బిగ్ బాస్ షో ప్రారంభం రోజు అరియానా ఎలా ఎంట్రీ ఇచ్చిందో అందరికీ గుర్తుండే ఉంటుంది. ఐదు నిమిషాల ఇంట్రడక్షన్ ప్రోమోలో ఓ యాభై సార్లు బోల్డ్ అని చెప్పుకున్నట్టుంది. అసలు బోల్డ్ అంటే ఏమిటో కూడా అరియానాకు తెలుసో లేదో కానీ బోల్డ్ అంటూ తనకు తాను ట్యాగ్ ఇచ్చుకుంది. సరే అదంతా వదిలేద్దాం. తన గురించి తాను ఇష్టమొచ్చినట్టుగా చెప్పుకుంటుంది. దాదాపు తొమ్మిది వారాలుగా జనాలు ఆమెను భరిస్తూనే వస్తున్నారు. ఆమె ఏంటో, ఆమె వ్యవహారం ఏంటో అరియానా నుంచి అతియానాగా ఎలా మారిందో అందరం చూస్తూనే ఉన్నాం.
అరియానా మొదటగా షోలోకి ఎంట్రీ ఇచ్చాక సోహెల్‌తో పాటు నైబర్ రూంలో ఉండిపోయింది. ఓ రెండు రోజులు వారిద్దరూ ఒకే రూంలో ఉన్నారు. ఈ ఇద్దరి మధ్య ఏదో ట్రాక్ మొదలవుతుందని అందరూ భావించారు. కానీ అరియానాకు ఉన్న అతి, ఓవర్ యాక్షన్, యాటిట్యూడ్‌తో సోహెల్ దూరంగానే ఉండిపోయాడు. మధ్యలో అరియానాను కరెక్ట్ చేయాలని చూస్తే.. నీకెందుకు నా ఆట నేను ఆడకుంటాను అంటూ సోహెల్‌కు కాస్త గట్టిగా కౌంటర్ ఇచ్చింది.
తరువాత అవినాష్‌తో అరియానా క్లోజ్‌గా ఉండటం ప్రారంభించింది. దివి ఎలిమినేట్ అయ్యాక అమ్మ రాజశేఖర్‌తో క్లోజ్ అయింది. ఇక ఈ ముగ్గురు ఓ గ్యాంగ్‌లా మారారు. అయితే అమ్మ రాజశేఖర్ ఎలిమినేషన్‌ను అరియానా తట్టుకోలేకపోయింది. కెమెరాల ముందుకు వచ్చి భోరున ఏడ్చింది. ఇక ఈ ఇంట్లో నేను ఉండలేను.. ఇలాంటి మనుషుల మధ్య నేను ఉండలేను.. నేను బోల్డ్ అనుకున్నాను..కానీ కాదు.. ఆ ట్యాగ్ మీరే తీసుకోండి బిగ్ బాస్.. నన్ను పంపించేయండి అని భోరున ఏడ్చింది. అమ్మ రాజశేఖర్‌ను పంపించారు.. నన్ను కూడా పంపించండి అంటూ విలపించింది. కానీ ఉదయానికి అంతా సెట్ అయిపోయి.. మార్నింగ్ పాటకు దుమ్ములేచేలా డ్యాన్స్ చేసింది.