తెలంగాణలో పంచాయతీ కార్యదర్శుల నియామక అప్లికేషన్ల ప్రాసెస్ లో అభ్యర్దులకు ముప్పుతిప్పలు ఎదురవుతున్నాయి. నిన్న మొన్నటి వరకు ఫీజు చెల్లింపులో సతాయించిన సర్వర్ నేడు బిజి బిజీ అంటూ మొరాయిస్తుంది. సర్వర్ బిజీతో అభ్యర్దులు తమ దరఖాస్తులను చేయలేకపోతున్నారు. గంటల తరబడి సిస్టమ్ ల ముందు కూర్చున్నా అప్లికేషన్ ప్రాసెస్ మాత్రం కావడం లేదు. ఓ వైపు అప్లికేషన్ల సబ్ మిట్ గడువు గండం ముంచుకోస్తుండటంతో అభ్యర్దులు హైరానా పడుతున్నారు.
తెలంగాణలో జూనియర్ పంచాయతీ అధికారుల నియామకానికి నోటిఫికేషన్ ఇచ్చిన ప్రభుత్వం ఈ నెల 3 నుంచి 12 వరకు దరఖాస్తులను స్వీకరిస్తుంది. ఫీజు చెల్లింపు 11 వ తేది వరకే పెట్టినా దరఖాస్తులను మాత్రం 12 వ తేది వరకు స్వీకరిస్తున్నారు. అయితే ముందుగా ఫీజు చెల్లింపు ఆప్షన్ ఉండటంతో 3 వ తేది నుంచి ఇప్పటి వరకు కూడా చాలా అప్లికేషన్లు విఫలమయ్యాయి. ఫీజు చెల్లించినా ఫీజు పే కానట్టు చూపించి మళ్లీ ఫీజు పే చేస్తేనే పూర్తి స్థాయి అప్లికేషన్లను సర్వర్ తీసుకుంటుంది. www.tsprrecruitment.cgg.gov.in ద్వారా అప్లికేషన్లను స్వీకరిస్తున్నారు.
ఫీజు పే తో సతాయించిన సర్వర్ నేడు మరో సమస్యతో నిరుద్యోగులను ముప్పు తిప్పలు పెడుతుంది. సర్వర్ ఎప్పుడూ చూసినా బిజినే చూపిస్తుంది. దీంతో దరఖాస్తు గడువు సమీపిస్తుండటంతో నిరుద్యోగులు ఆందోళనకు గురవుతున్నారు. 9355 పోస్టులకు దాదాపు 10 లక్షల అప్లికేషన్లు వచ్చే అవకాశం ఉన్నట్టు తెలుస్తోంది.
గ్రామీణ ప్రాంతాలలోని అభ్యర్దులు అప్లై చేసుకోవాలంటే మీ సేవా కేంద్రాలు తప్ప మరేమి దిక్కుండవు. మీ సేవా కేంద్రాలు ఆదివారం, సెలవు దినాల్లో పనిచేయవు. దీంతో అభ్యర్దులు సకాలంలో అప్లై చేసుకోలేక పోతున్నారు. పట్టణాలలోనేమో సర్వర్ బిజీ వస్తుంది. దీంతో అభ్యర్దులు అయోమయానికి గురవుతున్నారు. అందుకే పంచాయతీ అప్లికేషన్ల గడువు తేదిని పెంచాలని నిరుద్యోగులు డిమాండ్ చేస్తున్నారు.
పంచాయతీ కార్యదర్శుల పోస్టులకు అప్లికేషన్ల ప్రాసెస్ లో అప్లై తేది నుంచి కూడా సర్వర్ ఏదో ఒక రకంగా సతాయిస్తుంది. దీంతో అభ్యర్దులు ఆందోళన చెందుతున్నారు. సర్వర్ సమస్యతో అప్లై చేసుకోలేకపోయామని పంచాయతీ అప్లికేషన్ల దరఖాస్తుల గడువును మరింత పెంచాలని నిరుద్యోగులు డిమాండ్ చేస్తున్నారు. లేనిపక్షంలో ఉద్యమం చేస్తామని నిరుద్యోగ అభ్యర్దులు హెచ్చరిస్తున్నారు. వెంటనే సర్వర్ లో ఉన్న టెక్నికల్ సమస్యలను పరిష్కరించి దరఖాస్తుల గడువు తేది పెంచాలని వారు కోరుతున్నారు.