పశ్చిమ ఆఫ్రికాలోని గినియా దేశంలో ఫుట్బాల్ మ్యాచ్ భయానక దృశ్యాలకు వేదికైంది. జెరెకొరెలో జరిగిన ఈ మ్యాచ్ మధ్యలో రిఫరీ నిర్ణయంపై ఆగ్రహం చెందిన అభిమానులు ఒకరిపై ఒకరు దాడి చేసుకోవడం ప్రారంభించారు. ఈ హింసలో 100 మందికిపైగా ప్రాణాలు కోల్పోయినట్లు అధికారులు ధ్రువీకరించారు. ఘటన వివరాల్లోకి వెళ్తే, గినియా మిలిటరీ జుంటా నేత మమాడి దౌంబోయ్ గౌరవార్థం నిర్వహించిన ఈ మ్యాచ్ సమయంలో రిఫరీ తీసుకున్న నిర్ణయం స్థానిక అభిమానుల్లో తీవ్ర ఆగ్రహం రేకెత్తించింది.
ఒక జట్టు అభిమానులు మైదానంలోకి దూసుకెళ్లగా, ప్రత్యర్థి జట్టు అభిమానులు వారిని అడ్డుకున్నారు. ఇరు వర్గాల మధ్య మాటల యుద్ధం క్షణాల్లో రాళ్లు, కర్రలు, ఆయుధాల యుద్ధంగా మారింది. హింస మైదానానికి మాత్రమే పరిమితం కాకుండా, నగర వీధుల్లోనూ కొనసాగింది. ఆగ్రహానికి గురైన కొందరు పోలీస్ స్టేషన్కు నిప్పు పెట్టారు. మృతదేహాలు రోడ్లపై చెల్లాచెదురుగా పడి ఉండటం స్థానికులను దిగ్భ్రాంతికి గురిచేసింది.
గాయపడిన అనేకమంది ఆసుపత్రుల్లో చికిత్స పొందుతున్నారు. మృతుల సంఖ్య మరింత పెరిగే అవకాశం ఉందని స్థానిక మీడియా తెలిపింది. ప్రభుత్వం ఈ ఘటనపై విచారణకు ఆదేశించింది. మిలిటరీ జుంటా నేత మాట్లాడుతూ, ఈ హింసాత్మక ఘటన దేశాన్ని షాక్కు గురిచేసిందని, బాధిత కుటుంబాలకు తగిన పరిహారం అందజేస్తామని చెప్పారు. భద్రతా లోపాలు, రిఫరీ నిర్ణయాల కారణంగా ఈ ఘటన జరిగిందా అనే అంశాలను ప్రభుత్వం పరిశీలిస్తోంది.
ఆఫ్రికా ఫుట్బాల్ సమాఖ్య ఈ ఘటనను తీవ్రంగా ఖండించింది. క్రీడలు ప్రజలను కలిపే వేదికలుగా ఉండాలి గానీ ఇలాంటి హింస అసహ్యం అని వ్యాఖ్యానించింది. ఘర్షణల కారణంగా ఆటలకు సంబంధించిన భవిష్యత్తు కార్యక్రమాలు వాయిదా వేయనున్నట్లు సమాచారం. క్రీడాభిమానుల తగాదాలు ఈ స్థాయికి చేరుకోవడం గినియాలో ఫుట్బాల్ అభివృద్ధికి పెద్ద ఇబ్బందిగా మారిందని విశ్లేషకులు అభిప్రాయపడ్డారు.
