The Great Pre wedding Show: హీరో తిరువీర్ గురించి మనందరికీ తెలిసిందే. మసూద సినిమాతో మంచి గుర్తింపు తెచ్చుకున్నారు హీరో తిరువీర్. కాగా ఈయన హీరోగా నటించిన లేటెస్ట్ మూవీ ది గ్రేట్ ఫ్రీ వెడ్డింగ్ షో. ఇందులో టీనా శ్రావ్య హీరోయిన్గా నటించిన విషయం తెలిసిందే. ఈ సినిమా నేడు అనగా నవంబర్ 7న థియేటర్లలో విడుదల కానుండగా ఈ సినిమా ప్రీమియర్ షోలు నవంబర్ 5నే పడ్డాయి. అయితే పల్లెటూరి నేపథ్యంలో తెరకెక్కిన ఈ సినిమా ఎలా ఉంది? ఈ సినిమా కథ ఏమిటి? చివరికి ఏం జరిగింది అన్న వివరాల్లోకి వెళితే..
కథ :
రమేష్ (తిరువీర్) ఫోటో స్టూడియో నడుపుతుంటాడు. పంచాయతీ సెక్రటరీ హేమ (టీనా శ్రావ్య)ను ప్రేమిస్తాడు. కానీ ఇద్దరూ తమ ప్రేమను బయట పెట్టుకోరు. ఈ క్రమంలో పొలిటికల్ బ్యాక్గ్రౌండ్ ఉన్న ఆనంద్ (నరేంద్ర రవి) తన పెళ్లి కోసం గ్రాండ్ గా ప్రీ వెడ్డింగ్ షూట్ తీయించడానికి రమేష్ ను కలుస్తాడు. ఆనంద్, సౌందర్యల ప్రీ వెడ్డింగ్ షూట్ ను రమేష్ ఎంతో రిచ్ గా పూర్తి చేస్తాడు. కానీ ఆ ఫుటేజ్ ఉన్న చిప్ మిస్ అవుతుంది. చిప్ పోయిన విషయం ఆనంద్ కు తెలిస్తే ఏం జరుగుతుందోనని భయపడ్డ రమేష్, ఆ సమస్య నుంచి బయటపడేందుకు హేమతో కలిసి ఆనంద్ పెళ్లినే చెడగొట్టాలని ప్లాన్ చేస్తాడు. కానీ అంతలోనే తన పెళ్లి ఆగిపోయిందని ఆనంద్ వచ్చి రమేష్ కు ట్విస్ట్ ఇస్తాడు. అసలు ఆనంద్ పెళ్లి ఎందుకు ఆగిపోయింది? చిప్ ఎలా పోయింది? రమేష్, హేమల ప్రేమాయణం ఏమైంది?ఇంతకీ ఆనంద్,సౌందర్యల పెళ్లి జరిగిందా లేదా? లాంటి ప్రశ్నలన్నింటికి సమాధానాలు తెలియాలంటే సినిమా చూడాల్సిందే.
విశ్లేషణ:
నిజజీవితంలో కూడా పెళ్లి ఫోటోలు వీడియోలు అంటే మిస్ అవుతూ ఉంటాయి. అయితే అలాంటి కాన్సెప్ట్ తీసుకొని కామెడీ ఎమోషన్స్ ని జోడించి చాలా చక్కగా తెరకెక్కించారు డైరెక్టర్. పల్లెటూరి నేపథ్యంలో సాగే ఫస్టాఫ్ అంతా పాత్రల పరిచయం, రమేష్, హేమ లవ్ ట్రాక్, కామెడీ సీన్స్ తో సరదాగా నడుస్తుంది. తర్వాత ప్రీ వెడ్డింగ్ షూట్ ఆఫర్ రావడం, ఆ షూటింగ్ తీసే విధానం, చిప్ పోవడం వంటి సన్నివేశాలు కూడా బాగానే ఉన్నా, కథ కొంచెం తెలిసిన ఫీలింగ్ ఇస్తుందని చెప్పాలి. అయితే ఆనంద్ తన పెళ్లి ఆగిపోయిందని చెప్పే ట్విస్ట్ ఇంటర్వెల్ లో బాగా ఆకట్టుకుంటుంది. ఇక సెకండాఫ్ లో డైరెక్టర్ ఎమోషన్స్ కు ఎక్కువ ప్రాధాన్యత ఇచ్చారు. పెళ్లి, జ్ఞాపకాలు, అనుభూతులు ఫొటో గ్రాఫర్ చేతిలో ఉంటాయనే పాయింట్ తో వచ్చే డైలాగ్స్, ఎమోషనల్ సీన్స్ ప్రేక్షకులను బాగా కదిలిస్తాయి. ఇక్కడ ఫోటో గ్రాఫర్ కష్టాలను బాగా వివరించారు. చాలామంది కనెక్ట్ అయ్యేలా ఈ సన్నివేశాలను తీర్చిదిద్దారు. ఎమోషనల్ సీన్స్ తర్వాత మళ్లీ కామెడీతో ప్రేక్షకులను ఎంటర్టైన్ చేసి, క్లైమాక్స్ను కూడా మంచి కామెడీతో ముగించారని చెప్పాలి.
నటీనటుల పనితీరు:
కాగా హీరో తిరువీర్ అమాయకమైన, భయపడే పాత్రలో చాలా బాగా నటించారు.తన సహజ నటనతో సినిమాకు మరింత బలాన్ని చేకూర్చారు. టీనా శ్రావ్య క్యూట్ గా, అందంగా ఆకట్టుకుంది. రమేష్ తో లవ్ ట్రాక్లో బాగా నటించింది. నరేంద్ర రవి (ఆనంద్) కామెడీ, ఎమోషనల్ సీన్స్లో అద్భుతంగా నటించి సినిమాకు పెద్ద ప్లస్ అయ్యాడు. ఈ సినిమాతో అతనికి మంచి గుర్తింపు లభిస్తుంది. ఇలా సినిమాలో మిగిలిన నటినటులు కూడా ఎవరి పాత్రల పరిధి మేరకు వారు బాగానే నటించారు.
సాంకేతికత :
రచయితగా, దర్శకుడిగా రాహుల్ శ్రీనివాస్ సక్సెస్ అయ్యారని చెప్పాలి. కథ సహజంగా కామెడీతో కూడి ఉంది. సోమ శేఖర్ కెమెరా పనితనం కూడా బాగుంది. శ్రీకాకుళం నేపథ్యంలో విజువల్స్ ఆహ్లాదకరంగా ఉన్నాయి. సురేశ్ బొబ్బిలి పాటలు, నేపథ్య సంగీతం పర్వాలేదని అనిపించింది. పాటలు సైతం వినడానికి బాగున్నాయి. ఎడిటింగ్ కూడా ఓకే. అక్కడక్కడ సినిమాలో కొన్ని సన్నివేశాలు తీసేసి ఉంటే బాగుండేది అనిపిస్తుంది. స్క్రీన్ ప్లే కూడా బాగుంది.
రేటింగ్: 3/5