అఖిల్ ఎలాగైనా హిట్ కొట్టాలని తెగ కష్టపడుతున్నాడు. ఇప్పటికే వచ్చిన రెండు సినిమాల ఎడ్రస్ లు గల్లంతు అవటంతో …ముచ్చటగా మూడో సినిమాతో అయినా గాడిన పడాలని అనుకుంటున్నాడు. అందుకోసం హీరోగా తాను ఏమేం చేయాలో అవన్నీ చేసేస్తున్నాడు. ముఖ్యంగా అఖిల్ .. ఈ సినిమాలో ఎయిట్ ప్యాక్ బాడీతో కనిపించాలని ఫిక్స్ అయ్యాడు. ఫస్ట్ సాంగ్ లో ఈ లుక్ వస్తుంది. అయితే లుక్ తో లక్ రాదు…సినిమాలో విషయం ఉండాలి, అంటున్నారు సినిమా వాళ్లు. అదంతా డైరక్టర్ చూసుకుంటాడు. ప్రస్తుతానికి మీరంతా నన్ను చూడండి అంటున్నాడీ మజ్ను.
సినిమా వివరాల్లోకి వెళితే..
అఖిల్ అక్కినేని హీరోగా శ్రీ వెంకటేశ్వర సినీ చిత్ర ఎల్‌ఎల్‌పి పతాకంపై ‘తొలిప్రేమ’ ఫేం వెంకీ అట్లూరి దర్శకత్వంలో భారీ నిర్మాత బీవీఎస్ఎన్ ప్రసాద్ నిర్మిస్తున్న యూత్‌పుల్ ఎంటర్‌టైనర్ ‘మిస్టర్ మజ్ను’. ప్రస్తుతం ఈ చిత్రం చిత్రీకరణ దశలో ఉంది. అన్ని కార్యక్రమాలు పూర్తి చేసి జనవరి 25న ఈ చిత్రాన్ని విడుదల చేసేందుకు సన్నాహాలు చేస్తున్నారు.
ఇటీవల ఈ చిత్రానికి సంబంధించి ‘ఏమైనదో.. ఏమైనదో.. పలుకు మరచినట్టు పెదవికేమైనదో..’ అంటూ సాగే పాటను విడుదల చేశారు. శ్రీమణి అద్భుతమైన సాహిత్యానికి థమన్ అందించిన సంగీతం తోడవడంతో ఈ పాటకు మంచి రెస్పాన్స్ వస్తోంది. ఇక రెండో పాటను డిసెంబర్ 25న విడుదల చేయనున్నారు. క్రిస్మస్ కానుకగా సాయంత్రం 6 గంటలకు ‘మిస్టర్ మజ్ను’ టైటిల్ సాంగ్‌ను విడుదల చేయనున్నారు.
అఖిల్ అక్కినేని సరసన నిధి అగర్వాల్ హీరోయిన్‌గా నటిస్తున్న ఈ చిత్రంలో నాగబాబు, ప్రియదర్శి, జయప్రకాష్, హైపర్ ఆది ఇతర ముఖ్యపాత్రలు పోషిస్తున్నారు. ఈ చిత్రానికి సంగీతం: థమన్, పాటలు: శ్రీమణి, సినిమాటోగ్రఫీ: జార్జ్ సి. విలియమ్స్, ఎడిటింగ్: నవీన్ నూలి, ఆర్ట్: అవినాష్ కొల్లా, కొరియోగ్రఫీ: శేఖర్, నిర్మాత: బి.వి.ఎస్.ఎన్.ప్రసాద్, కథ, స్క్రీన్‌ప్లే, దర్శకత్వం: వెంకీ అట్లూరి.