జబర్దస్త్ షో ద్వారా ఎంతో మంది ఆర్టిస్ట్‌లు వెలుగులోకి వచ్చారు. ఈ వేదికపై లేడీ గెటప్‌లు వేసి తమ జీవితాలను మార్చుకున్న వారెంతో మంది. అందులో శాంతి స్వరూప్, వినోదిని, తన్మయి ఇలా చాలా మంది లేడీ గెటప్పులు వేయడంలో ఫేమస్. ఒక్కోసారి వీరు వేసే గెటప్పులను అందరూ షాక్ అవుతుంటారు. యాంకర్లకు పోటీ ఇచ్చేలా తయారువుతున్నారని రోజా కూడా సెటైర్లు వేస్తుంటుంది. అలా లేడీ గెటప్పులు వేసే వారంతా ఇప్పుడు ఒక్క చోటకు చేరుకున్నారు.
మామూలుగా బతకమ్మ సీజన్, తెలంగాణ రాష్ట్ర అవతరణ దినోత్సవాలు వస్తే.. కొత్త కొత్త పాటలు, కొత్త కొత్త ట్యూన్లతో కళాకారులు అందర్నీ ఆకట్టుకుంటున్నారు. ఇలా ప్రతీ సారి బతుకమ్మ పండుగపై వచ్చే పాటలన్నీ సూపర్ హిట్ అవుతున్నాయి. మన తెలంగాణ సంస్కృతికి అద్దం పట్టేలా సాహిత్యాన్ని, సంగీతాన్ని జోడించి అందంగా చిత్రీకరిస్తున్నారు. తాజాగా బతుకమ్మ పాట కోసం జబర్దస్త్ ఆర్టిస్ట్‌లందరూ ఒక చోటకు చేరారు.
సునామీ సుధాకర్ మెయిన్ లీడ్‌గా రాబోతోన్న ఈ బతుకమ్మ పాటను క్రిష్ రచించి దర్శకత్వం వహించాడు. ఈ పాటను అఖిల్ చంద్ర, రచిక, మల్లంపల్లి రాజు, సుజన కలిసి ఆలపించారు. ఆ పాటకు సునామీ సుధాకర్ నిర్మాతగా వ్యవహరించాడు. శ్రీనివాస్ రెడ్డి ఈ పాటకు సంగీతాన్ని సమకూర్చాడు. బతుకమ్మ పాట పాడాలి.. బతుకమ్మ ఆటలాడాలి అంటూ విడుదల చేసిన ప్రోమో బాగానే వైరల్ అవుతోంది.
