(అహ్మద్ షరీఫ్)
మీరు మీ అబ్బాయినో అమ్మాయినో స్కూల్ దగ్గర డ్రాప్ చేయాలని స్కూటీ మీద వెళుతున్నారు. మీ ముందో సిటీ బస్సు వెళుతోంది. అలా వెళుతూ, వెళుతూ ఆ బస్సు ఉన్నట్లుంది రోడ్డు మధ్యలో ఆగుతుంది. మీరు దాదాపు దాన్ని గుద్దు కున్నంత పని చేసి ఆగుతారు. మీరు సర్దుకునేలోపు మీ వెనకనుంచి హారన్లు మోగుతాయి.
మీరు మీ ద్విచక్రవాహనాన్ని సవ్యంగా పార్కు చేసి ఓ షాప్ లోకి వెళతారు. మీరు వచ్చి చూసేటప్పటికి దాన్ని తీయడానికి వీల్లేకుండా మీ బండి వెనకాల ఓ బండి పెట్టివుంటుంది. ఆ బండి పెట్టిన మనిషి గురించి మీరు చుట్టూ చూస్తారు. అతడు కనిపించడు.
ఎందుకో తెలీని కారణంగా, మీ బ్యాంకు లోని కౌంటర్ ముందున్న క్యూ అతి నింపాదిగా కదుల్తూ వుంటుంది. మీరు క్యూ మాధ్యలో వుంటారు. ఈ లోపు వెనకనించి ఓ యువకుడు కౌంటర్ దగ్గరి కెళ్ళి తన పని చేసుకు వెళ్ళిపోతాడు. దీన్ని ఎవ్వరు పట్టించుకోరు. ఒక వేళ మీ రోజు ఇలా మొదలయితే మిగతా రోజంతా ఎలా గడుస్తుందో ఉహించండి.
మన చుట్టూ సర్వదా కొన్ని నియమాలుంటాయి. ఈ నియమాలు సాంఘిక ఆచారాలు కావచ్చు, చట్టపరమైన నియమాలు కావచ్చు లేదా నైతిక ప్రవర్తన కు సంబంధించిన కట్టుబాట్లు కావచ్చు. వీటిని పాటించక పోవడం వాల్ల ఎదుటివారికి ఇబ్బందికలిగితే మనం వాటిని పాటించాలి .
సాంఘిక జీవనం లో మనుషులు ఒక రకమైన ప్రవర్తనను ప్రదర్శించాలి లేదా ఒక రకమైన ప్రవర్తనను ప్రదర్శింప కూడదు. ప్రదర్శించాల్సిన ప్రవర్తనను ప్రదర్శించక పోయినా, ప్రదర్శింప రాని ప్రవర్తనను ప్రదర్శించినా వారు నియమాలను ఉల్లంఘించి నట్లే.
ఉదాహరణకు, వృద్ధుల కోసం కేటాయింపబడిన ఒక సీటు లో వృద్ధులు తప్ప మరెవరు కూర్చోరాదు. ఒక వేళ ఎవరైనా కూర్చొని వుంటే ఎవరైనా వృద్ధుడు వచ్చినపుడు వారు ఆ సీటు లోంచి లేఛి అ సీటును అ వృద్దుడికి ఇవ్వాలి. ఇది ప్రదర్శించాల్సిన ప్రవర్తన. అలా జరగకపోతే నియమ ఉల్లంఘన జరిగినట్లే . ఒక లైబ్రరీ లో “నిశ్శబ్దముగా వుండుము “ అని ఒక సైన్ బోర్డు వుంటుంది. అక్కడ గట్టిగా మాట్లాడటం, అల్లరి చేయడం ప్రదర్శింప కూడని ప్రవర్తన ఎవరైనా అలా చేస్తే వారు నియమ ఉల్లంఘన చేసినట్లే.
బ్లాకు లో టికట్లు కొనడం, లంచాలు ఇవ్వడం లేదా తీసుకోవడం, బాహ్య ప్రదేశాల్లో చెత్త పడేయటం, క్యూ దాటేయడం, నిషిద్ధ ప్రదేశాల్లో పొగ త్రాగటం, తప్పు చేస్తూ పట్టు బడినప్పుడు, డబ్బు ఎరగా బేరాలాడి తప్పించుకోవడం, ట్రాఫిక్ నియమాలని పాటించక పోవటం ఇలా అనేకమైన విషయాల్లో మనిషి నియమ ఉల్లంఘన చేస్తుంటాడు. ఈ లిస్టు కి అంతు లేదు.
కొన్ని సార్లు మంచి చేయడానికి, మరి కొన్ని సార్లు చెడును ఆపడానికీ కొంతమంది నియమాలను ఉల్లంఘించ వచ్చు.. కొంతమంది ఎవరూ చూడటం లేదు కదా అనో, లేక దీనివల్ల ఎవరికీ నష్టం రాదు కదా అనో నియమాలను ఉల్లంఘించ వచ్చు.
కొంతమంది అవసరానికి, కొంతమంది అవకాశం దొరికించుకోవడానికి, మరికొంతమంది లాభం పొందడానికి నియమాలను ఉల్లంఘించ వచ్చు. తాము ప్రత్యేకమని తెలియచేయడానికి కొందరు, మానసిక రుగ్మతల వల్ల కొందరు, తెలియక కొందరు నియమాలను ఉల్లంఘిచ వచ్చు. అయితే కొన్నిసార్లు మనకు తప్పుడు నియమాలు కుడా ఎదురవ్వవచ్చు . అప్పడు తప్పనిసరిగా మనం వాటిని ఉల్లంఘించాల్సి రావచ్చు.
నువ్విలా ఉండాలి అంటే నేనెందు కలా ఉండాలి? ఇంకోలా ఎందుకుండకూడదు? అని సవాలు చేసే మనస్తత్వం మనిషి పుట్టినప్పటినుండి, ఆలోచించడం అలవడి నప్పటి నుంచే ఉందేమో అందుకే స్వాతంత్రత్య్రాన్ని కట్టిపడేసే నియమాలంటే మనుషులకు సాధారణంగా నచ్చవు. అహాన్ని దెబ్బతీసే నియమాలంటే (అవి మంచివైనా ) నచ్చవు. “ఏమవుతుందిలే” అనో “అయితే ఏంటి” అనే మనస్తత్వం వల్ల కూడా కొంతమంది ఇతరులను ఇబ్బంది పెట్టే రకంగా ప్రవర్తిస్తూ నియమాలు ఉల్లంఘిస్తూ ఉంటారు.
అయితే ఇంతటి ఆలోచనా విధానం పశువుల్లో వుండదేమో అవి కొంత క్రమశిక్షణను పాటిస్తాయి. చాలా విషయాల్లో తమ కమ్యూనిటీ స్టాండర్డ్స్ ను అవి ఉల్లంఘించవు. ఉల్లంఘిస్తే శిక్షిస్తామనో, ఫలానావి నిషేధమనో (ఇచ్చట ఉచ్చలు పోయారాదు, నో పార్కింగ్, చెత్త వేయరాదు, ప్లాస్టిక్ నిషేధం వగైరా నోటీసులు మనుషులకే ఉంటాయి) బోర్డులుండవు జంతు ప్రపంచంలో. అయినా సరే అవి కమ్యూనిటీ స్టాండర్డ్స్ ను పాటిస్తుంటాయి. ఆవేశాలకు లోనై మనిషి విచక్షణను కోల్పోతాడు. జంతువులు తమ ప్రపంచాన్ని కూల్ గా తీసుకుంటాయి. వాటి మధ్య పోటీ వుంటుంది. అయితే, కమ్యూనిటి స్టాండర్డ్స్ విషయంలో అవి మనుషులకంటే చాలా మేలు. అవి తమ ప్రపంచ కోసం జీవిస్తాయి. ప్రపంచం తన కోసం ఉందనుకుంటాడు మనిషి.
నైతిక పరమైన నియమాలు మన జీవితాల్నిసంరక్షించు కోవడానికి, ఎదుటివారి హక్కుల్నిసంరక్షించడానికి ఉద్దేశింప బడ్డాయి. సాంఘిక ఆచార వ్యవహారాలు “జీవన వ్యవస్థ” సవ్యంగా నడవడానికి ఉద్దేశించ బడ్డాయి. ఎదుటి వాడిని నమ్మించి మోసం చేయడమన్నది నైతిక పరమైన నియమ ఉల్లంఘన. ఎవరికో చెందిన ఒక వస్తువును అపహరించడం మన్నది సాంఘిక ఆచార వ్యవహారాల ఉల్లంఘన.
అయితే ఈ రెండింటిలో మొదటి వాటి ఉల్లంఘనే ఎక్కువ ప్రమాదకరమైనది. అది మనుషుల్లో నైతిక భావావేశాన్ని కలగచేస్తుంది. దీనివల్ల పగ, న్యూనతా భావం, అవమానం, పశ్చత్తాపం, నేరభావం మొదలైనవి కలిగే అవకాశాలు ఎక్కువ. ఇవి మనుషుల ఆలోచనా విధానం మీద ప్రభావం చూపించి వారి జీవన రీతిని మార్చేయవచ్చు.
ఇక రెండవ రకమైన ఉల్లంఘనలు ఎక్కువగా చట్టపరమైన శిక్షల మీద, సంఘ వ్యతిరేకత మీద ఆధార పడతాయి. ఏది ఏమైనా ఈ నియమ పాలన (లేదా నియమ ఉల్లంఘన) ను తరుస్తూ పొతే మనం ఎక్కడా తేలక పోవచ్చు.
“ఈ ప్రపంచం లో కొంతమంది ఇంకా మంచి వాళ్లు గా మిగిలి వున్నారంటే వారికి చెడిపోవడం చేతకాక పోవడమే” అన్నాడొక మహానుభావుడు. ఆ మహనుభావుడి ఉద్దేశం లో చెడి పోవడమంటే, తాగడం, జూదమాడటం, దొంగతనం చేయడం లాంటివి కావచ్చు.
అలా కాక, ఎదుటి వారిని ఇబ్బంది పెట్టకుండా మన చుట్టూ సర్వదా ఉండే కొన్ని చిన్నచిన్న నైతిక నియమాలని సాంఘిక ఆచారాలని, ఉల్లంఘించే వారందరూ చెడి పోయిన వారికిందే లెక్క అనుకుంటే మాత్రం, ఈ ప్రపంచం లో మంచివారు అనే వారె మిగలక పోవచ్చు.
అందుకే మనం పూర్తిగా మంచి వారిగా ఉందాం. పదిమందికి కష్టం కలిగించే ఉల్లంఘన లని నిరోధిద్దాం. నియమాలని పాటిద్దాం.