కొలంబస్ నుంచి కొపల్లి శ్రీనివాస్
అమెరికాలో అంబరాన్ని తాకాయి కొలంబస్ (CTA) బతుకమ్మ సంబురాలు . ఏ దేశమేగినా ఎందు కాలెడినా, ఏ పీఠమెక్కినా ఎవ్వరేమనినా,కొలవరా నీ తల్లి బతుకమ్మను, నిలపరా నీ తెలంగాణ జాతి నిండు గౌరవము అన్నట్లు బతుకమ్మ సెలబ్రేషన్స్ జరిపారు ఎన్నారైలు. ఏ దేశంలో ఉన్నా మన పండుగలను ఘనంగా నిర్వహించుకుంటూ మన తెలంగాణ సంస్కృతి సాంప్రదాయాన్ని నలుదిశలా చాటుతున్న తీరును పలువురు అభినందిస్తున్నారు.
ప్రపంచములో ఏ ప్రాంతంలోనైనా సరే దేవుడిని పూజించాలన్నా ప్రార్థించాలన్నా.. పూలతో కొలుస్తారు.. కానీ ఆ పూలనే భగవంతుడి రూపంగ అమ్మవారి ప్రతిరూపంగా బతుకమ్మ గా కొలువడమనేది ఒక్క తెలంగాణ సంస్కృతికే సొంతం. అటువంటి బతుకమ్మ సంబరాలు అమెరికాలోని కొలంబస్ లో అక్టోబెర్ 13వ తేదీ (శనివారం) ఉదయం 11 గం నుండి కొలంబస్ (ఒహియో) నగరం లోని హై బ్యాంక్స్ మెట్రో పార్క్ లో జరిగాయి. ఈ బతుకమ్మ సంబురాలు రాత్రి 8 గంటలవరకు అంగరంగ వైభవంగా కొనసాగినాయి. తీరొక్క పూలతో పేర్చిన బతుకమ్మలు రంగు రంగు చీరలతో ముస్తాబైన ఆడపడుచులందరు బతుకమ్మ పండుగను గొప్పగా జరుపుకున్నారు.
రంగు రంగుల పూలతో బతుకమ్మను పేర్చి గౌరీ దేవిని ఘనంగా పూజించారు. బతుకమ్మ సంబరాలను ఆటాపాటాలతో అంగరంగ వైభవంగా నిర్వహించారు. తీరొక్క పూలతో పేర్చిన బతుకమ్మలతో మహిళలంతా కోలాటాలు, సంప్రదాయ బతుకమ్మ ఆట, పాటలతో సందడి చేశారు. మరపు రాని గాన మాధుర్యం తో తెలంగాణ సంస్కృతి సంప్రదాయాలను ఇనుమడింపజేశారు. ఒక్కేసి పువ్వేసి సందమామ.. ఒక్క జాములాయే సందమామ.. అంటూ చప్పట్ల హోరు.. కోలాటాల జోరు ఎంతో ఆకట్టుకుంది.
ఈ ఉత్సవాల్లో 1000 మంది కి పైగా ఎన్నారైలు పాల్గొన్నారు. తెలంగాణ సంస్కృతి ని నేటితరం యువతకు తెలిపేలా బతుకమ్మ సంబరాలను ఘనంగా నిర్వహించడం ఆనందంగా ఉందని మహిళలు తెలిపారు. తమ సంస్కృతి మరియు సంప్రదాయాన్ని మరచిపోకుండా కొలంబస్ తెలంగాణ అసొసియెషన్ వాళ్లు ప్రతి సంవత్సరం తెలంగాణ సంస్కృతి , పండుగలను ముందుకు తీసుకవెతున్నారు. బతుకమ్మను విశ్వవ్యాప్తం చేయడంపైనా పలువురు మహిళలు హర్షం వ్యక్తం చేశారు.
జమ్మి పూజ అనంతరము అలయ్/బలయ్ తీసుకొని జమ్మి ఆకు ఇచ్చి పుచ్చుకున్నారు . పిల్లలు పెద్దల నుండి అతిధుల నుండి దీవెనలు తీసుకున్నారు. బతుకమ్మ సాగనంపే కార్యక్రమాన్ని ప్రత్యక్ష సాంప్రదాయ తెలంగాణ సంగీత వాయిద్యం తో ఊరేగింపుగా తీసుకెళ్ళి కొలనులో నిమజ్జనం చేశారు.బతుకమ్మ పండుగగా దిగ్విజయంగా జరిగినందుకు నిర్వాహకులకు మహిళలందరూ ధన్యవాదాలు తెలిపారు.
కొలంబస్ తెలంగాణ అసొసియెషన్ అధ్యక్షుడు మనోజ్ పోకల ఆధ్వర్యంలో ఈ వేడుక జరిగింది. బతుకమ్మ ఆర్గనైజర్లు మధునిక తాటిపర్తి స్వర్ణ పోకల, రమా బిల్లకంటి, స్మిత, విశాల, చందాన పద్మ, వీణ, మమత, రజిని, ప్రణీత, నీలిమ, విజేత, ప్రసన్న, దివ్య, లావణ్య, ప్రతిభ, లక్ష్మి, శ్వేత, సరిత,మాధురి, అపర్ణ, రాదిక తదితరులు పాల్గొన్నారు. పలువురు స్పాన్సర్లు ఈ కార్యక్రమానికి వెన్నుముక లాగ నిలిచారు. బతుకమ్మ సంబరాల వీడియోలు ఉన్నాయి వీక్షించవచ్చు.
రచయిత : కొంపల్లి శ్రీనివాస్, ఎన్నారై (తెలుగురాజ్యం కు ప్రత్యేకం)