-సుమబాల
మార్కెట్ స్ట్రాటజీని ఒడిపిపట్టుకోవడంలో అతను నిజంగా కట్టప్పే. వస్తువును అమ్మాలంటే ముందుగా కస్టమర్ ను ఆకర్షించాలన్న సూత్రం బాగా తెలిసిన బాహుబలే అతను. ఆ సూత్రంతో అంచెలంచెలుగా వ్యాపారాన్ని పెంచుకుంటూ అనతికాలంలోనే విజయాన్ని చవిచూస్తున్న ఆ వ్యక్తే మురళీకృష్ణ అలియాస్ కట్టప్ప. కట్టప్పాస్ బిర్యానీ ఓనర్.
అలా మొదలయింది
కట్టప్ప తల్లిదండ్రులు చిన్నతనంలోనే చనిపోయారు. పశ్చిమగోదావరి జిల్లా తనుకులో ఉన్న అమ్మమ్మ, తాతయ్య దగ్గర ఉండి చదువుకుంటూ…తన పెద్దనాన్న మెస్ లో పనిచేసేవాడు. అలా వంటలమీద ఆసక్తి ఈ రంగం మీద అభిరుచి ఏర్పడింది. ITI పూర్తిచేసి పాలిటెక్నిక్ కోర్స్ చేస్తున్న సమయంలో ఇంట్లో నుండి వచ్చేశాడు. తన కాళ్ల మీద తాను నిలబడాలన్న తపనతో తనకున్న క్వాలిఫికేషన్స్ తో కొద్ది రోజులు అక్కడా, ఇక్కడా ఉద్యోగాలు చేశాడు. కానీ తనలోపలున్న అభిరుచి కుదురుగా ఉండనివ్వలేదు. అందుకే ఉద్యోగాన్ని వదిలేసి అనేక చోట్ల వర్కర్ గా, షెఫ్ గా పనిచేశాడు. కొత్తవి నేర్చుకోవాలన్న తపన తనతో ఆ పని చేయించింది. అలా ఐదేళ్లు గడిచాక. సొంతగా తనకంటూ బిజినెస్ ప్రారంభించాలన్న ఆలోచన వచ్చింది. దీనికి భార్య గౌరీప్రియ ప్రోత్సాహం తోడైంది.
చిన్నగా మొదలైంది
అప్పటికే మణికొండలోని న్యూ సంపూర్ణ సూపర్ మార్కెట్ ఎదురుగా ఒక మిర్చి బజ్జి బండి ఉండేది. మురళీ కృష్ణకున్న ఆసక్తి వల్ల ఎక్కడ ఏ బండి ఉన్నా వారిదగ్గరికి వెళ్లి మాట్లాడటం. బిజినెస్ వ్యవహారం తెలుసుకోవడం అలవాటు. అలా ఆ బండి అతనితో కూడా పరిచయం అయింది. కొద్ది కాలానికి అతను బండి అమ్మేస్తున్నానని చెప్పాడు. కారణం ఏంటంటే ఊర్లో పని అన్నాడు కానీ అసలు విషయం గిరాకీ లేకపోవడం అని తరువాత తెలిసింది.
అప్పటికే సొంతంగా బిజినెస్ మొదలెట్టాలనుకుంటున్న మురళీ కృష్ణ ఆ బండిని కొనుక్కున్నాడు. మొదట మూడు నెలలు మామూలుగానే బండి నడిపాడు. అయితే కస్టమర్లు ఎక్కువగా రాకపోవడంతో విషయం ఏంటో అర్థం కాలేదు. అదే కనుక్కుంటే అంతకు ముందు బజ్జీల నాణ్యత లేకపోవడం ఒకటైతే కస్టమర్లను ఆకర్షించేదేదో మిస్సవ్వడం మరొకటి అనిపించింది. దీనికేదో పరిష్కారం కనిపెట్టాలనుకున్నాడు.
కట్టప్పగా మారిన గోదావరి
ఇది 2017లో విషయం. మొదట్లో బండికి గోదావరి అని పేరు పెడదామనుకున్నాడు. అయితే అప్పటికే బాహుబలి రిలీజ్ అయి ఉండడం…కట్టప్ప పేరు జనాల్లో బాగా నాని ఉండడం వల్ల…కస్టమర్లకు రీచ్ కావాలంటే ఆ పేరే సరైందని నిర్ణయించుకున్నాడు. అంతే కట్టప్ప మిర్చిబజ్జీ, ముంతమసాలా బండి రెడీ అయిపోయింది. ఆ పేరు కస్టమర్లను బండి దగ్గరికి లాక్కొస్తే మురళికృష్ణవేసే బజ్జీల రుచి వారిని అక్కడికి మళ్లీ మళ్లీ వచ్చేలా చేసింది. మిర్చి, ఆలు, టమాటాలాంటి బజ్జీలతో పాటు ముంతమసాలా నోరూరించే రుచితో ఆకట్టుకున్నాయి. క్రమేణా గిరాకీ పెరిగింది. మణికొండ చుట్టుపక్కల ఉండే సెలబ్రిటీలకు కట్టప్ప మిర్చీ బజ్జీ హాట్ ఫేవరేట్ గా మారింది. 2017 మార్చిలో ప్రారంభించిన ఈ బండి కొద్ది కాలానికే రెండుగా మారాయి. మొదట్లో మురళీకృష్ణ ఒక్కడే బండి దగ్గర ఉండేవాడు. ఆ తరువాత పని పెరగడంతో తనకి తోడుగా భార్య, బావమరిది చేరారు. నెలకి 90వేల టర్నోవర్ తో కట్టప్ప మిర్చిబజ్జీ, ముంతమసాలా బండి ఓ పెద్ద సక్సెస్.
బండికి బ్రాంచ్
కట్టప్ప మిర్చిబజ్జీ, ముంతమసాలా బండితో సంతృప్తి పడితే మురళీకృష్ణ గురించి మనం చెప్పుకోవాల్సిన అవసరం లేదు. సంవత్సరంన్నర కాలంలో బండినుండి బిర్యానీ పాయింట్ వరకు ఏదిగిన అతని తీరు ఎంతోమందికి స్ఫూర్తి దాయకం. 2018 సెప్టెంబర్ లో మిర్చి బజ్జీకి బ్రాంచ్ వెలిసింది. అదే కట్టప్పాస్. బార్న్ ఫర్ ది టేస్ట్ అనేది ట్యాగ్ లైన్. వెజ్, నాన్ వెజ్ వంటకాలతో టేక్ అవే సౌలభ్యంతో ఏర్పాటైన బిర్యానీ పాయింట్.
ఇది పెట్టినప్పటినుండి బండి బాధ్యత భార్య గౌరిప్రియ చూసుకుంటుంది. బిర్యానీ సెంటర్లో మురళీకృష్ణ ఉంటాడు. నెలకు మూడులక్షల బిజినెస్ చేస్తూ, ఐదుగురు వర్కర్లను పోషిస్తున్నాడు మురళీకృష్ణ. రోజురోజుకూ తన దగ్గరికి వచ్చే కస్టమర్ల సంఖ్య పెరుగుతుందని సంతోషంగా చెబుతున్నాడు ఈ మణికొండ కట్టప్ప. రుచిగా లేకపోతే వండింది పాడేస్తాను కానీ ఏదో రకంగా కస్టమర్లకు అంటగట్టాలని చూడనని అదే తనను ఇక్కడిదాకా తీసుకువచ్చిందని చెబుతున్నాడు మురళీకృష్ణ.
నవీన్ అనే కస్టమర్ మురళీకృష్ణ గురించి ‘తనపేరు నాకు తెలియదు. కట్టప్ప అనే పిలుస్తాను. పేరు చూసి కొత్తగా ఉందే అని మిర్చి బండి దగ్గరికి వచ్చాను. టేస్ట్ చూసిన తరువాత వదలలేదు. ఇప్పుడు బిర్యానీ కూడా ఇక్కడే తీసుకువెడుతున్నానని‘ చెప్పుకొచ్చాడు.
యువతకు ఆదర్శం
తన అభిరుచి, వచ్చిన పనికి మించిన దైవం లేదని నమ్ముతాడు కట్టప్ప. అందుకే పాలిటెక్నిక్ చదువుకున్నా ఉద్యోగాలమీద ఆధారపడాలనుకోలేదు. మిర్చిబండి పెడితే హేళన చేస్తారని తెలిసినా పట్టించుకోలేదు. తన పని తాను చేసుకోవాలనుకున్నాడు. నిజాయితీగా పనిచేసుకుంటూ వెళ్లాడు. లక్షల టర్నోవర్ చూస్తున్నాడు. అయినా ఇప్పటికీ కాలుమీద కాలు వేసుకుని కూర్చోడు. క్యాటరింగ్ ఆర్డర్లు తీసుకుంటాడు. స్వయంగా తయారుచేసి తానే తీసుకువెడుతుంటాడు. కష్టేఫలి అనేదానికి నిజమైన నిర్వచనం ఈ కట్టప్ప అలియాస్ మురళీకృష్ణ (ఫోన్ నెంబర్: 9100217994)