నటుడు మంచు మనోజ్ తన కుటుంబంతో ఆప్యాయంగా కలిసి ఉండాలనే తన కోరికను ఓ పాడ్‌కాస్ట్‌లో భావోద్వేగంగా పంచుకున్నారు. తన తండ్రి మోహన్ బాబు తన కుమార్తెను ఎత్తుకోవాలని, అందరూ కలిసి భోజనం చేసే రోజు రావాలని మనస్ఫూర్తిగా కోరుకుంటున్నానని తెలిపారు. తండ్రి పట్ల తనకు ఎలాంటి కోపం లేదని, కేవలం ప్రేమ మాత్రమే ఉందని స్పష్టం చేశారు. అయితే, తల్లిని కలవడానికి షరతులు, అనుమతులు అవసరం కావడం తనను బాధిస్తోందని ఆవేదన వ్యక్తం చేశారు.
తన తల్లి కూడా తమను మిస్ అవుతోందని, అప్పుడప్పుడు తమ వద్దకు వస్తుందని చెప్పారు. ‘భైరవం’ సినిమా ప్రచారంలో భాగంగా మనోజ్ ఈ విషయాలను వెల్లడించారు. కుటుంబ వివాదాల కారణంగా తన సోదరిని కూడా దూరం చేయాల్సి వచ్చిందని మనోజ్ తెలిపారు. ఆమె నిర్వహించిన ‘టీచ్ ఫర్ ఛేంజ్’ కార్యక్రమానికి కేవలం ఆమె కోసమే వెళ్లానని, ఆమె తన గురించి ఎంతో ఆందోళన చెందిందని చెప్పారు.
తన భార్య మౌనిక, పిల్లలు, అభిమానుల ధైర్యంతోనే ఈ కష్ట సమయాల్లో నిలబడ్డానని వివరించారు. మౌనిక చిన్నతనంలోనే తల్లిదండ్రులను కోల్పోయిందని, ఆమెకు ఈ వివాదాలతో సంబంధం లేదని స్పష్టం చేశారు. కుటుంబ బాధ్యతల కోసం తాను ఎన్నో సవాళ్లను ఎదుర్కొన్నానని అన్నారు. ఇక ఆస్తి వివాదాల ఆరోపణలపై స్పందిస్తూ, తాము ఆస్తి అడగలేదని, ఆ ఆరోపణలను నిరూపించమని సవాల్ విసిరారు. గొడవల తర్వాత తనపై ఫిర్యాదు చేసి, సీసీటీవీ ఫుటేజ్‌ను మాయం చేశారని ఆరోపించారు. అయినప్పటికీ, తన కుటుంబాన్ని ప్రేమించడం తప్ప, ద్వేషించలేదని, సమస్యలను చర్చల ద్వారా పరిష్కరించాలని కోరుకుంటున్నానని మనోజ్ తెలిపారు.