//పల్లేరుగాయ//
#########
చేదబాయి దూలానికి చెదలు పడితే
నీళ్లబొక్కెన గిర్కకు ఉరేసుకున్నది
ఐదురూపాల మినరల్ వాటర్ క్యాన్ల ఆటో
ఇంటింటికీ ఆగుతుంటే
ఏండ్లకేండ్లు జనం దూపదీర్చిన
కట్టకింద బోరింగ్ కంటనీరు పెట్టుకుంటున్నది
శాలొల్ల ఇంట్ల ఉండే ఆరుకొండ్ల పాతాలగరిగె
పాత ఇనుప సామానుకు కిలో ఉల్లిగడ్డైంది
పాలుకాగబెట్టే తెల్లటి లోతుగిన్నె
పచ్చిపులుసు చల్లుకొని వికారమైంది
ఉట్టిమీద పెరుగుకుండ
మశిబట్టి మంగలం పెంకైంది
రోజూ పొద్దుగాల పోలుబోసే పిలగాడు
దుకాన్ల టెట్రా మిల్క్ పాకెట్తో ఎదురైతే
దినాం కుండల గడ్డకట్టే పెరుగు
ప్లాస్టిక్ కవర్ల దునికి బిగుసుకుంది
ఇంట్లె పొయ్యిమీద ఉడకాల్సిన కోడికూర
చికెన్ సెంటర్ తడక వెనకనే కుతకుత మంటున్నది
కోడిగూయంగ లేచి వాకిలిఊడ్చే నా పల్లె
బారెడు పొద్దెక్కినా చీపురు తీయట్లేదు
పెండలేక అలుకు కుండ ఒట్టిపోతే
ఎడ్లమూతికి దూరమైన కుడితిగోలెం
గడ్డివాం పక్కన ఎండి ఎరగప్పయింది
కోడిలేక, పాడిలేక
గొడ్లకొట్టం నిండా బల్లిపాతర్లు పేరుకుంటే
ఎడ్లబండి సట్టం సడుగులిరిగి
రాతికట్టానికి అడ్డంగా పడ్డది
పెండ్లి బాషికాలు లేక ఎనగర్ర ఎడ్డిసూపులు చూస్తుంటే
పూలుపండ్లకు చేయించిన ఫ్లెక్సీ మాత్రం టీవీ దగ్గర ఠీవీగ ఉంది
సుపరాకలు, చిలుకులు తలిగిచ్చే చిలుక్కొయ్య
చిలుంపట్టి బొంబాయి మిఠాయోని పరమైతే
ఉల్లిగడ్డకు కరువైన చిక్కం
మందుగోలీలు, టానిక సీసలు నింపుకుని
తనాబ్బిల పడి తలుపేసుకుంది
సందుక తీసినప్పుడల్లా రాగివాసన వచ్చే అమ్మ పితాంబరం
దండెం మీద మీద పోగులు పోగులై జారిపోతుంటే
బొట్టుపెట్టెల దండకడెం అప్పులెక్కువై
అవుసుల బ్రహ్మచారి ఇంట్ల తేజాబ్ తోటి కలిసిపోయింది
ఇప్పుడు ఏ ఇంటెన్కక చూసినా
జిల్లేడు చెట్టు రెక్కలు కొడుతున్నది
గోలెంకాడ గోరంట పూవుల్లేవ్
బాయికాడ పోకబంతి చెట్లులేవ్
పందిరికి పేనుకునే బీర పాదుల్లేవ్
పెంటగడ్డ మీద ప్రేమగ పారే గుమ్మడి తీగల్లేవ్
జాలాట్ల గుంటగరగడాకు కూడా అవుపడక
గుండె అవిసిపోతున్నది
పండుగ ఏదైనా పసిడి వన్నెలు చిందే నా పల్లె
బార్ షాప్ ముందట తాగి దొర్లాడుతున్నది