కాంగ్రెస్ నేత రేవంత్ రెడ్డికి భద్రత ఏర్పాటు పై కొత్త చిక్కులు ఏర్పడ్డాయా? అంటే అవుననే అనిపిస్తోంది. రాష్ట్ర పోలీసుల మీద నమ్మకంలేదని, కేంద్ర బలగాల రక్షణ కల్పించాలని ఆయన హైకోర్టుకు వెళ్లారు. కోర్ట్ ఆయనకు అనుకూలంగా తీర్పు ఇచ్చింది. కానీ కోర్ట్ తీర్పును అమలు చేయకుండా రాష్ట్ర బలగాలనే రక్షణగా కల్పిస్తామంటున్నారు తెలంగాణ పోలీసులు. దీంతో వివాదం తలెత్తింది.
కేసీఆర్ సహా పలువురు టిఆర్ ఎస్ నాయకులు, పోలీసు అధికారుల నుంచి తనకు ప్రాణహాని ఉందని రేవంత్ కోరికను తెలంగాణ పోలీసులు లైట్ తీసుకున్నట్లు తెలుస్తోంది. రేవంత్ కు 4+4 స్టేట్ క్యాడర్ బలగాల రక్షణ కల్పించబోతున్నట్లు పోలీస్ వర్గాల ద్వారా సమాచారం వచ్చింది.
తనకు కేంద్ర బలగాల రక్షణ కు కోర్ట్ ఇచ్చిన ఆదేశాల తీర్పు కాపిని రేవంత్ రెడ్డి రాష్ట్ర ఎన్నికల అధికారికి కూడా సమర్పించారు. కోర్టు ఆదేశాలను అమలు చేయాలని వికారాబాద్ ఎస్పీకి ఎన్నికల అధికారి ఆదేశాలిచ్చారు.
ఎన్నికల సంఘం ఆదేశాల మేరకు వికారాబాద్ ఎస్పీ రేవంత్ రెడ్డి ఇంటికి టిఎస్ ఎస్పీ రాష్ట్ర పోలీసు సిబ్బందిని పంపించారు. ఆ సమయంలో రేవంత్ ఢిల్లీలో ఉండటంతో రేవంత్ వచ్చే వరకు అక్కడే వేచి ఉండాలని సిబ్బందిని ఆదేశించారు.
తెలంగాణ పోలీసుల చర్య కోర్ట్ ధిక్కరణ కిందకు వస్తుంది అని రేవంత్ లాయర్ అన్నారు. సెంట్రల్ ఫోర్సెస్ సెక్యురిటి అడిగితే స్టేట్ ఫోర్స్ ను కేటాయించడం సరి కాదన్నారు. రేవంత్ ఢిల్లీ నుండి రాగానే కోర్ట్ ధిక్కరణ కేస్ వేసే విషయం పరిశీలిస్తామన్నారు.
రేవంత్ రెడ్డికి కేంద్రబలగాలు లేదా రాష్ట్రానికి సంబంధం లేని స్వతంత్ర విభాగాల నుంచి భద్రత కోరామన్నారు. హైకోర్టు కూడా సీఆర్పీఎఫ్ బలగాల సిబ్బందిని భద్రతగా అందించాలని ఆదేశాలిచ్చింది. కానీ కోర్టు తీర్పును ధిక్కరిస్తూ రాష్ట్ర విభాగానికి చెందిన వారినెలా పంపుతారని ఆయన ప్రశ్నించారు. న్యాయస్థానం ఆదేశించినట్టు కేంద్ర బలగాలతో భద్రత కల్పించాలని స్పష్టం చేశారు.
హైకోర్టు ఆదేశాల ప్రకారమే రాష్ట్ర పోలీసు సిబ్బందిని భద్రతగా పంపించామని పోలీసులు అంటున్నారు. రేవంత్ కు భద్రత వద్దంటే అఫిడవిట్ రూపంలో హైకోర్టుకు అందజేస్తామన్నారు. కేంద్ర బలగాలతో రక్షణ ఇవ్వమంటే రాష్ట్ర బలగాలతో ఎలా ఇస్తారంటూ రేవంత్ తరపు లాయర్ ప్రశ్నిస్తున్నారు. కోర్టు ధిక్కారం కింద పోలీస్ శాఖ చర్యలు ఎదుర్కోక తప్పదన్నారు.
హైకోర్టు ఆదేశాలిచ్చిన తర్వాత కూడా రాష్ట్ర పోలీస్ బలగాలతో ఎలా భద్రత కల్పిస్తారనే ప్రశ్నలు వస్తున్నాయి. రేవంత్ ఢిల్లీ నుంచి వచ్చాక భద్రతపై నిర్ణయం తీసుకునే అవకాశం ఉన్నట్టు తెలుస్తోంది. శనివారం రేవంత్ ఢిల్లీ నుండి హైద్రాబాద్ రానున్నారు.