(సుమబాల)
తొంభైవేల పెట్టుబడి, సంవత్సరంన్నర కాలం, విభిన్నంగా ప్రేక్షకులకు దగ్గరవ్వాలన్న తపన…కట్ చేస్తే నవాబ్స్ కిచెన్ ఫుడ్ ఛానల్ ఆరున్నర లక్షల సబ్ స్క్రైబర్స్ తో ఆరుగురు వ్యక్తులు ఛానల్ మీద ఆధారపడి జీవించగలిగే స్థాయిలో దూసుకుపోతోంది.
ప్రత్యేకత
ఇంతకు నవాబ్స్ కిచెన్ స్పెషాలిటీ ఏంటీ అంటే వంట చేయడం చూపడమొక్కటే కాదు…కళ్లకు పండుగలా చిత్రీకరించడం..పెద్ద మొత్తాల్లో వంట చేయడం..వండిన పదార్థాలను అనాథలకు, అన్నార్థులకు చేరువచేయడం…ఇదే వారిని ఫుడ్ ఛానల్స్ లో నవాబులను చేసింది.
ప్రారంభం
ఒక న్యూస్ ఛానల్ లో పనిచేసే శ్రీనాథ్, మొయిన్ ఖాజా, భగత్ స్నేహితులు. రెగ్యులర్ బీట్స్ ను వదిలి కొత్తగా ఏదైనా చేయాలనుకున్నారు. జనాల్లోకి తొందరగా వెళ్లేది ఫుడ్, సినిమాలే కాబట్టి. ఈ రెండిట్లో ఫుడ్ ను ఎంచుకున్నారు. శ్రీనాథ్ కెమెరా, మొయిన్ యాంకర్, భగత్ ఎడిటింగ్ పనులు పంచుకున్నారు. అప్పటికే వీరికి సొంతంగా కెమెరా, ఎడిట్ సూట్లు ఉండడం వారి పని సులువయ్యింది. తలా ముప్పైవేలు వేసుకున్నారు. పని ప్రారంభించారు.
ప్రారంభంలోనే ఎదురుదెబ్బ ఆఫీసులో ఈ విషయం తెలిసి ఇబ్బంది మొదలయ్యింది. అంతే నాలుగంకెల జీతాలు వదిలేసి ఏదైతే అదయిందని పూర్తిగా దీనిమీదే ఆధారపడ్డారు. తాము పెట్టిన పెట్టుబడి ఎనిమిది ఎపిసోడ్స్ కే అయిపోయింది. ఆపేయాలా…ముందుకు సాగాలా…అనే సందేహం. ముందుకు సాగాలంటే చిన్న ప్రయోగం చేద్దామనుకున్నారు. చివరి ఎపిసోడ్ చివర్లో స్పాన్సర్స్ కోసం ప్రకటించారు. వెయ్యి మెయిల్స్ వచ్చాయి. ఒక్కరు మాత్రమే డబ్బులు పంపారు. అది చిరుమొత్తమే అయినా తమకు చాలా స్పూర్తినిచ్చిందని చెబుతారు మొయిన్ ఖాజా.
యూ ట్యూబ్ వంటల ఛానల్స్ లో సరికొత్త సంచలనం నవాబ్స్ కిచెన్. ఫుడ్ ఫర్ ఆల్ అనేది ట్యాగ్ లైన్. వంటకు, సేవను చేర్చి ముగ్గురు స్నేహితులు చేస్తున్న ప్రయోగం అనేకమంది అన్నార్థుల కడుపులు నింపుతోంది. దేశవిదేశాల్లో ఎంతోమంది అభిమానానికి కారణమవుతోంది. వారికీ లాభాలను తెచ్చిపెడుతోంది.
ఆ తరువాత తిరిగి చూసుకోలేదు. ప్రతి ఎపిసోడ్ స్పాన్సర్ దొరికారు. అలా రెండురోజులకో వీడియో చొప్పున నెలకు 15నుండి 18 వీడియోలు అప్ లోడ్ చేసేవారు. మొదట్లో మిగతా ఛానల్స్ కంటే డిఫరెంట్ గా ఉండాలని చేసిన వీరి ప్రయత్నం వీరిని సేవ వైపు మళ్లేలా చేసింది. వండిన పదార్థాలను పేద విద్యార్థులకు పెట్టడమే కాదు పుస్తకాలు, చదువులకు సాయం కూడా చేశారు.
పేరు వెనుక
నవాబ్స్ కిచెన్ అని పెట్టడానికి హైదరాబాద్ నవాబులకు ప్రసిద్ధి కావడమే కారణం అని చెప్పారు. మొయిన్ ముస్లిం వేషధారణలో వైట్ అండ్ వైట్ డ్రెస్ లో వంటకాలు చేయడం కూడా హైదరాబాదీ ట్ చ్ ఇవ్వడానికే నని కూడా చెప్పుకొచ్చారు. ఇక్కడ మరో గమ్మత్తైన విషయం చెప్పి ఆశ్చర్యపరిచారు మొయిన్. తనకసలు వంటే రాదని..ఈ పని చేయాలని తలచుకున్నప్పుడు వంట నేర్చుకుని చేస్తున్నానని…కాకపోతే తన అదృష్టం తన చేతితో ఏది చేసినా రుచిగా తయారవుతుందని చెప్పారు.
వందలరకాలు
చికెన్ బిర్యానీ, ఎగ్ ఫ్రైడ్ రైస్, కల్యానీ చికెన్ బిర్యానీ, బ్లాక్ చికెన్, కొరియాండర్ చికెన్, చికెన్ హాంగ్ కాంగ్, క్రిస్పీ చికెన్ పకోరా, చికెన్ ఫ్రైడ్ రైస్, మష్రూమ్ కర్రీ, మటన్ బిర్యానీ, గోట్ లెగ్ సూప్, హోల్ లాంబ్ రోస్ట్, బ్లాక్ ఫారెస్ట్ కేక్, బాదాం మిల్క్, డ్రాగన్ ఫ్రూట్ మిల్క్ షేక్, చాకొలెట్ మిల్క్ షేక్…ఇలా వెజ్, నాన్ వెజ్, స్వీట్స్, డెజర్ట్స్, జ్యూస్ లు ఏదైనా సరే పెద్ద మొత్తాల్లో తయారు చేస్తారు. అన్నార్థులకు అందిస్తారు.
మొదట్లో అన్ని పనులు మొయిన్, శ్రీనాథ్, భగత్ లే చేసుకునేవారు. లొకేషన్ వెతకడం దగ్గరినుండి వంటసామాగ్రి, కెమెరాలు మొసుకెళ్లడం వరకు అంతా వీళ్లే. ఆ తరువాత నెమ్మదిగా ముగ్గరు అసిస్టెంట్లను పెట్టుకున్నారు. ఇప్పుడు తాము వదిలేసి వచ్చిన జీతాలకంటే ఎక్కువే సంపాదిస్తున్నామని చెబుతున్నారు.
ఇప్పుడు వీరు తాము బతకడమే కాదు సమాజసేవ చేస్తున్నారు. అదే సమయంలో మరో ముగ్గురికి ఉపాధి కూడా కల్పిస్తున్నారు. త్వరలో మరో ప్రాజెక్టునూ ప్రారంభించబోతున్నారు.