దర్శకత్వం: కరుణ కుమార్
తారాగణం : నవీన్ చంద్ర, దివ్య పిళ్లై, దివీ వాద్యా, రాజా రవీంద్ర, బేబీ జయన్ని తదితరులు
సంగీతం: అజయ్ అరసాడ,
ఛాయాగ్రహణం : నగేష్ బన్నల్
నిర్మాతలు : రవి పీట్ల, ప్రవీణ్ కుమార్ రెడ్డి
విడుదల : ఫిబ్రవరి 6, 2026
Honey Movie Review: నెగెటివ్ పాత్రలు ఎక్కువగా పోషించే నటుడు నవీన్ చంద్ర ఈసారి ఒక సైకలాజికల్ హార్రర్ నటించాడు. దీనిని ‘పలాస’ మూవీ దర్శకుడు కరుణకుమార్ రూపొందించాడు. ఈ ఇద్దరి ప్రత్యేకతలతో సహజంగానే ఈ ‘హనీ’ అనే మూవీ పట్ల ఆసక్తి పెరిగింది. ఏమిటీ హనీ, ఇందులో కొత్తగా చూపించిన క్షుద్ర విద్యల పాయింటు ఏమిటి, ఇదెలా పనిచేసింది, ఈకొత్త పాయింటుతో ఈ సైకలాజికల్ హార్రర్ థ్రిల్లర్ సక్సేస్సేనా…మొదలైన అంశాలు పరిశీలిద్దాం!
కథేమిటి?
ఆ వూళ్ళో ఆనంద్ (నవీన్ చంద్ర) ఒక మధ్య తరగతి జీవి. అయితే సంపాదన లేక స్ట్రగుల్ చేస్తూంటాడు. అయితే అతడికి మూఢ నమ్మకాలెక్కువ. దాంతో క్షుద్ర విద్యలు నేర్చుకుని ఉంటాడు. దీన్ని డబ్బు సంపాదనకి వాడుకోవాలన్న లక్ష్యంతో విద్య నేర్పిన గురువు సారంగపాణి (రాజా రవీంద్ర) తో కలిసి పిల్లి మాయని సేకరించే పనిలోకి దిగుతాడు. అయితే దీనికి వయసులోకి రాని అమ్మాయి అవసరమౌతుంది. దీంతో తన కూతురు మీరా (బేబీ జయన్ని) మీద ద్రుష్టిపెడతాడు. దీనికి భార్య లలిత (దివ్యా పిళ్ళై) వ్యతిరేకించినా, అతడి వేధింపులు భరించలేక ఒప్పుకుంటుంది. ఇక గురువుతో కలిసి క్షుద్ర విద్యలకి పాల్పడతాడు. ఈ క్రమంలో భార్యా కూతురూ ఎదుర్కొన్న ప్రమాదాలేమిటి? అసలు పిల్లి మాయ ఏమిటి?దానికుండే క్షుద్ర శక్తులేమిటి? మూఢ నమ్మకాలతో వున్నా ఆనంద్ నేర్చుకున్న పాఠాలేమిటి? ఇదీ మిగతా కథ.
ఎలా వుంది కథ?
మూఢ నమ్మకాల వల్ల కలిగే ఫలితాలు ఎంత తీవ్రంగా ఉంటాయో హెచ్చరించే కథ ఇది. రెగ్యులర్ హార్రర్ సినిమాలాగా కాకుండా, అనలు య్యాల్ని చూపించకుండా, మనిషిలోని భయంలో, ఆలోచనల్లో మాత్రమే దెయ్యాలుంటాయన్న సూత్రీకరణ చేసే కథ. దీనికి పిల్లి మాయ అనే క్షుద్ర నమ్మకం కేంద్ర బిందువుగా కథ నడిపారు. ఇది కొత్త పాయింటు కావడంతో, సినిమాకి ఓ ప్రత్యేకత వచ్చంది. అయితే కొత్త పాయింటుని అంతే కొత్తగా బలంగా చూపించడంలో సఫలం కాలేదు దర్శకుడు కరుణకుమార్. సస్పెన్స్, థ్రిల్స్, ఊహించని మలుపులు సృష్టిస్తూ ఈ కథ నడపాల్సింది సాదా సీదాగా నడిపించేశాడు.
ఓ క్షుద్ర దేవతని ఆరాధించే దృశ్యంతో ఆసక్తికరంగా ప్రారంభమయ్యే కథ ఆ తర్వాత ఆనంద్ తను ఉద్యోగం చేసే చోట క్షుద్ర విద్యలు ప్రయోగించాడన్న ఆరోపణతో అతడ్ని కొట్టే సంఘటనతో అతడి పాత్ర ఏమిటో ఎస్టాబ్లిష్ అవుతుంది. ఈ ధోరణితో భార్యనీ, కూతుర్నీ ఇబ్బందులకి గురి చేసే దృశ్యాలు వాళ్ళ మీద సానుభూతిని కలిగిస్తాయి. అయితే పిల్లి మాయ అంటే ఏమిటో దాని ఎపిసోడ్ మొదలయ్యాక ఆసక్తి బాగానే పుడుతుంది. కానీ పిల్లి మాయతో చేసేదేమిటన్న ప్రశ్న వచ్చేసరికి కథ అయోమయంలో పడుతుంది. ఇంటర్వెల్ మలుపు ఓకే, తర్వాత సెకండాఫ్ కథ ముందుకు కదలడానికి మొరాయిస్తుంది.
అంత ఆసక్తి రేపిన పిల్లిమాయ కొత్త పాయింటు సెకండాఫ్ లో కథకి పనికి రాకుండా పోతుంది.
సెకండాఫ్ లో నస పెట్టే సీన్లు, మితిమీరిన హింస, అర్ధం కాని మలుపులూ విసుగుపుట్టిస్తాయి. ఇక కథ ముగిస్తూ వచ్చే క్లయిమాక్స్ అంటే బలహీనంగా వుంటుంది. మూఢ నమ్మకాలూ మంచిది కాదని చెప్పడానికి నడిపిన కథా సంవిధానం అతికే విధంగా లేకపోవడం ఈ సైకలాజికల్ థ్రిల్లర్ తో వచ్చిన అసలు సమస్య!
ఎవరెలా చేశారు?
నెగెటివ్ పాత్రలో నవీన్ చంద్ర ప్రధానబలం ఈ సినిమాకి. అయితే కథ బలహీనం కావడంతో అతడి బలమైన నటన పైపైనే ఉండిపోయింది. క్షుద్ర విద్యల కారణంగా ఉద్యోగం పోగొట్టుకున్న సగటు వ్యక్తిగా మొదలై, క్షుద్ర పూజల మాయలో పడి మానసిక సంతులనం కోల్పోయిన వ్యక్తిగా అద్భుతంగా నటించాడు. క్లయిమాక్స్ లోనైతే భయం పుట్టించే నటన. వీటికి కథ కూడా అంతే అర్ధవంతంగా, బలంగా తోడై వుంటే నవీన్ చంద్ర యాక్టింగ్ టాలెంట్ సార్ధకమయ్యేది.
దివ్య పిళ్లై సగటు గృహిణి పాత్రలో చేసే స్ట్రగుల్ తో రాణించింది. కూతురి పాత్రలో జయన్ని ది కూడా సానుభూతిని రాబట్టుకునే నటన. క్షుద్ర గురువు పాత్రలో రాజారవీంద్ర పర్ఫెక్ట్. ఇతర పాత్రల్లో మిగిలిన అందరూ ఓకే.
కథ ఎలా వున్నా, సాంకేతికంగా మాత్రం సినిమా బలంగా వుంది. అజయ్ అరసాడ అందించిన బీజీఏం కథ హర్రర్ మూడ్ ని ఎలివేట్ చేసేదిగా వుంది. నగేష్ ఛాయాగ్రహణం ప్రధానా కర్షణ అని చెప్పొచ్చు. ఇతర నిర్మాణ విలువలూ బలమైనవి.
‘పలాస’ దర్శకుడు కరుణ కుమార్ సైకలాజికల్ థ్రిల్లర్ జానర్ మర్యాదల్ని పాటించి వుంటే పిల్లి మాయ అనే కొత్త పాయింటుతో ఈ స్క్రీన్ ప్లే మరో లెవెల్లో వుండేది. అన్ని జానర్ల కథలూ ఓకే మూసలో చెప్పలేరు. చెబితే ఫలితం ఈ మూవీలాగే వుంటుంది.
రేటింగ్: 2.25 /5
