కన్నడ సూపర్ స్టార్ శివరాజ్ కుమార్ హీరోగా పాపులర్ డైరెక్టర్ నర్తన్ దర్శకత్వం వహించిన సినిమా బైరతి రణగల్. ఈ చిత్రంలో రాహుల్ బోస్, నానాపటేకర్, రుక్మిణి వసంత్ యోగిబాబు, దేవరాజ్ తదితరులు నటించారు. ఈ సినిమాకి రవి బసూర్ సంగీతం అందించగా గీత శివ రాజ్ కుమార్ నిర్మాతగా వ్యవహరించారు. ఈ సినిమా 2017లో విడుదలైన మఫ్టీ సినిమాకి ప్రీక్వెల్. అడ్వకేట్ గా ఉండే వ్యక్తి సమాజంలో వివక్షకు గురైన ప్రజలకు అండగా నిలవడానికి ఎలాంటి నిర్ణయం తీసుకున్నారు.
ఆయన జీవితం ఎలాంటి ఒడిదుడుకులు లోనైంది అనేది ఈ సినిమా కథ. నవంబర్ 15న కర్ణాటకలో రిలీజ్ అయి హిట్ టాక్ ని సంపాదించుకున్న ఈ సినిమా త్వరలోనే తెలుగులో కూడా గ్రాండ్ రిలీజ్ అవ్వబోతుంది. నవంబర్ 29న తెలుగుతో పాటు తమిళంలో కూడా రిలీజ్ కాబోతుంది. శివరాజ్ కుమార్ కి తెలుగు ఇండస్ట్రీలో ఉన్న మార్కెట్ ని దృష్టిలో పెట్టుకొని ఆ సినిమాని ఇక్కడ విడుదల చేస్తున్నారు.
తాజాగా ఈ సినిమాకి సంబంధించిన తెలుగు ట్రైలర్ ని హీరో నాని విడుదల చేశారు. చిత్ర యూనిట్ కి శుభాకాంక్షలు కూడా తెలిపారు. శివరాజ్ కుమార్ తమిళంలో కూడా చాలా సినిమాలు చేశారు అక్కడ కూడా ఆయనకి మంచి మార్కెట్ ఉంది. మరొకవైపు తెలుగులో రామ్ చరణ్, బుచ్చిబాబు, కాంబోలో వస్తున్న మూవీలో శివరాజ్ కుమార్ ఓ కీలక పాత్ర పోషిస్తున్న సంగతి తెలిసిందే.
దాంతో పాటు మంచు విష్ణు హీరోగా నటిస్తున్న కన్నప్ప సినిమాలో కూడా కీలకపాత్ర పోషిస్తున్నారు. వీటితోపాటు కన్నడ ప్రాజెక్టులతో బిజీగా ఉన్న శివరాజ్ కుమార్ వచ్చే నెల శస్త్ర చికిత్స కోసం యూఎస్ వెళ్తున్నట్లు చెప్పారు. 2025 జనవరిలో ఇండియాకి తిరిగి వచ్చిన తర్వాత మళ్ళీ సినిమాలలో నటిస్తానని చెప్పారు. ఇక టాలీవుడ్ లో విడుదలైన భైరతి రణగల్ సినిమా శివరాజ్ కుమార్ కి ఎలాంటి రిజల్ట్స్ అందిస్తుందో వేచి చూడాల్సిందే.
