రాత్రికి రెస్టారెంట్‌కు వెళ్లేందుకు బయటకు వచ్చిన ఓ జంట.. ఒక్కసారి స్క్రాచ్ చేస్తే ఏమౌతుందో చూద్దామనుకుంది. కానీ ఆ స్క్రాచ్ జీవితాన్ని మార్చేస్తుందంటే ఊహించారా? ఇదే న్యూజెర్సీలో జరిగిన అసలైన కథ. కేవలం 3 డాలర్లు ఖర్చుపెట్టి కొనుగోలు చేసిన లాటరీ టికెట్ వారిని క్షణాల్లో కోటీశ్వరులుగా మార్చింది. ఈ జాక్‌పాట్ విలువ ఏకంగా 1.5 మిలియన్ డాలర్లు, అంటే రూ.12.86 కోట్లు!
వివరాల ప్రకారం, భోజనం చేసేందుకు వెళ్తుండగా మార్గమధ్యంలో లాటరీ కొనాలనే ఆలోచన వచ్చిందట. అయితే టికెట్ కొనుగోలు చేయాలా వద్దా అనే విషయంలో ఆ దంపతుల మధ్య చిన్నపాటి చర్చ జరిగినట్లు తెలుస్తోంది. చివరికి “ఒక్కసారి చూద్దాం” అనుకుని కొనుగోలు చేసిన టికెట్‌పై స్క్రాచ్ వేయగానే… కళ్లముందే కోట్లు కనిపించాయి.
ఈ విషయంపై ఆ దంపతులు ఆనందం వ్యక్తం చేస్తూ, “ఇది నిజంగా మాకు దేవుడిచ్చిన వరం. అప్పుల మధ్య నలిగిపోయిన జీవితం ఒక్కసారిగా వెలుగులోకి వచ్చింది. ఇప్పుడు మనసు ప్రశాంతంగా ఉంది. ఈ డబ్బుతో మా కుటుంబానికి భద్రమైన భవిష్యత్తు నిర్మించుకుంటాం” అని వ్యాఖ్యానించారు. ముఖ్యంగా గతంలో చెల్లించలేని బిల్లులు, ఆర్థిక ఒత్తిడిని గుర్తుచేసుకుంటూ ఉద్వేగానికి లోనయ్యారు.
లాటరీ సంస్థ ద్వారా వచ్చే డబ్బును ఒక్కసారిగా కాకుండా 25 ఏళ్ల పాటు వార్షికంగా తీసుకునే విధంగా ఒప్పందం కుదుర్చుకున్నారని సమాచారం. ఒక్క టికెట్ జీవితాన్ని ఎలా మార్చేస్తుందో న్యూజెర్సీ దంపతులు అందరికీ జీవంత ఉదాహరణగా నిలిచారు.
