుక తీసుకున్న కొన్ని నిర్ణయాలు ఇప్పుడు ఆసక్తికరంగా మారాయి.
కమర్షియల్ హంగుల కంటే కథకే ప్రాధాన్యం
‘విశ్వనాథ్ & సన్స్’ కథలో కావాలని కామెడీ ట్రాక్స్, కమర్షియల్ ఎలిమెంట్స్ జోడించే ప్రయత్నం చేయలేదు.40 ఏళ్లు వచ్చినా పెళ్లి చేసుకోని ఒక వ్యక్తి.. దాని వెనుక ఉన్న కారణం.. కుటుంబంలో ఏర్పడే పరిస్థితులు.. ప్రధానంగా వీటి చుట్టూనే కథను నిర్మించారు. మనుషులు చెడ్డవారు కాదు.. పరిస్థితులే వారిని ఒక్కోలా ప్రవర్తించేలా చేస్తాయి అనే ఆలోచనే కథకు మూలంగా కనిపిస్తోంది.
అందుకే పాత్రలను హీరో–విలన్లుగా విభజించడం కంటే, ప్రతి పాత్ర వైపు నుంచి కథను చూపించే ప్రయత్నం జరిగింది. ముఖ్యంగా క్లైమాక్స్లో ఏ పాత్రను తక్కువ చేయకుండా చూసుకోవడం సినిమాకు ప్లస్ అయినట్లు తెలుస్తోంది.
సూర్య కోసం పుట్టిన కథ కాదు!
మరో ఆసక్తికర విషయం ఏమిటంటే.. ఈ కథ మొదట సూర్యను దృష్టిలో పెట్టుకుని రాసింది కాదు. 2022లోనే కథకు రూపం వచ్చింది. తర్వాత సూర్య కథలోకి వచ్చిన అనంతరం ఆయన బాడీ లాంగ్వేజ్కు సరిపోయేలా కొన్ని మార్పులు చేశారు. అప్పటికే సూర్య కూడా ఒక మంచి ఫ్యామిలీ స్టోరీ చేయాలని చూస్తుండటం ఈ ప్రాజెక్ట్కు కలిసొచ్చింది. ఫలితంగా స్టార్ హీరో ఇమేజ్ కోసం కథను మార్చడం కాకుండా, కథలోకి స్టార్ను తీసుకురావడం జరిగింది.
తెలుగు ప్రేక్షకులు ఎందుకు ఎక్కువగా కనెక్ట్ అయ్యారు?
‘విశ్వనాథ్ & సన్స్’ విషయంలో మరో ఆసక్తికర అంశం తెలుగు మార్కెట్. సూర్య తమిళ స్టార్ అయినప్పటికీ, చిత్ర బృందం చెబుతున్న వివరాల ప్రకారం ప్రస్తుతం తెలుగు రాష్ట్రాల్లో సినిమా వసూళ్లు బలంగా ఉన్నాయి. తమిళనాడుతో పోలిస్తే తెలుగు రాష్ట్రాల్లో థియేటర్ల సంఖ్య, టికెట్ ధరలు వంటి అంశాలు ప్రారంభ వసూళ్లపై ప్రభావం చూపుతాయి. తమిళ మార్కెట్లో సినిమాలకు లాంగ్ రన్ ఉండే అవకాశం కూడా ఎక్కువ. అయితే ఒక తమిళ స్టార్ నటించిన ఫ్యామిలీ సినిమా తెలుగు ప్రేక్షకులకు ఈ స్థాయిలో కనెక్ట్ కావడం మాత్రం గమనించాల్సిన విషయం.
మమితా బైజు ఎంపిక వెనుక కూడా లెక్క ఉంది
‘ప్రేమలు’ తర్వాత మమితా బైజుకు యువ ప్రేక్షకుల్లో మంచి గుర్తింపు వచ్చింది. కానీ ఈ సినిమాలో ఆమె ఎంపికకు పాపులారిటీ ఒక్కటే కారణం కాదు. కామెడీ టైమింగ్కు భాషపై పట్టు అవసరం కావడం, తమిళం కూడా తెలిసి ఉండటం ఆమెకు ప్లస్ అయింది. సూర్యలాంటి స్టార్ పక్కన హీరోయిన్ పాత్ర కేవలం గ్లామర్కు పరిమితం కాకుండా కథలో సహజంగా కనిపించడం కూడా ఫ్యామిలీ డ్రామాకు ఉపయోగపడింది.
ఇంటి సెట్ కూడా ఒక క్యారెక్టర్లా..
ఫ్యామిలీ కథల్లో ఇల్లు కేవలం లొకేషన్ కాదు. కథలోని సంబంధాలు, జీవనశైలి అక్కడే కనిపిస్తాయి. అందుకే ‘విశ్వనాథ్ & సన్స్’లో ఇంటి డిజైన్పై ప్రత్యేకంగా పని చేశారు. రిచ్గా కనిపిస్తూనే రెగ్యులర్ సినిమా సెట్లా అనిపించకుండా కొత్త విజువల్ టోన్ తీసుకురావడానికి ప్రయత్నించారు. సినిమా ఆర్ట్ వర్క్ గురించి ప్రత్యేకంగా చర్చ జరగడానికి ఇదే కారణంగా కనిపిస్తోంది.
ఎడిటింగ్ టేబుల్ దగ్గర మరో కీలక నిర్ణయం
షూట్ చేసిన ప్రతి సీన్ సినిమాలో ఉండాల్సిందే అనే ఆలోచనను పక్కన పెట్టడం కూడా ఈ సినిమా విషయంలో కీలకంగా మారింది. ఎడిటర్కు స్వేచ్ఛ ఇచ్చి, కథకు అవసరం లేని భాగాలను తొలగించడం ద్వారా ఫైనల్ అవుట్పుట్ను మరింత షార్ప్ చేసినట్లు తెలుస్తోంది. ఫ్యామిలీ డ్రామాల్లో కథనం నెమ్మదిస్తే ప్రేక్షకుడు త్వరగా డిస్కనెక్ట్ అయ్యే అవకాశం ఉంటుంది. అందుకే ఇలాంటి సినిమాల్లో ఎడిటింగ్ మరింత కీలకం.
మళ్లీ ఫ్యామిలీ సినిమాల టైమ్ వచ్చిందా?
అసలు ‘విశ్వనాథ్ & సన్స్’ విజయం లేవనెత్తుతున్న పెద్ద ప్రశ్న ఇదే. గత కొన్నేళ్లుగా భారీ యాక్షన్, క్రైమ్, థ్రిల్లర్, పాన్ ఇండియా సినిమాల మధ్య సింపుల్ ఫ్యామిలీ డ్రామాల సంఖ్య తగ్గింది. కానీ ప్రేక్షకులకు ఆ జానర్పై ఆసక్తి తగ్గిందని దీని అర్థం కాదేమో.
సహజమైన హాస్యం, కుటుంబ సంబంధాలు, బలమైన ఎమోషన్తో మంచి సినిమా వస్తే కుటుంబ ప్రేక్షకులు ఇప్పటికీ థియేటర్లకు వస్తారనే సంకేతాన్ని ‘విశ్వనాథ్ & సన్స్’ ఇస్తోంది. అందుకే ఈ సినిమా విజయం సూర్యకు మరో హిట్ మాత్రమే కాదు. “ఫ్యామిలీ సినిమాలకు మార్కెట్ ఉందా?” అనే ప్రశ్నకు టాలీవుడ్కు దొరికిన మరో సమాధానంగా కూడా దీనిని చూడొచ్చు.