ఆగస్టు 15వ తేదీ వస్తోంది అంటే సినిమా ప్రియులకి మంచి శుభవార్త. ఆరోజు ముగ్గురు కథానాయకులు తమ సినిమాలతో పోటీ పడుతున్నారు. అందులో ఇద్దరు సీనియర్‌ నటులు కాగా, ఒకరు యువ నటుడు వున్నారు. రామ్‌ పోతినేని-పూరి జగన్‌ కాంబినేషన్‌ లో వస్తున్న ‘డబుల్‌ ఇస్మార్ట్‌’ ఆగస్టు 15న విడుదలవుతోంది. ఈ సినిమా ఇంతకు ముందు వీరిద్దరి కాంబినేషన్‌ లో విజయవంతంగా వచ్చిన ‘ఇస్మార్ట్‌ శంకర్‌’కి సీక్వెల్ గా వస్తోంది. కావ్య థాపర్‌ కథానాయికగా నటిస్తుండగా, బాలీవుడ్‌ నటుడు సంజయ్‌ దత్‌ విలన్‌గా నటిస్తున్నారు. పూరి జగన్‌, ఛార్మి ఈ సినిమాకి నిర్మాతలుగా వ్యవహరిస్తున్నారు. పూరి జగన్‌ ఇంతకు ముందు విజయ్‌ దేవరకొండతో తీసిన ‘లైగర్‌’ బాక్స్‌ ఆఫీస్‌ దగ్గర ఒక డిజాస్టర్‌ గా నిలిచిన సంగతి తెలిసిందే. అందుకనే ఈ సినిమాపై ఎక్కువ ఆశలు పెట్టుకున్నారు.
ఇక రెండో సినిమా రవి తేజ, దర్శకుడు హరీష్‌ శంకర్‌ ల కాంబినేషన్‌ లో వస్తున్న ‘మిస్టర్ బచ్చన్‌’. ఇది హిందీ సినిమా ‘రైడ్‌’ కి రీమేక్‌ గా వస్తోంది. రాజ్‌ కుమార్‌ గుప్త దర్శకత్వం వహించిన ఈ సినిమాలో అజయ్‌ దేవగన్‌ కథానాయకుడు, ఇలియానా కథానాయికగా నటించింది. ఇన్కమ్‌ టాక్స్‌ రైడ్‌ నేపథ్యంలో వచ్చిన ఈ సినిమాని దర్శకుడు హరీష్‌ శంకర్‌ ‘మిస్టర్ బచ్చన్‌’ పేరుతో రీమేక్‌ చేశారు. సౌరబ్‌ శుక్ల నటించిన పాత్ర తెలుగులో జగపతి బాబు పోషిస్తున్నారని అంటున్నారు. భాగ్యశ్రీ బోర్సే కథానాయిక. ఈ సినిమా ఆగస్టు 15న విడుదలవుతుందని అధికారికంగా ప్రకటించారు. రవితేజ ముందు సినిమాలు ‘ఈగల్‌’, ‘టైగర్‌ నాగేశ్వర రావు’ సినిమాలు బాక్స్‌ ఆఫీస్‌ ముందు బోల్తా పడ్డాయి. ఇప్పుడు ఈ ‘మిస్టర్ బచ్చన్‌’ బాక్స్‌ ఆఫీస్‌ ముందు ఎలా ఉంటుందో చూడాలి. ఇప్పటికే ఈ సినిమా నుండి ఒక పాటని విడుదల చేశారు, అది మంచి ప్రజాదరణ పొందింది.
ఇంకో సినిమా తమిళ నటుడు విక్రమ్‌ నటించిన ‘తంగలాన్‌’. పా. రంజిత్‌ దీనికి దర్శకుడు, ప్రముఖ నిర్మాణ సంస్థ స్టూడియో గ్రీన్‌ ఈ సినిమాని పెద్ద బ్జడెట్‌ పెట్టి నిర్మిస్తోంది. కెఈ జ్ఞానవేల్‌ రాజా నిర్మాత. ఈ సినిమా కూడా ఆగస్టు 15న విడుదలవుతోంది. ఈ సినిమా అటు తమిళం, తెలుగు భాషలతో పాటుగా మిగతా అన్ని భాషల్లో కూడా విడుదలవుతోంది. విక్రమ్‌ ఇందులో మూడు వైవిధ్యమైన పాత్రలలో కనిపించి మెప్పిస్తారు అని అంటున్నారు. ఈ సినిమా ఒక పీరియాడిక్‌ డ్రామాగా తెరకెక్కనుంది. ఇంతకు ముందు వచ్చిన ‘కేజీఎఫ్‌’ సినిమాకి ప్రీక్వెల్ గా ఈ సినిమా ఉండొచ్చు అని కూడా అంటున్నారు. మాళవిక మోహనన్‌ ఇందులో ఇంకో ముఖ్య పాత్రలో కనిపించనున్నారు.
ఇలా మూడు సినిమాలతో ముగ్గురు కథానాయకులు ఈ ఆగస్టు 15వ తేదీన వస్తున్నారు. ఆ తేదీ నుండి వరసగా సెలవులు కలిసి రావటం ఈ సినిమాలకి బాగా కలసి వస్తుందని కూడా అంటున్నారు. ఈ మూడు సినిమాలతో పాటు చిన్న సినిమా ’35: చిన్న కథ కాదు’ అనే సినిమా కూడా ఆగస్టు 15న విడుదలవుతోంది. ప్రముఖ నటుడు రానా దగ్గుబాటి ఈ సినిమాకి సమర్పకులుగా వ్యవహరిస్తున్నారు. ఈమని నందకిషోర్‌ దర్శకుడు, కాగా నివేద థామస్‌, విశ్వదేవ్‌ రాచకొండ, ప్రియదర్శి ఇందులో ప్రధాన తారాగణం.