టాలీవుడ్‌లో ఓ దర్శకుడు వరుస ఫెయిల్యూర్స్ ఎదుర్కొన్నా, అతనికి పెద్ద అవకాశాలు రావడం అరుదైన విషయం. కానీ రమేష్ వర్మ మాత్రం ఈ రూల్‌కు మినహాయింపుగా కనిపిస్తున్నాడు. ఖిలాడి మూవీ బాక్సాఫీస్ వద్ద నిరాశపరిచినా, అతను తన తదుపరి ప్రాజెక్ట్‌ను గ్రాండ్‌గా ప్లాన్ చేసుకుంటున్నాడు. ఇప్పుడు ఆయన మాస్ హీరో రాఘవ లరెన్స్‌తో భారీ బడ్జెట్ సూపర్‌హీరో సినిమాను లైనప్ చేసుకున్నాడు.
రమేష్ వర్మ కెరీర్‌లో ఓ మోస్తరు విజయాలు మాత్రమే ఉన్నప్పటికీ, అతని వద్ద హిట్స్ కంటే కొత్త ప్రాజెక్ట్‌లు ఎలా పట్టేస్తాడన్నది ఆసక్తికరంగా మారింది. రైడ్, రాక్షసుడు లాంటి కొన్ని సినిమాలు అతనికి గుర్తింపు తెచ్చినా, వీర్, ఖిలాడి లాంటి చిత్రాలు భారీ అంచనాల మధ్య ఫ్లాప్ అయ్యాయి. అయినా, లరెన్స్‌తో కాలభైరవ అనే ఓ పవర్‌ఫుల్ సూపర్‌హీరో సినిమా తీసేందుకు గ్రీన్ సిగ్నల్ పొందడం చర్చనీయాంశంగా మారింది.
లరెన్స్ ప్రస్తుతం కాంచన 4, బెంజ్ సినిమాలతో బిజీగా ఉన్నప్పటికీ, కాలభైరవ కోసం అతను ప్రత్యేకంగా సమయం కేటాయించనున్నట్లు సమాచారం. ఈ సినిమా హారర్, యాక్షన్, సూపర్ నేచురల్ ఎలిమెంట్స్ కలబోసిన భారీ యాక్షన్ ఎంటర్‌టైనర్‌గా ఉండనుందని టాక్. లరెన్స్‌కు అలాంటి చిత్రాల్లో మంచి గుర్తింపు ఉండటంతో, ఇది మరింత ఆసక్తికరంగా మారింది.
ఇప్పటికే పలు ఫెయిల్యూర్స్ చవిచూసిన రమేష్ వర్మకు ఇది ఎంతో కీలకమైన అవకాశం. ఇప్పుడు ఎలాగైనా తన స్టైల్‌ను మార్చుకుని, కంటెంట్ పరంగా కొత్తగా ఆలోచించాల్సిన అవసరం ఉంది. కాలభైరవ విజయవంతమైతే, రమేష్ వర్మ మరోసారి సక్సెస్ ట్రాక్‌లోకి వచ్చే అవకాశముంది. మరి ఈ సినిమాతో ఫలితం ఎలా ఉంటుందో చూడాలి.
